যুদ্ধ কর
-মধু মঙ্গল সিনহা
সূচীপত্র
১) যুদ্ধ কর
২) লমিগা ঠিকানাগো
৩) কক্কা বুড়া
৪) মাতো চেইক
৫) সুদেষ্ণার নিঙে
৬) লেইমাঙ
৭) নুয়া জনম
৮) পাহুরলে ঠৈগ
৯) কবিতার জরম
১০) হেলা না করিক
১১) হপন
১২) আমার ফিজেত
১৩) কবিগুরু
১৪) রূপকথা
১৫) চেইনে হাবিরেউ
১৬) গুরুদেব
১৭) কালার সালে
১৮) পইলা দেখাৎ
১৯) মামার ঘর
২০) বিদ্যাসাগর
২১) মহাত্রিপদী
২২) হাইকু
২৩) পিছলন পথগ
২৪) মি কুঙ্গ?
২৫) আগরতলার পথে
২৬) জীবনর পিঞ্জু্রা
২৭) লাভহান কিহান
২৮) বানার ইনচৌ
২৯) হিদল বেলেইক
৩০) দুঃখ না করি
৩১) হিলগ করে বেল্লে
৩২)মুকশীর মিঙালে
৩৩) রুজি কর
৩৪) লেইমা-লেহাউবা
৩৫) রাঙা গোলাপ
৩৬) রাজাগ পালগা
৩৭) রঙর খেলা
৩৮) থাইতই ছবিত
৩৯) আজিকার দিনে (১৬ই এপ্রিল)
৪০) নুয়া কাকেইর হপন
৪১) কেরসর লেম
৪২) আমার নিঙলপী
৪৩) নুয়া বছরে বানার অন্তরে
৪৪) বেলিয়া না জিছগা (আহিতৌ ফিরিয়া)
৪৫) জিংতা অনার হপন (বিমলর নিঙে )
৪৬) আঠুম্পা জি
৪৭) ডাঙর অনার তালে
১) যুদ্ধ কর-২
-মধু মঙ্গল সিনহা
নাইলে বারো আলনি
- নিজর পুরানা ঠিকানা বিছারিয়া!
স্বাধীন আনা মনিয়াঔ নুয়ারানি
জনমে জনমে-
ইদুঙ-দুয়া হাগর তলে।
রকত চুহুনির থতার গজে পারলে-
তি তপতা লহি বুজেদে!
হাপদিছে আজি তোর মুরর গজেদে
-লেইরার হাহাকার।
ছিন্নভিন্ন ইচ্ছা হাবি
-শান্তির আরুমে ।
অবিচার কুনা-কাঞ্চেলে
নিঙশা থেপ্পা বৌবরন।
তি অবিরাম যুদ্ধ কর -
জিঙলেঔ নাজিঙলেঔ দিন-রাতি, না জিরিযা।
নাইলেতে- খালকর!
কি কামে তোর-
এরে সাকা-মাকা চকথার জীবন?
২) লমিগা ঠিকানাগো
-মধু মঙ্গল সিনহা
হারদিন কার নুয়া বেলিগর লগে মিঔ নুয়া করে জিঙতা ঔরি,
ভালোবাসা বিসারিয়া কানা নেই; কানা নেই হপনে জাবুরিয়া।
মুজুরের অবিশ্বাসী ভাদ্রর মাদানে ডাঙর ডাঙর সপার গুড়ি,
বেসামাল পাখিয়াপলি ফুরদিতারা জীবনর আথুম্পা পাহুরিয়া।
ছড়া, বিল পহুরিৎ চং চাং ফান্দিতারা চেঙ, উফল, উকাবিয়ে,
গুলাহানে হাবিরে তিল করিয়া একাকার করে পারতৈ বুলিয়া।
রাখালিয়া বাঁশিগো সুর বেসুর যেতাঔ অক তবু ডাখের রাধে।
বটর তলে তেন্নাম না পাহুরিল মায়ার হপনে ইনাফির ছায়া।
মনে পড়ের মিলন বিচ্ছেদর নুয়া এলা থাইলেউ শত হার জিৎ,
সৃষ্টির সেইত্য পাহুরে নুয়ারিয়া বারৌ চাবকপির জ্বালা যন্ত্রনা।
লেইমাঙে যানা নাদতৌ করত্ করত্ খেইপা খেইপির হাদিৎ,
মোর সৃষ্টি মোর সাহিত্য এ জনমর লমিগা ইকরা ঠিকানা।
৩) কক্কা বুড়া
-মধু মঙ্গল সিনহা
কক্কা বুড়ার বাগা নান্থাক,
পানির মাঝে কাহের ইথাক।
বুড়িয়ে মাতিরি- ‘নাহুনের,
বৌ বরনে বাগিছে বের!’
আনাত গিয়া কলার থর,
চিনাপকে দিলা ডর-
মজা লঙচাক কেলুঈছে,
হিদল মাছৌ নেইছে।
হুনার গিরক সেনাখয়া,
বারে আহিয়া আকমাউ চেয়া-
সেঙ্কুম ছিটা চিপেদে,
কলর গেইগ এরাদে।
তিঙা দারুর কালা ধুমা,
ভাগ্যচেলপা আরতাউ ঘুমা,
কপাল থিপির কপালহান,
ষষ্ঠীর দিনর ধনুকখান।
৪) মাতো চেইক
-মধু মঙ্গল সিনহা
মরণর গরাগই যদি পারাদের মরে,
নিয়া পারতাউগাতা মাত আঙচিল করে?
৫) সুদেষ্ণার নিঙে
-মধু মঙ্গল সিংহ
আজি ১৬ই মার্চ
নিঙে নিঙশীঙে
কবিতার পারেঙে-
পুঞ্চী পালছৎ তি;
অমর শহীদ সুদেষ্ণা।
নঙবেইর
গুলিৎ...
রকতর হিনাহিনীৎ
ঔ দিন...
আক্ষুলিগ তি!
ইমার ঠার
জিঙতা করানির সালে
ঔদিন তর বানার
যৌবন বুজা জনমহান
কাৎকরলে অকালে।
কিয়াকা...?
তবু পুঞ্চী পালকা-
বিষ্ণুপ্রিয়ার জিপুৎ
ইমার ঠার পুঞ্চী পালক!
তিলইয়া থাকা ইমার রকত।
ওয়াশাক করেছিলে
ঔদিন তি..
সকইয়া ডকডকা কুগর জি
ইমার ঠার যেসাদেঔ জিঙতা করানি,
নুয়ারলেতে .....?
নুয়ারলে পিঠি না আলয়া
লালফামে করানি
দৌঅনি-
বারো জরম অনি ইমার সালে!
৬) লেইমাঙ
-মধু মঙ্গল সিনহা
লেইমাঙে না মাঙইবাঙ আহো আজি,
সমাজ ঙালকরানিত যেতাই রাজী।
মাঙনির পথে সালছিতা বিষ্ণুপ্রিয়া,
বানাপেই ইমারে আজি হৃদিগ দিয়া।
হিসাবে হিসাবে কাকেই কারিক আমি,
বয়া আজি য়াম হিন না জিরেয় তুমি।
কিয়া হুদালা ছড়ার পাড়ে ঘর দেনা,
আমারতাউ খানিমানি টাউনে থানা।
ইউনেস্কো মতে আমি মাঙনির পথে,
উল্টাদে কাকেই কারিয়ার হাতে হাতে!
আমি আছিলাঙ,আছি বা থাইতাঙাই,
আজি যুদ্ধ লাগে হাবিয়ে করতাঙাই।
লেইমাঙর জোন ভাগতাঙাই আজি,
যায় যার কামলো যুদ্ধ করতে রাজী।
৭) নুয়া জনম
-মধু মঙ্গল সিনহা
মন পাগলা লাগার ঝামেলা,
তরতা কালা মরতা দলা।
ধর্ম কর্ম পাহুরলে তি-
মরতা বারো হুদালা মি!
আনন্দ-ময়ী ব্রহ্ম এগো-
নিভা পারের মনর জ্বিগ।
'হিলর দৌগত জানহান নেই'-
কুঙ্গই মাতলো ভুরিয়া চেই।
জীবন মরণ পথে ঘাটে
পাপ পুণ্যঔ আক-সাটে।
গুরু-দেবর কৃপা থাইলে,
সইনেই নুয়া জনম পেইলে।
৮) পাহুরলে ঠৈগ
-মধু মঙ্গল সিনহা
তোরে নিঙশিং খেলতামে- কোকিলা!
মোর হৃদিগ থূক থূক করের,
কিতাপারা আকদিন তিঔ মাতেছিলে-
নাপাহুরতেই কোনদিন মোরে তি জনমে জনমে।
ক্ষেতিবাড়ী করতাঙাই দ্ধিয়গই তিলয়া-
মি বিহান হস্করতৌ আলি বাদ্দিতৌ,
তি হাতে হাতে রুয়াহান হাজেইতেই।
ভাদমার দিনে ধান কাপতাঙাই দ্ধিয়গই তিলয়া।
চানৌ করতাঙাই হারৌ হারৌ অয়া-
তোর ইমাঔ আইতই বাবাঔ আইত
হাবিহানে তিলয়া দসু খেলতাঙাই,
বান্দারা খেইতাঙাই।
হপন হপন হাব্বি হপন!
মেঙসেলহানর দেকি কিয়াকা বাকলে তি?
পাহুরলে হাব্বি পুরানা য়ারি,
মি এবারও বাসাসু তরে-
লেহাউ জারির তলে বইয়া মি আক্ষালাগ।
খৌরাঙে মি আজিকাঔ খালকরৌরি
কোকিলা-তি আইতেই পাউরি!
দিন কাটিল মা' কাটিল গেলগা বসন্ত ফরদিয়া-
তি নাইলে আর আলইয়া!
কিসাদে পাহুরলে তি পাষান অন্তরে,
মোর বানার ঠৈগ-জিঙতা থইয়া মোরে?
৯) কবিতার জরম
-মধু মঙ্গল সিনহা
কবিতা জরম অর ঙাহাকে ঙাহাকে,
মিঔ মালকগ অছু কবিতার কাজে।
মরেঔ বিছারেইনে তুমি যৌবনর বনে,
লুকাছু মি আজি কবিতা লিখানির মনে।
চুনুনিগ ফরদের চেই আত্তিঙগাৎ আজি,
নিজর সাহিত্য রক্ষাত অইনে হাবিঔ রাজী।
ইমার ঠারর নুঙসীপা ডাকে-
কবিগ মালছু মিঔ জীবনর ফাঁকে।
ঔদিন গীতিস্বামীয়ে অকরিছিল কর্মহান,
ঔহানাৎ মিঔ পাছু বার্তন আহান।
হমাদেঔরী মি তরে ইমা বিষ্ণুপ্রিয়া,
বরদে তি আমারে জিপুৎ বুলিয়া।
১০) হেলা না করিক
-মধু মঙ্গল সিনহা
নিঙলপী বুলিয়া না করিও হেলা,
অইয়াঔ থাকা তানু দলা নাই কালা।
হুরকাং হুরকাং লামলাকে না কাঁদকা তানু,
পৃথিবীর অর্ধেক আহান নিঙলপী মানু।
মুকশীর খকে বইতারা সংসারর ঝালা-
আমি বারো খাঙ্চেৎ বাদিয়া মালপা কামুলা!
সুখ শান্তি ছাড়া থাইলেউ অশান্তি-
মিলিয়া চলিক আহো পাহুরিয়া ভ্রান্তি।
১১) হপন
-মধু মঙ্গল সিনহা
'হপন' তরে নাদেখঙ বুলিয়াঔ নুয়ারলু।
তি আপ্পানে জরমঅর-
আম্পুরিকারর বারো ডেমগত্ত বাগিঔ পড়র।
কঙানা চা-র কড়ির দেখি-
বারো তোর পাতা সাতুইয়া নুকুলের।
লিরিলিরি বৌর হাদিত তি উবাঅনার চেষ্টা করর।
কোনপেই সেচুরন খার-
বারো ঠিকা দিয়া উবার।
মি টেইপাঙ আঁখিন তরে চাউরি-
তি বারো আরাক আকমাঔ নুয়া করে কাকেই কারর;
আহাত থামিয়া থানা না মনার।
মাত মিতে কিহান করতু!
মুঙেদে বেলি গিরকরে সাক্ষী থইয়া-
মিঔ সালুইসু তোর পিছে পিছে ইয়া,
জিঙতা অনার নুয়া হপন দেখিয়া
১২) আমার ফিজেত
-মধু মঙ্গল সিনহা
আমার ফিজেৎ নকুন কাঠি,
বুড়া কালর ককারা লাঠি।
ফেইচম পিদিয়া ঢাক বাড়ানি,
হুদালা গারিৎ জ্বি ফুয়ানি।
মুরে খুত্তেই আতে দা,
মাটি খুলিয়া নিকাল্লা হা।
ঘরে খুত্তেই লঙ্গি নাগই,
আমার মুনির চিন্নত এতাই।
লিকশই ,কানবেরি,কাঠি-ছুড়ি,
পিদতাই বেইয়াপাই অইলেউ বুড়ি।
ইনাফি চাকছাবি মানুর মিমাঙে,
লাঙউ ফিতুপ ঘরে গাঙে।
স্বর্গর দৌ আমি ফিজেতে,
পাঙইয়া চেইতারা হাব্বি জাতে।
১৩) কবিগুরু
-মধু মঙ্গল সিনহা।
দুহান আহান প্রশ্ন আজি আমার ছৌর নিঙে,
উত্তর অতাঔ মাতেদিতঔ নাঔ লুকিয় খঙে।
মাতো বেনাই-রবীন্দ্রনাথ কতিহান উচিছিল?
তাঁ পিদলো জোব্বা অতা কুঙগই হিয়াছিল?
ছয় ফুট-তিন ইঞ্চির মানুউগ কবিগুরু বুল্লা,
ফুতি হিলো টেইলারঅগ ওস্তাগর ফতেউল্লা।
১৪) রূপকথা
-মধু মঙ্গল সিনহা
রূপকথার ওয়ারি-পরি হুনতে লাগের চমৎকার।
আপুর খকে বহিয়া মিতে কাটাবেল্লু মাঘর জার!
মনহান মরতা হারৌঅর নাই হুনিয়া রূপর কথা।
মি আ করিয়া চেইয়া থাউরি আমার বপার থতা।
১৫) চেইনে হাবিরেউ
-মধু মঙ্গল সিনহা
চেইনে হাবিরেউ আজি হাজিছি কতি,
বছরহান কাটাছিলা বাছিয়া এ রাতি।
নানা ফুল চন্দন বারো আতরর গতে,
হারৌপাই শকল আজি হাব্বির অটে।
১৬) গুরুদেব
-মধু মঙ্গল সিনহা
গুরু আজি তোর চরনে,
দিমতা মিতে কিত্তাউ নেই।
বানার বারনে থইলে মোরে,
গুনে তিতে চিকঙলেই।
১৭) কালার সালে
-মধু মঙ্গল সিনহা
বানা পেইলে খানি মানি,
নাথাইস তি আর অভিমানী।
দুঃখ জ্বালা হৃদির মাঝে,
মুকশী তবু কালার কাজে।
১৮) পইলা দেখাৎ
-মধু মঙ্গল সিনহা
যেদিন তোরে পয়লা দেখলু,
ঙাকছিলু মি!
মনর বনে ঔদিন ক্যাকা,
লাগাদিলে জ্বি?
১৯) মামার ঘর
-মধু মঙ্গল সিনহা
মামার ঘরৌ পাহুরলাঙ,
কামে হাবি থেঙুইলাঙ।
দাঙ্গরেতে নাউ দেখিছু,
আপুর বানা বাক্কা পাসু।
গোরুর সেল্কুম চাম্পা কলা,
রাঙা চিনির ডাঙর ঢলা।
রুকর সপার ঝোপর মাঝে,
লুকিতারা বাদর লাজে।
নিঙশিং ইলে নুঙি লাগের,
আঁখি দ্বগি হপন দেখের।
২০) বিদ্যাসাগর
-মধু মঙ্গল সিনহা
বিদ্যার সাগর তিতে 'ভারত রতন',
জরম নাছি পৃথিবীত তোর মতন।
বানার বারনগ তিতে ঔদিন কালে,
মারুপগ অছিলে লেইরার কপালে।
ইঙাল ঙাল করিয়া থসিলে হাবিরে,
তোরকা আজি মুর তুলেছি উচকরে।
টেঙারার ডেকি বাধা হাবি লালইয়া,
গেছিলেগা কুসংস্কার উতা বেলিয়া।
যেগইঔ আশ্রয় লইলাগা তরাঙ,
জিঙতা করেছিলে ঐলেই ছেচারাঙ।
পদে পদে লালফাম সমাজর নিঙে,
ধৈর্য্য কারতা আছিল তরাঙত জিঙে।
পথে পাকরিয়া তি পন্ডিতগ ওছিলে,
ধন্য ঐয়ার আমি তোর নাঙ লইলে।
২১) মহাত্রিপদী
-মধু মঙ্গল সিনহা
(১)
নাজিগা ইতাউ বেলিয়া
মায়ার বাধন ছিড়িয়া
আঁখির পানিৎ বাহিয়া...
(২)
পৌরুকা কালিকা আজিকা
কতিঔ বাছিলু রাধিকা
আইনে ফিরিয়া এবাকা...
(৩)
শান্তিল থানার সালেদে
আলয়া সালসু ঘরেদে
লঙ্গর বাধেছি জাঙেদে...
(৪)
মরলে জীবন স্বার্থক
দেশর রক্ষাৎ লাগলে
অমর করলা নিজরে...
২২) হাইকু
-মধু মঙ্গল সিনহা
(১)
কঙালা রাতি
ফাগুনর ঙাহাক
রাঙা জোনাক।
(২)
বেলিটিক মাপা
যৌবনর টেঙারা
আসাঙপা বৌ।
(৩)
সাত এহান
চেইলেই পাগল
ভিত্তরে খের।
(৪)
নেশার দেকি
মাতাল চারিবারা
নিজর মনে।
(৫)
পেইলে মুক্সী
নাপেইলে ককশী
বাকিৎ আক্সী।
২৩) পিছলন পথগ
-মধু মঙ্গল সিনহা
ঐলেউ অকনে পিছলন পথগ,
আটতে বারো ডরতে কিগো!
ছড়ার পাড়রর লেঙউ অরে,
নাঔ থামতৌ উতার ডরে।
পথ বিবুলা রাতি নুঙেইত,
যিতৌগা মি সমাজর কুমেইত।
মূর্তি পালইয়া মনর আশা,
আকদিন ঐলেউ কাটতই দশা।
২৪) মি কুঙ্গ?
-মধু মঙ্গল সিনহা
সিদ্দা কাৎকরলু
গিয়া মি দৌর লেইসাঙে,
বরৌ মাগিছিলু প্রভুর শ্রী চরনে-
"হে প্রভু মরে তি মানুগ করেদে"।
চিন্তা আহান মনহাত হমিল মরাঙ-
হেই 'মি' হুদ্দা 'মরে' বুল্লুতা কিদিয়া।
নঙসাঙ ইয়া খালকরলু 'মি'তে কুঙ্গ?
আঙকরলু মনে মনে ভগবানরাঙ-
'হে প্রভু বাগাদে তি মরে মি কুঙ্গ'।
কিতায়া এহাত আহিলু আজি-
ফুটা আহান দুহান পড়িল বরনর পানি।
মি আরতাউ হৎনা করলু-
হারপানিৎ মি কুঙ্গ!মি কুঙ্গ!
২৫) আগরতলার পথে
-মধু মঙ্গল সিনহা
ছালছুতা মি আজি আগরতলার মাটিত্,
এগারোটাৎ হিনেইয়া নুকুল্লু বেলিটিকিত্।
টুকটুকে চড়িয়া আইলু ধর্মনগর স্টেশনে,
টিকেট করিয়াঔ বইলু আইয়া প্লেটফর্মে।
খানি থাইয়া আহিল ট্রেন বাঁশিগ রহেইয়া,
কানির জাগাঔ নেই মানু নিয়াম অইয়া।
বালাপারা পেইলু সীট ইঞ্জিনর কাদাহাৎ,
রহে রহে পাগল করলো পুল্লাপ পথহাৎ।
স্টেশন লালর বুকদা লালর পথর মাঝে,
পুলিশে হইপৎ করলা পাটিবেছুরার লগে।
নুঙেইপার চিন্তা নেই পৃথিবীর রাজ পথে,
লেইরা অইলে পদে পদে না মিলের মতে।
২৬) জীবনর পিঞ্জু্রা
-মধু মঙ্গল সিনহা
জরম অনির আগে বা পরে,
কোনগৌ কোন দিন স্বাধীন নাগই।
আতে জাঙে বাধেছি আমারে,
নাদেখিল লোয়ার লঙ্গরে।
পিঞ্জুরার ভিতরে পালেছি ময়নার ডেকি,
'রাধা কৃষ্ণ কৃষ্ণ ' বুলিয়ার।
সমাজর ডরে রাজনীতির ডরে,
থতাত মারেছি তালা হামেসা।
ঠেঙর তলর মাটি-
চন্দন অছে আজি কারণে।
কাকেই কারানি মনেইলেউ-
চিলছে আজি সমাজর কতো বেরাগাঠুনি।
ইমে পিঞ্জুরা বদলেইয়ার পারা-
এগত্ত ঔগত্ত।
তিলনি খেইনি কৌলি করানি,
পাখথাইলেঔ ফরদে-নারানি।
বাঘ, সিংহ আত্তি গরা,
স্বাধীন হাব্বিঔ আমারতাতে বেরা।
কাপারমা লাগলেউ মরকশী,
তরতাতে দেনি লাগতৈ মুকশী।
২৭) লাভহান কিহান
-মধু মঙ্গল সিনহা
নিজ নিজরতাই যুদ্ধৎ থেঙছিপারা আজি,
স্বার্থর খাতিরে যেহানৌ করতে রাজি।
ইরাক, প্যালেষ্টাইন, বাংলাদেশ বা কাশ্মীর,
হাব্বিপেইত চলেছে-রাতিহান য়াম গম্ভীর।
রকতে রকতে হিনাহিনি মানুয়ে মানুয়ে,
শান্তিরকা আটাআহান দিক পৃথিবীর পথে।
নিক্কাকার বাধা নিষেধ নুয়ানুয়া আইন,
ঔতার হাদিতৌ মানুয়ে নিকালতারা লাইন।
লালফামর ফামেঔ দেখলু ফুল সাতসে,
ঐলেউ ঔফুলে মানুর রকত লাগেছে।
কোনপেই ধর্ম পাল্টের কোনপেইৎ জাত,
হাব্বিয়েঔ মাত্তারা জিকগা আলইয়া হাত।
নিজর ঘরে থাইয়াও জেলগ মালছে,
আমার মানু্র কাকালিৎ গিঠাগ হমাছে।
হাব্বির বানার 'প্রিয়া'-উগ 'পুরিরা' আলইলে,
লাভহান কিহান ঐতইতা নাগ্গই কৌশলে?
২৮) বানার ইনচৌ
-মধু মঙ্গল সিনহা
আমার বানার ইনচৌ ঘরগ,
জবর লরখর অছে।
নিমর ডেল ছনর চালে-
বাবাই খইয়া থসে।
বরন পরলে ছনর হেরে,
বালতি পাতিয়ার ঘরে।
বানা পেইয়ার আজিঔ কিয়াকা,
ইনচৌ ঘরগ তরে।
২৯) হিদল বেলেইক
-মধু মঙ্গল সিনহা
হিদল মাছর গতে হিনইল আমার মানুর ঘরে,
জিনিস আহান মাতিঙ আজি গালেইলেও তুমি মরে।
পঁচা খেইয়া বুদ্ধি পচিল সেঙ্ সেঙ্পার দিনে,
হৌ-পাত্ বেলেইয়া হিদল খেইয়া পড়েছিতা ঋণে।
চন্দন পিদিয়া বৈষ্ণব আমি দৌঅর লেইফামে,
হিদল খেইয়া গুণ মাংকরলাঙ ডাঙর জাতর মানে।
দাঁড়ি ডিগল মানু উতাই নাগৈ নাগৈ থৌল,
উড়িয়া পাড়িয়া হঙকরতারা হিদল তানুর সৌল।
৩০) দুঃখ না করি
-মধু মঙ্গল সিনহা
মন থাইলে দুঃখ থাইতই,
বিলাপ করিয়া কিতা ঐতই।
মনর সেইয়াত দুঃখ বেলেইয়া,
যুদ্ধ কর বারো আলোইয়া।
কথা মাতিঙ দুহান আহান,
শক্ত কর ইতাউ মনহান।
ক্ষতি নাকরি তি কারেউ,
বাট থাইলে চিড়ার লাড়ৌ।
তর পিঠিৎ পড়েছি যেতা,
কাম নেইহানতে কিতাউ কিতা।
না করিও বুল্লেউ তি,
বারে বারে দিতাই জ্বি।
থক নাথক কিত্তাউ নেই,
আক্ষুরুম তুমি আলইয়া চেই।
কোন দিনঔ সাঙ নেই,
গাঢ়ে ধরেছি নঙ-বেই!
সমাজে তরে হব্বা করে,
বাধিয়া থসে নিজর ঘরে।
তিও মিঔ হাবিঔ আক্তা,
যেমন গুয়ার হাদিত তুক্তা।
কথায় কথায় কথা বাড়ের,
গাছ লাগেইলে ফল ধরের!
৩১) হিলগ করে বেল্লে
-মধু মঙ্গল সিনহা
থাম্পাল বুলে বুলে-
তি মোরে পানিহানাৎ বেল্লে!
অট কামারেইয়া বহেসু মি,
কিয়াকা মুকশী দিলেউ মাতলে!
বানার খলইগো বুজিল হানতে,
এহুরুম ককে থনা মনেইলে!
হৃদিগ রাঙিলা অছে আজি,
বসন্তর কৃষ্ণচূড়ার রঙে!
বানার বারনে ঘরের দৌগ বুলিয়া,
হিলগ করিয়া থইলে!
আঁখির পাড়ে তোর কাজলর কালি,
হাগর মেঘলা মালছে।
তোর নাঙে নৌ চালাছু আজি মি,
জোনাক তারার হাদিত।
হাজেইয়া থসু ফুলর বাগান,
মনর পরীর গোলাপী পথে!
৩২)মুকশীর মিঙালে
-মধু মঙ্গল সিনহা
উসাদে জিংধরে নাচেই মরে,
নাউ পাহুরেছু কালাচাঁন তরে!
বানার জোয়ার তুলিয়া রাতি,
মোরে হিন দিতে কতি!
তি মোর হুনার থাম্পালগ,
কিয়াকা লাগেইলে হৃদিৎ জ্বিগ!
দিবারা চানার সময় নাথৈলে,
আপাঙ্পীর জনম অকালে মাঙকরলে!
রাতি দিন আক্ষালা ঘরে,
হাজেইতু কতিঔ নিংশিঙে তরে!
মনর মাঙ্কলে মুকশীর মিঙালে,
পাগলীগ অসু তোর সালে!
আর জ্বালা নাদিনে মোরে,
পাহুরানির হত্না করিং তোরে!
৩৩) রুজি কর
-মধু মঙ্গল সিনহা
বানা পেইলা বানা পেইলা,
কুঙ্গই কারে য়াম!
ঔ হিসাব মিলেইতে তি
বেল্লে কতি ঘাম!
ইমা বাবা বেইবুনি হাবি,
চেইয়া আছি তোরে,
বানা পেইয়া তানু আজি,
লামেছি হাবি অরে!
এ জনমে কুঙ্গ কারতা,
থতাত দিলে কহা তিতা!
ক্ষেতি কর আল ধর,
দুহান পয়সা রুজি কর!
৩৪) লেইমা-লেহাউবা
-মধু মঙ্গল সিনহা
যে দিন তর নাঙ হুনলু লেইমা,
'থুক' করেছিল মর হৃদি থাম্পালগরমা!
না চিনেছিলু ঔদিন মি তরে,
বানার ছবি আগ দেখেছিলু মর অন্তরে।
দেখলু মি বহু দিন পরে তর রাশী,
যেমন কঙালা সাতে কাপকলেই মুকশী!
তর তিঙা অটে বরনর পানি,
বানা পেইলু পাউরি ঐদিন তরে য়াম খানি;
ঔদিনতো-তি লেইমা মি ঐলু লেহাউবা!
৩৫) রাঙা গোলাপ
-মধু মঙ্গল সিনহা
য়ারৌ না করি তি,
নুঙসির গিথানক।
তরে চেয়ে আজিকাও,
অসু মি আচানক!
হারৌপার দিন-
ভ্যলেন্টাইন গেলগা,
রাঙা গোলাপ উগৌ,
আজি কেলপরিলগা....!
৩৬) রাজাগ পালগা
-মধু মঙ্গল সিনহা
হাইহান মোরতাউ তোরে দেখানির,
খৌরাঙ আছিল পানির টাটির ডেকি।
মিঔ জাবুরানি মনাছিলু তোর বানার ঝমুনাত!
বছর পর বছর আহিল বারো গেলগা,
বসন্ত আহিল কোকিল রোহিলা,
ফাগুয়া গেলগা-মিতে বাসেইয়া আছিলু।
হাই তরেই বাছাছিলু!
তোর বসন্তরঐ ডাকে!
কবিতা পাকরলু, রাসর এলা অরেইলু!
হাদিত আক্ষুলিগই কৈনার আটাউ দিলু।
নিংশিঙে নিংশিঙে ঠুনিংসা কতিঔ বেলতু,
খানা পিনা পাহুরিয়া জাগরণে কাটিল
মাতাম্বালা সময়র দুঃখর রাতি।
তি পাষাণ অসিলে ঠই মোর য়াম কতি!
আজি খাটলর আঠির গাছ উঠিল,
বৈশাখর বরনে-
তি কিসাদে বারো নিংশিঙ অইলে আপাঙ্পীরে এ দুঃখর জনমে!
আজি মালতে 'মোরে ধূপথমেইলো
ঙক্করানি, আতর গছানি' এতা প্রিয়-
মোরে দুঃখ দেনারকা না তি দুঃখ পানারকা!
মিতে এবাকা ইশাঙ পড়া ছড়ার তলর,
হিলগ অছু, সমানে আঁখির পানির ছড়াহান!
মি দুঃখর জ্বালায় জ্বল্লেউ,
তি মোরে না ছকই!
দুঃখ নাপেই ,দুঃখর বারনগো জুগতকো
বাধিয়া থইতৌ।
আলয়া যাগা ঠইগো তি!
ফুলডানা পিদগা, রাজাগো পালগা!
তোর হারৌয়ে মোর হারৌ,
সেইত্য করিয়া মাতৌরি তরে,
অইতই দেখা নাই পরর জনমে!
৩৭) রঙর খেলা
-মধু মঙ্গল সিনহা
রঙর খেলা চলেছে আজি,
তেনুয়া, নীলুয়া রাঙা।
হিয়ালর রঙহান কিহান বুল্লে,
কিতা বুলতেই মাত?
য়ারি পরি দিতেউ আজি,
আবির লাগের মনে!
হাবিয়েউ হুনেছি হাগর রঙহান-
নীলুয়া রঙর খেলা।
আঁখি মেলিয়া চেইলে দেখলু-
মেঘালার বরন চাকা।
খানি খানি রঙ তিলইয়া,
অছে বেরঙ আজি!
এসাদে করিয়া রঙর খেলাত,
চবুরেছে আমার সমাজ আজি।
মুকশী দিয়া মদল্লেইএ,
বাধিরি গুরার গাঠি!
আন্দিরা রঙর চুলর কলপ,
কঙালা সৌর চুলে!
হাছায় মিছাই রঙর ভিতরে,
আসল রঙহান কিহান?
৩৮) থাইতই ছবিত
-মধু মঙ্গল সিনহা
আজিকার দিনে দৌ শলকরিয়ার হাবিহানে,
রাধেকৃষ্ণ এহান কিহানে..কিহানে!
সমাজর সেবারী হাবি অছি মরুশী,
কুঙ্গ পানিত বুরিল উহান আমি নাউ দেখেছি!
নামাবলী ঘারে বেলেইয়া,
চলেছি সেঙ সেঙ ছাইয়া।
বুরিল যেগ আজি পানিহানাৎ ,
ছবিগ তুলিয়া থইয়ার মোবাইলহানাৎ।
ছবি উগ দরকারিগ,
মানুগতে কিগ.....?
বুরলেউ বুরক
মরলেউ মরক!
ফুতি ফানি তিঙেইয়া না লামতাঙই পানিত,
মরলেঔ উগ পুঞ্চীপালইতই থাইতই ছবিত!
৩৯) আজিকার দিনে (১৬ই এপ্রিল)
-মধু মঙ্গল সিনহা
১৬ই এপ্রিল
আজিকার দিনে জরম অছিলে তি,
ইঙাল ঙালকরিয়া আধার রাতি।
পুঞ্চী পালয়া থাক তি ...
ধন্য ধন্য তাপসী!
৪০) নুয়া কাকেইর হপন
-মধু মঙ্গল সিনহা
'হপন' তরে নাদেখঙ বুলিয়াঔ নুয়ারলু।
তি আপ্পানে জরমঅর-
আম্পুরিকারর বারো ডেমগত্ত বাগিঔ পড়র।
কঙানা চা-র কড়ির দেখি-
বারো তোর পাতা সাতুইয়া নুকুলের।
লিরিলিরি বৌর হাদিত তি উবাঅনার চেষ্টা করর।
কোনপেই সেচুরন খার-
বারো ঠিকা দিয়া উবার।
মি টেইপাঙ আঁখিন তরে চাউরি-
তি বারো আরাক আকমাঔ নুয়া করে কাকেই কারর;
আহাত থামিয়া থানা না মনার।
মাত মিতে কিহান করতু!
মুঙেদে বেলি গিরকরে সাক্ষী থইয়া-
মিঔ সালুইসু তোর পিছে পিছে ইয়া,
জিঙতা অনার নুয়া হপন দেখিয়া
৪১) কেরসর লেম
-মধু মঙ্গল সিনহা
বেলি বুরানিরলগে,
লেম লাগেইয়া-
বইলাঙ আমি,
লেরিক চেয়া।
কঙলা রাঙা
লেমর দশী
কেরেস বরেইয়া-
হাজেইয়া থসি।
কালা সেলেটে,
ধলা মেয়েক-
হুরকাং ডাঙর,
বেদুম ইকর।
তিঙা ফুতিল,
সেলেট পুছিয়া-
ইকরলাঙ তেল্লাম,
নিয়াম হাজেইয়া।
খাতাঔ নেই,
কলমঔ নেই-
তবুও মাতলা,
লেরিক চেই।
চেইলাঙ্ লেরিক,
ধরলাঙ্ মাছ।
পরীক্ষা উতাৎঔ,
ঐলাঙ্ পাশ।
৪২) আমার নিঙলপী
-মধু মঙ্গল সিনহা
আমার নিঙলপীর দেকি
নাদেখেছু আরতাত মি।
রুপে রঙে অপ্সরা,
যেমন হাগর তারা।
এ সৃষ্টির মায়া,
দিয়া পালকরেছ ছেয়া।
তুমি শান্তির দৌ,
ঙালকরলাই নিজর সৌ।
তুমি সেঙকরলাই মন্দির,
যেমন ফালগুনর আবির।
বানার আথুম্পা কথাৎ,
বাধেছ হাবিরে আক্ষাৎ।
জয়ধ্বনী তোমার নাঙে,
হাবিরে আনলাই মিমাঙে।
৪৩) নুয়া বছরে বানার অন্তরে
-মধু মঙ্গল সিনহা
নুয়া বছরে বানার অন্তরে,
আইতউ বুলেছিলু তোমার ঘরে।
ঘরগ হাজেইয়া চন্দন পিদিয়া,
সালইয়া থাইস তি হাজিয়া।
বাবার সালে পড়লু বেতালে,
ধানর মুঠি তুলেছু লেম্পালে।
৪৪) বেলিয়া না জিছগা (আহিতৌ ফিরিয়া)
- মধু মঙ্গল সিনহা
নিংশিঙে নিংশিঙে কাটিল রাতি
তোর কথা কঙানা কতি ।
কামে ধুমে সাঙ নেই-
বারা বুলন দেনার সময়তে কই ?
মাস্টাররে মাস্টারি করিয়া-
নাথার সময় আতে লেমুয়া।
অহান্ন আছু -
কবিতা তরেপাহুরিয়া।
না শৌইছ তি আজি,
শাস্তি দিলেউ মি আছু রাজি ।
বেলিয়া না জিছগা তি মোরে,
আলুয়া আয় তি মোর অন্তরে ।
৪৫) জিংতা অনার হপন (বিমলর নিঙে )
- মধু মঙ্গল সিনহা
পৃথিবীৎ মানুর কাজে জিংতাঅ্নি,
নাইলে মরানি – ‘হপন’ এহানরে মাতানি।
দেখলু মি বিমলর হপনে –
যেতা যেতা তা করিছিল তাঁর জনমে ।
আভাঙ্গা গাঙ কাঁদের এপাগাও বিমলর নিংশিঙে,
নাউ থুঙিছিল হাবি হপন তাঁর টেইপাঙে।
তাঁর দেখা অরে হপনের টেঙারা,
আহ হাবিয়ে পালকরিক যেতা বাকি আছে কিতাপারা ।
পিছেদে অয়ালুয়া চানার সময় নেই,
হাবিহান মুঙেদে কাকেই কারেই।
চেইয়া আটো গিরকর পাড়ার চিন,
যেতা ধনার হত্না চলিছে হারদিন!
নিংশিঙ ইয়া থাইয়ো হাবি আমার মানু,
আমার থাম্পালগো কিদিয়া ছিরলা তানু?
৪৬) আঠুম্পা জি
- মধু মঙ্গল সিনহা
না লাগিনে তি আজি-
কঙানা গারিতৎ আঠুম্পার জি।
য়ারু না করিছ তি মোরে,
নাঔ সকতৌ মি আরতা তোরে।
গঙ্গাৎ হিনিয়া সেঙুইছুগ মি,
সকিয়া না মাঙকরি মোরেঔ তি।
মুকসির মিঙালে বাহানার মিৎলেঙে,
নাঔ থইস মোরে হৃদির কন্নুঙে ।
৪৭) ডাঙর অনার তালে
- মধু মঙ্গল সিনহা
হুরকাঙ কালহান মাঙুয়া গেলগা
ডাঙর অনার তালে।
আজি কুঙগৌ না ডাকতারা
খেলাৎ জানার সালে।
পার্কে বহিয়া হপন দেখিয়া
ধলা চুলর মুরে-
শৌ শুমারাই ক্কশি দিতাই
আলুয়া জাগা ঘরে ।
খেলা নুয়ারতেই কারলগেঔ তি,
বয়স দিল আলবারি।
দুঃখ করিয়া লাভনেই গিরি,
চামকরেহুন দৌর ওয়ারী।
We appreciate you contacting us. Our support will get back in touch with you soon!
Have a great day!
Please note that your query will be processed only if we find it relevant. Rest all requests will be ignored. If you need help with the website, please login to your dashboard and connect to support