আকদিন আহিছিলে না পাহুরিছ -সমরজিৎ সিংহ
আকদিন আহিছিলে না পাহুরিছ
-সমরজিৎ সিংহ
সূচীপত্র
১) মোবাইলহান
২) নিত্তি দিন
৩) ব ন ক
৪) ঔদিন
৫) ফুল
৬) বেলির মিঙাল
৭)মোরগাঙ
৮)ফটক
৯ ) পূজা
১০)পথগর মা
১১) আকাল
১২)ছৌ ছুমারা
১৩) ডাঙরিয়াগ
১৪) লোহংহান
১৫) লেখনী
১৬) দিনরগতি
১৭) পথগো
১৮) পরীক্ষা
১৯) মলাট
২০) বুড়া
২১) ছুটি
২২) চাহা
২৩) নরম মাটি
২৪) বছর
২৫) জাতর কৌলি।
২৬) কয়না বিছারানি
২৭) হঠাৎ যদি
২৮) মুরগর গজে
২৯) গর্জন
৩০) পর্দার পিচহাত
৩১) নুয়া মেইথঙ , নুয়া লালফাম
৩২) আহির পানি
৩৩) রথর পালির হারৌপা
৩৪) টাউন হলগো
৩৫) আপা বপা
৩৬) হুরুকাঙ ভাঙর
৩৭) হপনর য়ারি
৩৮) হাবির মানা
৩৯) আনাযানা
৪০) মুঙর গুরুর ছাঙগো
৪১) কাঙর দিনে
৪২) বেধর্মী
৪৩) অঙ্ক আগো
৪৪) লিখা পড়া
৪৫) ধূপধুনা দেনা
৪৬) মারই মশলা
৪৭) পৃথিবী ইমা
১) মোবাইলহান
লুয়াদে লৃয়াদে বুলিয়া কাঁদানি অকরলে,
নুঙেই নুঙেই লেইলা লেইলা না বিছারলে।
রাতি রাতি দিন দিন কিতা কিতা চেইলে,
লেরিকহান লেরিকহান হাব্বিতা বেললে ।
ইমা ইমা বাবা বাবা পাহুরানি অকরলে,
কিতা কিতা চেইলু চেইলু হাবি হারপা নুয়ারলু।
২) নিত্তি দিন
বেনিগো নিকুলানির আগে,
ঘুমেত্ব উঠিয়া লগে লগে।
বামহাত বহিয়া জোড় হাতে ,
সাকতাহাত মাঠিয়া দওর নাঙ ধরে ধরে ।
পৃথিবী ইমার উরুক হাত আহিলে,
ভুল ক্রটি অপরাধ ক্ষমা করে করে।
আস্তা দিন হান ইমারে ডাহিয়া ,
কৃপা ও আশীর্বাদ কর বুলে বুলে।
যতি দিন জিংতা ইয়া আছু মি,
ততদিন নিংশিং ইতউ মি স্বরে স্বরে ।
উজ্জাছি ইমা বাবার চিরদিন নিংশিঙে ,
জীবনহান স্বার্থক অক ঘরে ঘরে।
জীবনএহান জীবনএহান চিন্তা করিয়া কিহান ইলু,
মানুর মানুর অতা চেয়া জীবনহান নষ্ট করলু ।
আরতা কিতা আরতা কিতা হাবিতা পাহুরলু,
বাকি দিন বাকি দিন নিজরে মাংকরলু।
৩) ব ন ক
কতিহান কঙালা নুংসী ইসেতা,
দেহিয়া আহানি অকরল কিসাদে আছততা।
কপাল হাত হুরুকাং টিপফোটা আগ, ঝলক্কো মিচ্চেলহান পরিল মোর আখিগ।
মোরে কতি চেইতো মিল্লেংহান দিয়া,
মি বারো লাজহানলো কিতা মাত্তু তেইরে দেহিয়া।
মুকছি দিয়া হারু ইয়া কিতা বুললো,
মোরে খানি খিয়াল থইচ আক্ষুলাগ আছুমি।
বিপদ আপদে মোরে চেইস মাতুরি মি,
কতি হারু অইলুতা তর দেহা পেয়া ।
সুখ দুঃখর য়ারি দিয়া পারতৌ বুলিয়া,
কতিহান বাছেয়া আছিলুতা তরে দেখতৌ মাতিয়া।
৪) ঔদিন
মঙ্গলবার র দিনহান আক্ষুলাগ মুঙেদে যিতেগা,
থারা নির লগে দেহা পেয়া মরে মাতলতা হবায়া আছততা।
তরে কালি হপনে দেকলুতা অহান মাতানি লাজপাউরিতা।
মি মাতলুতা সৃষ্টিকর্তা ই তর জীবনহান হবা অক মাতুরি।
চিন্তা করিয়া বিয়ান মাদান তর কথা খাল
করুরি,
কিহান করতু হারনাপেয়া নিংশিংইয়া বহিয়া থাউরি।
রাতি দিন হপনে দেখুরি মি তরে বারে বারে,
শেষ জীবনে দেহা দিস মোরে অন্তরে অন্তরে।
আর কয়দিন থাইতৌ মি এসংসারে,
তর কথা খালকরিস তি এ মানব মাঝারে।
৫) ফুল
ফুল ছাতছে, গতগো লুকুলেছে।
ভ্রমরার গুনগুনে, মানুর মনে।।
ফুলর নাঙর জাতে, আমার ঘরর মাঝে।
নিক্কাদিনর হারৌর রঙে।।
ফুল ছিরানির ফাঁকে, আঁধার রাতির ঝাকে।
মনহান গেলগা তানুর লগে।।
ফুলর নুংসি গতে, মন চরকরলো ।
চেয়া থাইলু তর বারাদে।।
ফুলর সাদে নাঙ কর হাবির বানার সঙকর।
তারেই মরেই মনহানরে কাতকর।
৬) বেলির মিঙাল
রাতি ফুয়েইল দিনহান ঙালইল, ছাতইল আবকচা ফুল।
ফরদোইয়া পাখা, নীল রঙর পতাকা, জুটিল ভ্রমরারকুল।
মুঙরদিকে নুয়া কঙালার, লগে,
কাহিল বেনিগো মুঙে াা
ঽ নার রঙেকাহিল, নূয়া বেলি,
চেইতে অতি হবালাগের।
মুরগো তুলিয়া বারো, ছৌ কতগো, ছড়াহানদে ঝিতায়াগা।
ঠেংহানলো ছিটিয়া, পানির হাদিত
হাতুরিয়া খানি আগ্ুইতারা।
এসময়েহাত, খেলাধূলা এরাদিয়া
লেরিকহাত মনহান দিলে।
মাদানেতে আনন্দেতে, থাইতায় ছৌ হাবির মনে।
৭) মোরগাঙ
আমার ঽরু গাঙেএহাত ঽরুকাং ঽরুকাং ঘর।
মিলিয়া মিছিয়া থারাং হাবিয়ে আকগৌ নাগয় পর। ।
গাঙর হাবি ছৌএতা বেয়ক, বনক মিলিয়া আছিতা।
আকসাদে খেলিয়ার বারো শিক্ষাঙ্গনে যিয়ারগাতা।।
আমার ঽরুকাং গাংএহাম ইমার সমানহান।
মিঙালদিয়া বৌহানদিয়া জিংতা করের প্রানহান।।
ক্ষেতি বুঝিয়া ধান বারো, পানি বুঝা পঽরী।
রাতি জোনাকর মিঙালে করের ঝলক মলকী।।
বিয়ানে ঽনার বেলি কাহের মুংহানাদে।
পাহিয়া পলির ডাকে
বৌহানদের নানান ফুলর জাতে।।
উঠ হাবি ছৌ, মেইথংধৈ, ফিজেত হাবিয়ে পিদেয়।
নিজর লেরিকে হাবিয়ে মন হান দেয়।।
হাবিয়ে মিলিয়া করতাঙায় কাম বারো ডাঙর অইতয় গাঙ।
কুড়িয়া অইলে ধন, মান হা্ব্বি অয়তই মা্ং।।
৮)ফটক
ছবিউতা ছবিউতা, কারতা তি মাততা,
হবাহবা য়ারি, কুঙগই তরে মাতলাতা।
রুপা রুপা মাসে ,না থাইল পিছে,
মিছা মিছা রসে, মনহান তা দেসে।
কিতা কিতা করের, মাতানি তে মুয়ারের।
নাগয় নাগয় যেতা য়ারি উতা দের,
নিক্কা নিক্কা বাপক, পুতক কামে আহক।
দিনে দিনে মালক,ঝিলকে মাতলো মরক,
মানুর মানুর ফটক চেয়া দিনহান কাটক,
নিজর নিজর কাম কাজ বেলেয়া মানুর তালো থাক।
৯ ) পূজা
কিতালো দিতউ পূজা ভগবান,
মি,তরে কিতালো
পূজাদিতউ ভগবান।
মরতা বুলিয়া হরি নেই কিত্তাউ আরতা,
হাবিতা তর দান হরি হাবিতা তর দান
কিতাল পূজা দিতউ ভগবান মি, তরে কিতাল পূজা দিতউ ভগবান।
মন্দিরগৌ তি মুরতিগৌ তি ভগবানলো অর ভগবানর পূজা,
মানিয়া নামানের নুয়ারতেই অপমান।
কোন দিনউ তোর রুপ না দেহেছু হরি
আপন মন্দিরে মি, তরে ভজুরি।
আহর কিবা কাদর হারপা নুয়ারুরি,
উতায়া কাদের মোর প্রাণহান হরি।
কিতাল দিতউ পূজা ভগবান,
মি তরে কিতাল দিতউ পূজা ভগবান।
আরতি
মনহান ঢালা যেগ পূজা করের উগ,
কতযে মুরলি হাবি খেলার এ দ্বিয়গী।।
১০) পথগর মা ।
ঘরেত্ব নুকুল্লু মাহিতে,
থামিয়া কানানাইতয়।
টেঙারাগর বরাফ গলিয়া,
মরাং নাচলতয়।
মুঙেদে আগুয়াছু মি,
ডর না পাউরী বৌ বরনে।
রুপা নেয়ক সম্বল নেয়ক,
চলিয়া যিতউগা মোর মনে।
উপাস থায়া আটতউ মি, কিত্তারকা না ঠেকতও।
মনর কথা লুকেয়া থয়া, শক্রগরে না ডরেইতৌ।
বিধক কাঁটা ফুটক পাথর,
তবুও মি আটতউ।
নাগই মানুর স্বর্গ হানরে, হাবিয়ে মিলিয়া লুটতাঙায়,
জোনাকরমা কিতা আছে চেয়তাঙাই,
ঠেলাদিয়া তানুরে,
বেলিগত গিয়া ঠেকতাঙায়।
১১) আকাল
লয় অছে প্রলয় অইতই,
উহান কুঙ্গই থামা পারতয়।।
বেলিহান নুকুলতৈ রাতিফুয়েইতই।
রিতিহান হিসাবে, বন্ধ নাইতয়।।
জরম দেনা মরন অনা।
এহান বারো যুগে আছেতানা।।
নিয়াম বুঝের মাতে নারের।
হবা য়ারি বেলেই বুলের।।
কালর কথা ঘটেরএতা।
লেংকরোছি কিতা অয়া যারগাতা।।
গুলা নাহেছিল পানি নেয়ছিল।
কতিগয় বারো কিহান অয়তয় মাতেছিলা।।
১২)ছৌ ছুমারা।
কনাক অছে বুলিয়া, ইমায় মাতলো
বুদ্ধি অছে উতা থয়লো।
বাবা বুলিয়া ডাকলো, হারৌ হানে মরলো,
দরকারীউতা নাকরুইলো।
কাদার ঘরর মৌ,উতা রাতিপেয়া বুলতারাতা,
হেয়কে মাতলে ঠারেইরিতা।
ছৌ, গয় হুনলো, মৌতুপ ধরলো,
নানান ঠার অকরলো.
ইসকুলে লগেযানা, অন্য জেলেইর লগে থানা,
কিতাকিতি লয়া খানা।
হুনিয়া আইলি যেতামেতা, হৌরিয়লরে মাতিরিউতা,
নাগয় ঠারর ফুল বানেইলতা ।
নুয়া ভাষা হিকলো নানান বুদ্ধি খালকরলো,
ছৌগিরেলো খেয়নির চিন্তা করলো।
সাবধান অয়া ডাঙর অয় হাবি কথা নালৈ,
সময় থাইতে হবাতা হিকেই।
১৩) ডাঙরিয়াগ
নিজরে নিজে ডাঙরিয়াগ বুলিয়া কানা নায়তই।
মানুয়ে যেগরে ডাঙরিয়াগ বুলতায় উগয় ডাঙরগো অয়তই।
ডাঙর অনা সংসার
এহানাত অতি সামান্যহান নাগয়।
সংসারে যেগ ডাঙরিয়াগো নিয়াম গুন যেগর।
গুনহানলো যেগ ডাঙর বুলতারা উগয় ডাঙরগো অর উগ।
ডাঙরগ যদি অনা মনেইলে হুরুকাং অনা হিক তবে।
১৪) লোহংহান
নিঙল বিছারলে, কথা লেপকরলে,
লোহংহান অতি সহজে করলো
নূয়া মুকছি দেখলে, হুসহান মাংকরলে,
মনহাত্ত্ব ছিরে নুয়ারলে।
আনতেগা হারু ইলে, বিপদহান নারগত বাধলে,
তেইর কথা খালকরিয়া থাইলে।
কতিউ বানা পেইলে, পুরানাতা বেললে,
এবাকাতে বিপদহান ডাহিয়া আনলে।
হাবিতা চিনিয়া লোহংকর কর, তেইরে কয়নাগ কর,
কিহান ইলে অহান খালকর।
হবাগো ইলে খুশি দিতয়, সাকতিগো ইলে বিপদ ডাকতই,
অল্প দিনে সংহারহান নষ্ট করতই।
ঘরগো চিনলো, মানুগো পটিল,
যেহান হাদা অহান মাতলো।
অন্য মানু হবা, পরিবারর উতা গাবা,
তিলে মাতলো কিতায়া আনলেগাগো।
সময় থাইতে চিন্তাকর মনর মানু লোহংকর,
সংসারহান উজ্জ্বল কর।
১৫) লেখনী
গাঙর মানু, শহরর বেনু,
আমি থাইলাং ভানু হনু।
লিখতারা নিয়াম, দিতারাকম,
মাতলে সৌয়ইতারা নিয়াম।
তানুর কলম, আমার নরম,
নিয়াম গুজুরলে অয়তারা গরম।
লিখানি হিকেছে, নিয়াম চালাকঅছে,
আংকরলে মাততয় ডিলছে।
অফিসে গেলুগা,
তারে মাতলুগা,
নিজর সইহান দিলুগা।
কিহান লিখলো, ম
রে নামতলো,
রাঙা আহুিলো ধমক দিলো।
সময় পেইলো, হাবিরে ঠকেইলো
তার গুনহান হারনাপেইলো।
১৬) দিনরগতি
বেলির মিঙাল জোনাকর লগে, রাতি দিন যুগর কালর লগে।
বরো মাহাতে চলের তার নিয়ম কামের,
উতার মা এবাকা ব্যাতিক্রমের।
তিন মাহার বরন, ক্ষেতিবারির কারন
চলেছে তাতে অনিয়ম।
পূজা পার্বনর স ময় হারৌ অয়ার দিনময়,
যেপেয়ৌ যিয়ারগা দলময়।
ঝারর সময় ধরিয়া গরম ফুতি ফালি লয়া,
ঘুমেত্ব উঠিয়ার অতি ডিলয়া।
বিয়া বিধির সময় খিয়াল করতারা মোহময়,
যুবক যুবতির মধুময়।
সময়ে অইল যেতা, অসময়ে চলের উতা,
মনুয়েতাই খিয়াল নাকরতারাতা।
কতিউ অইলা এসাদে মানু পরলা বিষাদে,
আরাকৌ পরতায় বিপদে।
গনার দিন আহিল এগদে, খানি খালকর ঘরেদে,
মনুর কথাই না চলিস এসাদে।
দিনহান কামে ব্যাস্ত থাক, রাতিহান খানি হজাক,
সময় হানরে খানি খিয়াল থাক।
১৭) পথগো
আমার গাঙ, আমার পথ
চেইতে অতি হবা।
আকা বাঁকা, মানুর রথ,
হাবি মানু চলতারা।
পথহান দেখিয়া, হা বির মনে,
খুশি থারাং কতি।
গাছ বৃক্ষ, অতি আছে,
ছায়া পারাং অহাত।
পিচরগজে, ইটর গজে,
এতা পারা দিনে।
হবা মানু, সাকতি মানু,
পথহান হাবির দরকার।
থাইতে পথ, মরলে পথ,
মাটিহান দিতে নেই মত।
মাটি যেতা, দেখর এতা,
তরতা নাগয়তা।
আহিতে হিংসা, যিতেগা হিংসা,
মরন কালর পথ।
১৮) পরীক্ষা
বছর গেলগা সময় আহিল,
ছাত্রছাত্রীর মনে মনে বিধিল,
তারিখ দেখিয়া
লেরিক চেয়া
দিনহান থাইলা বাছিয়া।
নুঙেই যেতা লেইলা লেইরা উতা
হাবির মনে আকতা।
গাড়ীত চড়িয়া পথহাত আটিয়া
আজিতে লিখতাঙাই বুলিয়া।
খাতা পেইলো কলম ধরলো
তামকরিছে অতা নাপেইলো।
দিনহান ঘুমিলো রাতি তামকরলো
মালকরে ঘুমানি নাতলো।
মনহান দিল প্রশ্ন হান চেইলো,
কিতা লিখতৌ পাহুরেবেল্ল।
কিতা লিখলো যেতা চেইলো,
কমন নাপরিছে বুললো।
মাষ্টর ধরলো পড়াহান নাহিকলো,
লমইতেগা দোষ দিল।
হবাকরে তামকর বারো ইকর,
পাশ ফেইল হাবি তর।
১৯) মলাট
বছর বছর মানুর ঘরে বারে
দিতারা নিয়াম করে করে।
আহের দিন ঠকা ঠকা মরে তারে।
এহান চলেছে নাঙে গা ঙে।
আজি দেকলু কালি মাতলু,
দিসগা চেয়া আহের বুলিয়া।
দলহান পেইলো ধনহানি আতেইলো,
হাাবিরে ঠকেইলো তারতা হংকরলো।
আনলগা যেতা নাবাগেইলো উতা,
স্বভাবহান উহান চিন্তার বিষয়হান।
২০) বুড়া
কনাক মানু ঘরে ঘরে, বয়স অর ধীরে ধীরে,
হাবি জাতির গাঙে গাঙে।
জরম অয়তারা দিনে দিনে, মরতারা ক্ষনে ক্ষনে,
কোনদিন যিতাঙাইগা ঝড়ে ঝড়ে ।
আাখিঁ দ্বিয়গি ছাকা ছাকা চুলগাছি পাকা পাকা,
বুঝনগো বুলতারা মেকা মেকা।
দাঁতর পাটিহানি ফাঁকা
ফাঁকা চাবানি মুয়ারের ব্যাথা ব্যাথা,
কানহানি বুথা বুথা।
চরনহানি বড়ি বড়ি কাকেই তুলতে মরি মরি,
আটানিহান ধরি ধরি।
ঘুমজিতেগা কেকা কেকা উঠতেগা মেকা মেকা
বুড়াবুড়ির মেলা মেলা।
বুজন বুজনি ঘরে থায়া থায়া ঈশ্বর নিংকর বয়া বয়া
যানা লাকতৈ চেয়া চেয়া।
নিংশিং অয়তাই মনে মনে্ কাঁদতায় কয়দিন ঘনে ঘনে
পাহুরানি অকরতায় তিলে তিলে।
বুড়া অয়লে মানুয়ে মানুয়ে বাছেইতায় তানুয়ে তানুয়ে,
মরে যাকগা বুলিয়া কানে কানে।
২১) ছুটি
আজি ছুটি, কালি ডিউটি,
এহান চলেছে।
ঘরে কাম, বারে মান,
উহানে সম্নান।
কতি মা নু, অতি জানু,
উহান তানু।
ঘরে আনন্দ, বারে নিরানন্দ,
হাবিয়ৌ সুরানন্দ।
দিনে কামে, রাতি ফামে,
খরচ চলেছে অকামে।
বন্ধর বারে, নিজর ঘরে,
মনদে খানিককরে।
অবসর অইলে, সময় পেইলে,
অন্তরগরে খানি জাগেইলে।
দিন লমইল ,সময় অইল,
করলেউতা নামা
ঙইল ।
২২) চাহা
খানা পিনা লগে চাহা,
চুহ্য, পেয়, লেয়, হাতা।
দিনে নিদ্রা বিবেক মুদ্রা,
ফুটি বহা, লেইরাং, গ্যাস,
মতৌ করলো, আদর দিল,
চাহালো সম্বোধন।
নাকরিচ নাহু নিচ,
কথাহান বিপদহান,
সুগার অসু ইনশুলিন লসু,
মধুরলো পিচ নুয়ারা
নাইচ।
২৩) নরম মাটি
বরন পরিল খানিপপারা সময়হান বাঃ।
বাছা কোনদিন
বারোয়া তেরোয়া বৌ।
কাল বৈশাখী ঝলক
কয়তে।
মানার আগে পরে
পাতানি আঃ।
জালুয়া, ক্ষেতাল
আকাশহান ছিঃ।
প্রানহান কিহানাত
খিয়াল করলেতা অঃ।
স্বর্গ মত্ত পাতাল তিনভূবন পানি
পেয়লেতা কিঃ।
নরম গরম বাঁচা মরা
তরতা কিতা হাঁঃ।
২৪) বছর
পনেরো কোটি দিয়া আনলুগা তারে, পাঁচ বছররকা কিতা করলতা।
মি মাতলু কতিঅউ কঠিন অছে।
পরিকল্পনা নেই নাচেয়া দরবার মোকদ্দমা করেছি হারনাপেয়া মরে নাদেহিয়া।
কতিঅউ চলতয় মানুর মাঝে হীনপেয়তাই মানু কালে কালে।
মি মাতুরি সময় আছে খিয়াল কর।
২৫) জাতর কৌলি
জেলেই মুনি দ্বিতা
হবা অইলে আকতা,
কিতা অছে মাততা।
বিয়ান অইলে ঘরে
মাধান নাইতে বাহিরে,
কিহান মাতলো তরে।
দেশভক্তি মানু যতি
হিনপেয়তারা তানু অতি,
কিহান করতো রাতি।
হেয়ক অয়লতাই রাজাগা
মৈলক থাচে মাদয়গা, ছৌগিহাবি অইলা যোগা।
ভাষাউতা মিলেয়া থাক
কৌলিলো নাকরি ঝাক,
হাবিঔ অয়তাঙাই মারামাক।
আমার গালি তুমার বুলি
মনুয়ে হুনলে অয়তাই বলি,
সমাজ হানাত লাকতয় কালি।
কতিয়ৌ হুনলাঙ য়ারি
যেতাঔ অক আমার পারি,
নাগয় উহান অছে জারি।
জাতর মাঝে দল না করিয়া
আমিয়ে তিয়ে মিলিয়া,
নিজর জাতর ভাষা মুঙে থয়া ।
হবার হপন দেহিয়া
মনর লগে মিলেয়া,
উন্নতি করিক আকতা অয়া।
২৬) কয়না বিছারানি
দেশে রাজ্যে গাঙে টাউনে,
নিঙল গাওরাপা আছি ঘনে।
লেরিক তামকরিছে তাতে,
মানুর লগে সমান অনা মিতে।
নিঙলগো যবর ব্যবহার হবাইছে,
তেরাদে মুকছি দিয়া মরে বুলাছে।
নিঙল যেতা মানুর ঘরে যিতায়গাতা,
মুনি ছৌ উতায় আনতায়গাতা।
লেরিক তামকরিয়া লেইছৌ নাহিকিয়া,
লোহংহান করতয় সাকতাহান চেয়া।
বিপদে পরিল ঘরে আনিয়া,
ইমা বাবার কথা না হুনিয়া।
বনকে মাতলে তেরাদে চেইলে, বেয়কে মাতলে ধমক দিলে।
কয়না দেখিয়া বিভোর নায়া,
গাঙর কয়না টাউনর ময়না অয়া।
কয়গইতে হারপাছি সংসারর লিলা,
দেকতে জেলা বিছারতে মেলা।
আমার গাঙে কয়না নেই,
দুরেইর উতা পিঠিয়েদে চেই।
দামানগরে মুঙে দেই,
সময় পেইলে মরে বাগেই।
২৭) হঠাৎ যদি
ঘরর কাদাত তেইর কহাগো,
বিয়ানতো উঠিয়া দেহুরিগো।
হিনাত আয়রি তেইরে চাউ রি,
ইশারা দিরি বুঝে নুয়ারুরি।
, কাদাত যিতেগা মরে মাতলো,
মরে দেহিয়া কিয়া আইলে বুললো।
আহিগিতে মরাঙ থইলে,
খানি বাছানিতে নুয়ারলে।
কালিতে গবরধন পূজা,
এলা দিতয় মর অজা।
মনর য়ারি দিতঔ তরে,
ইমাই দেকলে মারতয় মরে।
বৌজিয়ে দেকলে নাছৌয়ইচ, মর য়ারি দিলে নাবাগেইচ।
ইমায় আঙকরলে হায়,
মানুয়ে আঙকরলে নায়।
কালি হপনে তরে দেকলু,
আজি বিয়ানে মরে বুঝেইলু।
মেইথং দেহিয়া মুকছি দিয়া,
মরে বুলেইলো হবা পেয়া।
২৮) মুরগর গজে
হে মনুষ্য, পৃথিবীর মাঝে,
কিসাদে থাইতৌ মি গজে।
কিতা হারপাছু তানুর আগে,
তুলনা নার হাবির লগে।
পিতৃ মাতৃর চরন ছাড়া,
আহির পানি পরের ধারা।
বেদ, শাস্ত্র, যতৌ চাগা,
হাবির গজে ঈশ্বর পাগা।
বিদ্যা ,বুদ্ধি, মুরগত থদে,
ইমা বাবার সেবারী পাদে।
ধ্যান, ধর্ম, যতৌ তি কর,
মনে থয়া হৌনাবি ধর।
বন্ধু, বান্ধব, অভাবৌ নেয়,
হবা কথলো হাবিয়ৌ বেয়।
জ্ঞানী, গুনি, মানুয়ৌ চেয়,
ভজনর কথা খানি দেয়।
সাধক যেতা পুণ্য উতা,
ধনবান উতা মাত্তারা কিতা।
গুরু, শিষ্য, দেহিয়ার কতি,
মন ,প্রাণ, ঠিক করিক অতি।
আজি, কালি, মানুর মনে,
জ্বিগ লাগাছে দূরেইর বনে।
শিক্ষা, দীক্ষা, পেইলৌ মিতে,
অজ্ঞানে থাইলু হাবির গতে।
২৯) গর্জন
হুংকারে জগৎগন্য শিহরিয়া,
হজাক অয়া থানা লাকতৈ ছালয়া।
বাধা বিঘ্ন না মানিয়া মুরগো তুলিয়া,
অস্বিত্বরে রক্ষা করানি মনেয়া।
স্বার্থ রক্ষার চেষ্টা করতাঙায়,
হাবির হারৌর কা আমি চলতাঙায়।
খরশ্রুতা আহির মিল্লেঙে জনরোশ,
তুলিয়া ধরতাই,
জগৎহান জুড়িয়া আমারে চেয়তাই।
পাঙলাক কর আমারে হাবি তিলয়া,
শপথ করিক ফিরালহান গজে থয়া।
বংশিধ্বনীর সুরে আত্তিঙ্গাহান জিলকেয়া,
থতার বৌয়ে মেগালা ফাটেয়া।
আহিক বরনর ফুটার আগে অয়া,
নিজর সমাজর মানু মুঙে থয়া।
হাবি ছড়া মিলিয়া সাগরে মিলেরগা,
কিয়াতে বয়া আছত বেলির মিঙাল যারগা।
কুম্ভকর্ণর ঘুমর হাদিত বজ্রপাতে,
সহস্রবার,
অধিকারর ক্ষমতা আইতয় ততোবার।
কুক্ষনে সৃষ্টির বিচক্ষনে গর্জিয়াস,
ক্ষনস্থায়ী অয়া বিভূলা মনোরাশ।
পাংলাকর শক্তি পিছে থয়া মুক্তি,
চিকারির মহত্ব বিছারানির যুক্তি, ।
ভবিষ্যতর পাথেয়
মা…
৩০) পর্দার পিচহাত
লুকিয়া নাথায়, মুঙে আয়,
পিছে থায়া, ডরপুক নায়।
পাজালা মানু, কিহান ইলে জানু,
ঘরর পিছে, ছেয়াগো ভানু।
বাছিলু আবকচা, চেইলাং পচা,
তর ওয়ারি, হাবি গুয়ারী, মচা।
মাতলে মাতর, চেইলে কাতর,
উত্তর দিলে, মিছা কতর।
নিংশিঙ ইয়া, নিজে গিয়া,
হাবি মানুর, মঙ্গল দিয়া।
নিজে ডাঙর, মনুরাঙ, কাদর,
সময় থাইতে, পথগো ধর।
৩১) নুয়া মেইথঙ , নুয়া লালফাম
নবিনর জোয়ারে পুরানার যৌবনে,
লয়াগাঙ দেশে বিদেশে।
ঘুমিয়া থাইলে ইমার উরুকে,
অধিকার পানার সময় বিপাকে।
পথগো তর দূরেইত নাগয়,
মানুর গোলাত বাহক অয়তাঙায়গা জয়।
দূঃখর সাগরে বাহিয়া কিতায়া থায়তেই,
বৈচাল দিয়া বজ্রপাতর কথা মাতেই।
কুরুক্ষেত্রর বুকেত্ত পলিয়া থায়া,
কিহান করতেই আক্ষুলাগ গিয়া।
আগুয়িতারা তানু উদ্ধার করতায়,
লগে ঢেউ দিতারা যেসাদেঔ জিঙতায়।
কালর লগে তাল মিলিয়া,
দূরেইত আছি উতারে আনিয়া।
আদায় করানিতে লাকতয় বৌ, বুরুনি দিয়া,
লামতাঙায় মুঙে ডর নাপারাঙ গিয়া।
শিক্ষাবিধ শাস্ত্র বিধয় ডাকতারা,
রক্ষাকরিক হাবির স্বার্থ মাততারা।
জুড়েদিক হাবিয়ে একমনা অয়া,
না ছেচতাঙায় আমি আদায় নাকরিয়া।
পণ করতাঙায় পূর্ব পুরুষরে নিঙশিং ইয়া,
তানুর হপনরে স্বার্থক করিক মনহান দিয়া।
৩২) আহির পানি
হুনিক গিরিগীথানি, গাঙঘরর হিনপানি,
দিনে রাতিয়ে কাঁদতে কাঁদতে নেয়ইল আহির পানি।
কতিঔ হিন কতিঔ দুঃখ কিহান মাত্তু তরে,
জাতর নাঙর মান দেই হাবিরে।
আহিতারা কতি যিতারাগা অতি,
জরমর মাটি ভিটাত
হাবিয়ৌ নেয় মতি।
হবা অয়া আছিলাঙ ডর ভয় নেয়ছিলাঙ,
ঽদিগর ভিতরে জবর
মিলিয়া চলেছিলাঙ।
আকতা থাইলা হৌগদে,
কতগো আইলা এগদে।
মরনকালে দেহা নায়লাং,
রাষ্ট্র ভাগর এহান কারনে।
আহিক হাবিয়ান সময় থাইতে,
নিজর জাতর মিঙাল পেইতে।
৩৩) রথর পালির হারৌপা
আযাঢ় মাহার রথর পালি,
বরন দিয়া অছে পানি।
পয়লাকার দিনে অয়লাং হারৌ,
পিছেকার বারে নাগেলেগা য়ারৌ।
চলেছে এসাদে বছরর পর ঘটর,
রতহান আছুলতে গটর বারো বটর।
পতগর মাঝে রতহান সাজে,
মানু হারৌ অতি মজে।
রাতি দিনে প্রসাদ খেয়তেই,
হারৌর নাছা বেজান নাছতেয় ।
দশদিন পরে মরে নাপেয়তেই,
আইবো মারি দেহা দিতেয়।
বামুনে রাঁধিয়া দউরে কাতকরলো,
আরতিহান দিয়া বিলানি অকরলো।
ডাইল, সব্জি,, বড়া চিনচৌ, কয়তা,
সেবারিয়ে বিলেইতারা মেঠেল আরতাউ কিতা।
দউয়র মুঙে থাইলে কতিয়ৌ আনন্দ,
ঘরে আহিলে থারাঙ নিরানন্দ।
হাবিরে দেহিয়া ওয়ারি দিয়া,
খেইলাং মিলিয়াা পেট বুজিয়া।
জগরনাথর পূজা দেশ বিদেশে,
জরমর আগেত্ত এবাকাউ চলেছে।
জয়দেব দিয়া মালঠেপে নাছিয়া,
পারেঙ অয়া বয়লাং খানি হিনপেয়া।
খেচুরি খেয়া হুয়াত পেয়া,
আরাকৌ মাগের পাতাহান লেহিয়া।
হমা কাতকরলু প্রভূরে দেকলু,
হাবি মানুর মঙ্গল মাকলু।
৩৪) টাউন হলগো
চিঠি দিলা কালি,
মিটিঙ অয়তই আজি।
ডাঙর মানু আইলা,
চিয়ার জুরিয়া বয়লা।
কারেন্ট হান গেলগা,
মানু হাবিয়ৌ গা গা।
নাঙলো মাইকে ডাকলা,
ডায়েচে বয়লা।
তানুর সরকারি য়ারি দিলা,
আকগৈয়ৌ নাহুনলা।
আগরে আগয় চেয়লা,
কিত্তাউ নাহুনলা।
আগর পরে আগয় ভাষন দিলা,
হলগর মানুয়ে নাহারপেইলা।
গজর মানুর গজর কথা,
হাবিয়ে মাতলা আমি বুথা।
কথার গজে কথা মাতলা,
কথাগো মাহি হুনিয়া বিভুলা অয়লা।
মিষ্টি খেইলা চা পিলা,
নিজর অফিসে যাত্রা দিলা ।
৩৫) আপা বপা
আমার গাঙর,
তোমার নাঙর।
বুজন আছি,
আপাঙ অছি।
ক্ষেতি করলা,
ধান, পেইলা।
সজ্বি ফলেইলা,
ঘরে খেইলা।
খানজা হিচলো,
মাছ ধরলো।
কড়ি আছে,
পয়সা নেয়ছে।
কড়ির আনা,
রুপার পানা।
পিতলর পয়সা,
বিশ নয়াসা।
লেরিক নাচেইলা,
ডাকুলা হিকলা।
এলা দিলা,
গাঁঙ চালেইলা ।
চাকুরি নাকরলা,
মাতলে গালেইলা।
আলহান ধর,
ঘরে কাম কর।
লাঠির খেলা,
লাকাটির মেলা।
গেই পাললা,
ছেলকম খেইলা।
বলি অইলা,
দরবার নাকরলা।
মানুর কাম,
মাগানা বেলা ঘাম।
ধমক দিলা,
শাসন করলা।
বিচার করলা,
মানু বুঝেইলা।
পুলিশ নাইলা,
ঘরে লমকরলা।
ছনলো ছানা,
বাহার বের দেনা।
গাঙে বুলানি,
শাস্ত্র হিকানি।
মালঠেপে যানা,
প্রসাদ খানা।
মেয়থঙে নামছা,
পিদের গামছা।
কুমেইত যারগা,
পুঙল্লেল চারগা।
খুচেই নেরগা,
পানি পিয়েরগা।
বদলিল এবাকা,
নাগয়তালো বেকা।
৩৬) হুরুকাঙ ভাঙর
আমার দেশর মানু,
অন্য দেশে ডরেইতারা তানু।
জাতর সংখ্যা নিয়াম,
নানানতা করতারা কাম।
আমার সাদে ঘরে বয়া,
কুড়িয়া মানু ঘরে থয়া।
কামে কাজে নাউ গেলগা,
বাপক মালকর সম্পত্তি বেচলগা।
ডাঙর জাতর মানু বুলিয়া,
নাগয় কাম নাকরতয় মাতিয়া।
ঘরে রাধাঁনির চউল নেয়,
মানুয়ে হঙকরেছি উতা খাদেয়।
নিজর জাতহান নিজে চিনেই,
মানুরতালো ঘরগো নাবুঝেই।
নিজর কাম নিজে করেই,
অন্যতার উতা দূরেইত থদেই।
নিজে হংকরিয়া চেঙি হিনেয়,
সেম্পুকিতা উরা বেলেয়।
তরমর রুপা তানু নিয়া,
দেশর মানুরে ফকির করিয়া।
লেরিক পাকরেছি বুলিয়া,
কাম নাকরের ঘরে থায়া।
ডাঙর হুরকাঙ নাবিছারেই,
নিজর ভবিষ্যৎ খিয়াল করেই।
৩৭) হপনর য়ারি
ঘুমর হাদিত অঞ্জান অয়া,
থাইতেয় কয়দিন মরে বেলেয়া।
চতুরদিকে আহি জিপেয়া,
ফামহাত তিতে পড়িয়া থায়া।
মুরগত চিন্তানেয়া কিহান করর,
নিজে তরতা মাতে নুয়ারর।
পিসারির পানি হুকেছে,
মাছগো মাহির হাদিত রৌগ নুকুলেছে।
ধরানি মনেয়া লামে নুয়ারলু,
দেহিয়া মনহান জারে পারলু।
বাঁধগোর তলে সুরুঙ্গ অয়া,
ঔহান দেহিয়া মনহান নাছৌয়য়া।
ঘুমেত্ত উঠিয়া হজাক অয়া,
কিত্তাউ নাদেকলু ফা মে বয়া ।
টেইপাঙে তরতা কিহান অইলতা,
উতা দেহিয়া কামা নাইলতা ।
সময় থাইতে খিয়াল কর,
হপনর য়ারিলো চিন্তাই নামর।
৩৮) হাবির মানা
ইমা ইন্দলর গতি,
কিহান মাত্তু অতি।
গোপনে থয়া মোরে,
হারপাছু মি তরে।
তিয়ে মিয়ে হারপাছি,
হাবি মানুয়ে নাপাছি।
ইমার রূপে জরম অয়া,
গৌহাটি কামাখ্যাত থায়া।
ত্রিভূবন বিজয়ী ইমা,
জগৎ এহার মানুরমা।
অনন্তকাল জুড়িয়া,
পালন করতাই মানা বুলিয়া।
যেদিনেত্ত পূর্ণ শলা, বন্ধ থইতারা মাটি খূলা।
লাখো দর্শক আহিতারা,
পূজা, দর্শন করতারা।
কামসিন্দুর পেইতাঙায় বুলিয়া, কতিয়ৌ সাধু সন্যাসি মিলিয়া।
প্রসিদ্ধ মাতিয়া আক্ষা দিয়া,
তপস্যা করতারা মরানি পেয়া।
দউয়র পার্বন নিংশিঙ অয়া,
পালন করিক হাবিরে বাগেয়া।
৩৯) আনাযানা
বছর আহান পরে,
দেহা পেইলু তারে।
আহির পানি বেলেয়া,
মোরে মাতলো চেয়া।
তি কতিয়ৌ নুঙেয়,
মি কিহান অছু হুনেয়।
হাবির লগে কথা দিয়া,
থাইলু। মিতে ঘরে বয়া।
কামেধুমে মত্ত অয়া,
কালিকার কথা পাহুরিয়া।
নুয়ারর কতি ভাষা মুক্তি,
লিখর তিতে নানা উক্তি।
শাস্ত্রর অর্থ উরা বেল্লে,
ভূল যেতা লিখিয়া থয়লে।
এলা হিকিয়া গায়ক অছি,
নাগয়তা লিখিয়া কবি নাছি ।
অর্থ হারা কথা। নাগয়,
বাক্য সারা শব্দ কিগয়।
মিছা কথার যুক্তি নেই,
উগরে এতাত্ত বিদায় দেই।
আনার কথা পাহুরিয়া,
নাগয়তালো মত্ত অয়া,।
যানার সময় কলঙ্ক থয়া।
সমাজর মানুরে কিতা দেহর,
নিজর জাতর ক্ষতি করর।
মনর কথা বিবেক করিয়া,
মানুরে মাতিস ভূল ধরিয়া।
নিয়াম দিনএসাদে অইলে,
মি না এড়াইতৌ তরে পেইলে।
সময় থাইতে চিন্তা কর,
লাজপানির আগে লগ ধর।
৪০) মুঙর গুরুর ছাঙগো
মুঙর ছাঙগত গুরুর ঘরগো,
পিঠিত হাবির বারো মোরগো।
গুরুয়েতা পালিয়ার হাবিয়ে,
গবর ছাড়া ছেঙ নায়ার আমিয়ে।
উঠান হুরিয়া গবর ছিটেয়া,
পালয়া আছি সমাজ ধরিয়া।
গুরুর মুত লেইসৌর শ্রুত,
হাবি দাপদিতায় বেলেয়া জোত।
হৌপাত ফলেইতে গবর দিতেই,
উঠান হুরিয়া উতা ছিটেইতেয়।
নূয়ারাপানি দূরেই করতেয়,
হবাকরে মিয়ার ফলেয়তেই।
সারর হৌপাত লয়া খেইতেয়,
বছরগো তি নুয়ারায় ভূগতেই।
গুরুমাহি নেই পরিবার উহান,
হাবিত্ত হুরকাং সমাজ এহান।
উঠানে ছিটইলে যতি,
পক মাকর নেয়ইতায় অতি।
নিয়াম করে পালিক হাবিয়ে,
খেইতাঙায় নিক্কা ছেলকমে ঘিয়ে।
ছৌ দিতয় বছর বছরে,
ছাঙগি বুচতৈ ঘর ঘরে।
ছেলকম খেয়া বলি অয়তেই,
বেচলে রুপার অভাব নায়তেই।
গুরুগ ছাড়া গতি নেয়,
হাবির ঘরে পালে দেয় । থাইতৌ গুরুর উপকার,
মরতেঔ তানুর দরকার।
প্রাণী বুলিয়া হেলা নাকরিচ,
প্রতি বেশিরে উৎসাহ দিচ।
৪১) কাঙর দিনে
মালঠেপে যিতৌগা বুলিয়া,
বাছেয়া আছু তরে চেয়া ।
যানার সময় মোরে নাডাকলে,
দিনে রাতিয়ে কতি বিছারতু,
তরে নায়া কিসাদে থাইতু।
আগে মাতলে তি আয়তেই,
পিছেদে বারো মোরে পাহুরতেই। আশা দিয়া নিরাশা করলে,
মানুর য়ারি কিয়া হুনলে।
কতিঔ ঠকেইতেয় তিতে,
পিছেদে না বিছারেইচ মরতে।
কাঙর কথা নিঙশিং অইচ,
মোর কথা মনে থইচ।
৪২) বেধর্মী
কালর গতি চলতয় যতি,
আমি নাপাহুরতাঙায় অতি।
পূর্ব পুরুষ আমার জাতি,
খানা পিনাত বাছলা কতি।
নিজর জাতহান রক্ষা করানি,
অন্য মানুর রাঁধাপুরা নাহানি।
দেশহান হাবি বেহুষ অছি,
আমার উতা উরা বেলাছি।
চারিযোগে ক্ষত্রিয় উতা,
হাবির গজর জাতহান অহিতা।
কুরুক্ষেত্র যুদ্ধ লময়া,
বৈষ্ণব ধর্ম ধারন করিয়া।
কাঠি নকুন নামছা পিদিয়া,
মালঠেপে দৌ থয়া।
বি্ষ্ণু অংশ বুলিয়া কথিত,
মনিময় পালয়া শাস্ত্রীয় জ্ঞাত।
তপস্যা করিয়া এযুগ হান,
অন্যতায় ধরেছি তানুর হান।
ধর্ম কর্ম হাবিতা বেলেয়া,
মানুরতা চেয়া নাগয়তা করিয়া।
লেইরা নুঙেই কিতা উতা,
নিক্কা লতাপাতা চউল বিছারতারা যেতা।
রুপা পয়সা ধন সম্পত্তি,
কিত্তাউ নানতেইগা নিজর উৎপত্তি।
অচিনা বৌহান ধরিয়া কয়দিন,
নাবাগেয়া যিতৈগা তরাংতো যেদিন।
জীবন যৌবন স্থায়ী কিতা,
পৃথিবী ইমার উরুকে মিতা।
খানিপ্পা…
৪৩) অঙ্ক আগো
আকদিন নুয়ারা অয়া থায়লু ফামহানাত,
পিছেকার দিনে ডাক্ততরখানাত।
তিনদিনর দিনউহান ইনজেকশন আগো,
চারিদিনর দিনউহান খানি আলয়া ভাত মাগো।
পাঁচদিনর দিনউহান হিনানিরকা পানি গরম,
ছয়দিনর দিনউহান হজক লমইলে নরম।
সাতদিনর উদিন সেলাইন আগ মারলো,
আট দিনর উদিন বালা অয়তেয় বুললো।
নয়দিনর দিন উহান রতর পালি লয়ইল,
দশ দিনর উদিন জগন্নাতর শয়ন অইল।
আয়তারা যতিগো যিতারাগা অতিগো,
তার আধা তার পাই
তরেলো একশ পুরায়।
সংখ্যাউগ কতি, মোরে মাত অতি।
৪৪) লিখা পড়া
সপ্তর্ষি ইস্কুল লালয়া ছাত্র,
কতি হিন বাপক মালক মাত্র।
রাতি দিন ঘুম এরাদিয়া,
খানাপিনা ফিজেত বেলেয়া।
হারৌ পিয়ম দূরেইত থয়া ,
লেরিক তামকরলা মনহান দিয়া।
কিন্ডারগার্টেন লালয়া গেলাগা,
ছয় বছর অনার লগে পয়লা অইলগা।
বুনিয়াদী লময়া বারো উচ্চ গিয়া,
দশম পরে দ্বাদশ মানে আয়া।
মহা বিঃ এড়াদিয়া ঘরেথায়া।
বিশ্ব বিঃ দ্বিবছর লমকরিয়া,
ঘরে বহিলা শিক্ষা লয়া।
ঘরর মানু ফকির অইলা,
কিহান অর চেয়া মুরে আত দিলা।
গেলগা বয়স যারগা যৌবন,
কামর সময় চেয়া বয়া জীবন।
কয়দিন বছর এসাদে চলতয়,
সমাজর মনর আশা পুরতয় ।
৪৫) ধূপধুনা দেনা
বেলির আগে ঘুমেত্ত্ব উঠিয়া,
উঠান ঘর মক্ষিকরে হুরিয়া।
ঘরগো লেপিয়া কল দারেয়া,
ইমা লক্ষ্মী দেবীরে নিঙশিং অয়া।
গবরলো উঠান ঘর ছিটেয়া,
হিনেয়া তুলসি চয়ন লমকরিয়া।
ইমার চরনে ফুল কাতকরিয়া,
সুখ শান্তি মাগিয়া ভক্তি মানিয়া।
দুঃখ দুর্দশা পাপ দূরেই করেদিয়া,
ডাহুরি মি তরে অন্তরগো ইয়ৌয়া।
কোরাঙ আছত তি দয়াবতী,
কিসাদে তরে পেয়তৌ করুরি মিনতি।
বিদ্যা বুদ্ধি শক্তি নেই মতিগতি,
কিসাদে তরে পেয়তৌ নাজানু ভক্তি স্তুতি।
মনে ভরসা আছে তি দয়াময়ি ,
কৃপা করেদে হাবিরে ডাহিয়ার বিনয়ী।
লক্ষ্মী নারায়নর যে ঘরে পূজা,
বৈকুণ্ঠ ধামে যিতারাগা সুজা।
নিক্কা সময়ে ধূপ ধুনালো সেবা দেয়,
লেইরাপা নুয়ারা ব্যাধি দূরেই করেদেয়।
ইমা লক্ষ্মীর কৃপায় সমাজে,
শান্তি সমৃদ্ধি থাইতয় আমার গজে।
৪৬) মারই মশলা
দূরেইর বাজারর মারই,
আমার তর ঘরে বুজই।
কতিঔ লয়তু দোকান দাররে দিতু,
মারই মাপাং ছারা কিসাদে চলতু।
মিয়াংপা অওয়ার ফাতিকম,
পদিনার পাতা তকপানিকম।
ফাকপয় ফাতিকম লাগা ঘরে,
তেইহুয়েহুর ঝোল খেইলে কৃমি মরে।
নেন্নামর ছক ডাইলে দিলে,
ভাতর বকহান লাকতয় অকালে।
মশলা ছারা হৌ হুয়াত নার,
উহানর কারনে মারই মাপাঙ ঘরে দরকার।
বাজারর মশালা উরা বেলা,
আমার খানার মশালা ঘরে মেলা।
৪৭) পৃথিবী ইমা
যেবাকা মি বাবার মুরগত আসিলু ,
কিসাদে ইয়া মি ইমার গর্ভে গেলুগা।
দিন ইল ,রাতি ইল, সময় ইল ,পৃথিবী ইমার উরুকে আহিলু,
আখি মেলিলু ইমা বাবা চিনানি অকরলু।
বুদ্ধি ইল জ্ঞান ইল আহানি কাঁদানি হাবিতা পারলু,
লিখানি তামকরানি হিকলু।
ভাঙর ইলু কথাবার্তা জানলু ,
পৃথিবী ইমারে পাহুরিয়া থাইলু।
চন্দ্র সূর্য সাক্ষি থয়া মরানির আগে পণ করলু,
ইমা বাবার সেবা করাত মি লাগলু ।
