কৌয়ার বাঘগো -মধু মঙ্গল সিনহা

(হুরকাং য়ারি)

************

১৯৯৭ ইংরেজিত মি যেবাকা এম.বি.বি. কলেজে পাকরলু ঔসময়কার য়ারিহান।আগরতলার ড্রপগেইটে টিল্লা আগর গজে বাহার তরজার ঘরাগত মি আক্ষালাগ আছিলু।বারো উপেইত্ত খানিপ্পা দূরেইত মোর জেঠাবার ঘরে বিয়ান বেলুকা খেইলুগা।মোর ঔপেইৎ রাদা পুড়ার কোন ব্য বস্থা নেয়ছিল।আক্ষুরুম বাক্কা চারি পাঁচ দিন ধরিয়া মোর জেঠাবাগাছি ঘরে নেয়ছিলা তানু দরকারি কামে ধর্মনগরে গেছিগালাতা।মি আক্ষালাগ‌ই টিউশনি ল‌ইকরিয়া রাদা পুড়া করিয়া খেয়া কলেজে যানা য়াম হিনছিল।হানতে ইমে আকদিন রাদিয়া দ্বি দিন তিন দিন খানার হৎন্না করলু, ঔসময় ফ্রিজ নেয়ছিল হানতে য়াম হিনইলতা।উতার মাঝে আকদিন রাতিহান য়াম ডিল‌ইল টিউশন ল‌ইকরিয়া ঘরে আইতে।দশটার ভিতরে ছাত্র বাগাদিয়া লয়‌ইলেউ বরন আহান চুঙগল ডালিয়া দের;কমতই বুলতেউ না কমের।বাছেইতে বাছেইতে রাতি এগারটার উগদে খানিআহান কম‌লে উপেইত ইমে পিচি পিচি বরনহানাত তিঙে তিঙে ঘরেদে আল‌ইলু।

পথর স্ট্রিট লাইট উতা কোন পেই জ্বলেছে কোন পেই নাঔ জ্বলেছে।আঁধার ইঙালে আক্ষালাগ‌ই তিঙে তিঙে ছালৈলু ঘরে। মেইন পথগ বেলেইয়া মোর ঘরেদে বুলন দিতেই পিঠিয়েদে ছপ্ ছপ্ আওয়াজ আহান হুনতেই গারিগত ডর আহান হমেইয়া ঠ‌ই মাহী চুঅইল পারা।মি আছু ঘর উগর কাদার কোয়ার্টার উগত বিহারী পুলিশ আগ পরিবার‌লো থারগ।ঔ পুলিশ উগর হালাক তিন দিন আগে ড্রেইনহানাত পড়িয়া দৌ অছিল বারো ঔ গিরক উগ অপমৃত্যুগগ হানতে রাতি নুকুলের বুলিয়া হাবিঔ ডরেইতারা।যে ড্রেইনহানাত পড়িয়া গরিক‌উগ দৌ অছে উহান লাল‌ইয়া মোরতাউ যানি লাগত‌ইহান্তে ডরহান।হাবিত্ত ডাঙর য়ারিহান ঐলতা ঔ ড্রেইন উহানাৎ কোন পুল বা লুক বাহা কিত্তাউ নেই-ইমে ডিগ্গল বাহা আগ ড্রেইনহানাত গারিয়া থসি ঔগত ধরিয়া ফালদিয়া নিক্কা মরতা খঙ এহান লালনি লাগেরগো।নাইলেউ আট নয় আত লুঅয়া চাইর আতর দেখি চ্যা পটা ঐত‌ই ড্রেইন এহান।বেতাল অইয়া বুকগত পড়লে জিঙতাঅনির কোন বাট নেই।

খানাপিনার আশা এরেদিয়া ঔরাতি সোজা সাল‌সুতা মোর থানির ঘর‌উগত। ডরহানে গারিগ কাটা-কাটা অছে।মনে মনে দৌ ছলকরিয়া নিক্কাকার ডেকি বাহাগত ভরহান দিয়া ফালদিয়া ড্রেইনহান লাল‌ইলু।লাইটগ লাগেইয়া বরনে আধাকাছা তিঙা ফুতিফালি ছিলকরিয়া হাফপেন্ট আহান পিদলু।পানি গলাস আহান পিয়া মিকুপহানাত ফামহানাত ডিঘলগ অয়া পড়লু।নিক্কা লাইটগ নিভেইলেউ উদিন আর না নিভেইলু।দিন এহানর দাপদাফালদি কলেজে জানা টিউশনি করানি এতার হিনে গারিগ মিকুপহানাত অবশ ঐলপারা।

আনিং ছানিং ঘুমআহান লাগেছে ঔ হাদিত হুনৌরিতা মোরে নিঙল আগই ডাখিরি,"ও মধুদা। ও মধুদা "বুলিয়া।গারিগ বারো কাটা কাটা ঐল মিকুপহানাত-বিহারি উগর প্রেতাত্মাগ বুলিয়া।মোর ঘুমহান আক্ষুরুমে ফরদিল পারা-মাততে মাততে নূপুরর রৌ আহান হুনানি অকরলু।মোর আক্ষালাগ থানার ঘরউর কাদাঅয়া আহের তাপকরে।মি মনে মনে,।"হরে কৃষ্ণ হরে কৃষ্ণ" বুলিয়া দৌ ছলকরানি অকরলু।এ বরনর রাতি প্রায় বারোবাজিত কুঙ নিঙলগ মোরে বিছারেয়া আইতইগো- সইনেই হৌগই মোরে মারানিরকা ছলনা করিয়া নিঙলগো মালইয়া আইরিতা।

হুনতে হুনতে নূপুরর রৌ উহান মোর দুয়ারহানাৎ ফৌয়লগা-মি ফামহানার মাঠাহান কারিয়া মুরেগারে দিয়া দরাগ অইয়া থাইলু।এখুরুমতে মি কৃষ্ণনাঙৌ পাহুরেছু।নিঙলউগ মোর দুয়ার হানাৎ ডম্ ডম্ বারানি অকরল-এবেদে মোর ইয়াহান সেক্ সেক্ করানি অকরলো। মাতলেতে বাহার দুয়ারহাননাই ইমে দ্বিবারি না লাগিল বেন্দাগ ফকইয়া ঠলঙকো পরিলগা।নিঙল উগ তাপক তাপক মোর কাদাৎ আইয়া বারো মোরে ডাহানি অকরলো-সুরগ চিনাগো মালছে তবু বিশ্বাস করে নইলু।মোরতা কোন জবাব নেই মরাগো মালছু।মি উড়েছিলু মাঠা উহান আহুলিয়া সেচাদিয়া-শৌঅয়া নিঙসাগ ফো-ফো করিয়া মাতিরি,"মানুরে বানাপানা ঠিক নেই।অত্তামিন ডাহুরিহানতে জবাব আহানৌ দেনে হুনাগিরকদ"দ-খা"-বুলিয়া ইনাফিহানলো খৌগ হঙকরেছে উগত্ত এক দুই বুলিয়া ছয়হান রুটি নিকাল্ল লগে লঙচাকে বেইনঙে বাজি আহান স্টিলর বাটা আগত বরেইয়া আনেছে।এত্তামিন ঘটনা অনির পরে এব্বাকা মোর গারিএগ সিয়াঔ করিয়া ডরহান বাগিল পারা।মি নিজে নিজে য়াম লাজপেইলু।

বারো লাজহান কাপানিরকা মাতলু-

"ওহ্ মিতে ভাতৌ খেয়া আইলুগহে।তি বারো এতা কিয়াকা আনলেতা;নাঔ বাগেইয়া।" য়াম শৌঅইয়া মরে দমকহানর দেকি দিয়া মাতলো "মি হারপাছু তি কিত্তাউ নাখাছত, বাহানা নাকরি।" উতা বুলিয়া মোর কাঁচর গ্লাস উগত ফিল্টারগত্ত পানিলইয়া টেবিলহানাত থইল।ঔ মিকুপ উহানাৎ ওয়াল ঘড়িহানাত বারোটা বাজিয়া ডং ডং রহানি অকরলো।

টিল্লাগর তলে ড্রেইনহার হৌপারেত্ব নিঙল এগর ববাকে ডাহানি অকরলো।"মনা-মনা"! এখুরুম এরে নিঙল‌এগ আত্ম সন্তুস্টির মুকশী আহান দিয়া "গুড নাইট" বুলিয়া বেলেইয়া গেলিগা। কিয়া কিগুইজানে মিকুপহানাত মোর আঁখি দ্ধিয়গি পানিয়ে বুজিয়া গালগি বায়া টপটপ পড়িল।বারো মোর মনে এ সরল নিঙল এগ‌ই চিরদিনরকা প্রশ্নখানি থদিয়া গেলিগা-ঔ রাতি উহান মি আর গুমজা নারলু তবে আরাক আক্ষুরুম ঔ ভূত উগরে নিঙশিংঔ নাসু।

বারেবারে খালকরাত লাগলু "মনা"ই কিসাদে হারপেইলতা মি ভাত নাখেয়া পানি পিয়া গুমজাছু এহান।আহান দুহান কথা‌ ঐলেও "মনা" কোনদিন টিল্লাগর গজর ঘর‌ এগত নাহেসে-ঔদিন কোন সাহসে এতাপারা ড্রেইন এহান আক্ষলাই ফালদিয়া লাল‌ইয়া মোরকা রুটিলো আইলিতা বারো কিসাদে আল‌ইয়া গেলিগাতা।ঔদিন তেই হুদালা মোরকা রুটি হংকরেছিলিতা না তানু হাবিঔ রাতিউহান রুটি খেয়া গুমজাছিলাতা-এসাদে কতোহান প্রশ্ন যেতার উত্তর মি এবাকাও নাপাছু।উহানত্ত ডাঙর য়ারিহান অইলতা ঔ প্রশ্ন আঙকরানির সাহস মোরতা এবাকাউ জরম নাছেতা কিয়া?

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

-নাঙহান?

-সুরধ্বনি সিংহ

-বয়স?

-তিন কুড়িতিন।

-হাই,এপাগা মাত কিহান সমস্যাহান?

-সমস্যাতে আবকচা।নিজর দোষে নুয়ারা ইলে কিহান করানি।ইমারে কোন মতে বুঝানির উপায় নেই।একাদশী নাকরি বুল্লে নাহুনিরি। ঠান্ডা পানিন হিনিয়া পূজা পালি করিয়া, এহান নাইলে ওহান নুয়ারা পানি না জিরিরি।

-বাবা বুড়াইলুনাই আরতা কয়দিন জিঙতা ইতউতা।যতহান পারৌরি করানি লাগতই নাই।কুম্পাগা কিহান অর মাতে নুয়ারৌরি।

-দাদা, এবয়সে এসারে অনাহান স্বাভাবকহান।বপ চিন্তারতা কিত্তাউ নেই। মি হজক লিখে দিলু।নিয়ম মত হজক চলক।যত পারুরি সাবধানে থাইছ।পানি কাজি বপ না আতিছ।দেখলে নাই তর পিতকে কতিহান চিন্তা করেরতা তর সালে। আহোগা, আরাক আক্কুড়ি দিন পিছে আকমাউ আহিছ।

-ডাক্তর বাবু আহিকগা। এরে রুপাহানি থো।

সুরধ্বনি গিথানক মাহত নাইলেউ দ্বিদিন আকদিন যেসারেউ ডাক্তররাঙ যানা লাগের।গারিগর লগে তেইরতা মনহানৌ বাগপরিছেগা। আর আর মানুর দেখি তেইর জনমহানৌ হীন-দুক কম নেই।মনোর জোরে হাগথেলিয়া চলিরিগ।কনাকর কথা আহান তেই প্রায় নিঙশিঙ ইরি ।আক দিন বাপকে মালকরে শৌয়া মাতিছিলতা, “ মানুয়ে মুনি শৌর কাজে দৌরাঙ বর মাগতারা আমার মহারাণী বারো জেলা শৌ, জেলা শৌ বুলিয়া পাগল ইছিলি। নেগা এপাগাতে জেলা শৌগ পেইলে হানতে তর জিলকরে তি সামালা।মি কিত্তা আহান করে নুয়ারতৌ।নুন আনতে থৌ নেই এ অবস্থাত লহঙর খরচা কুঙ্গই দিতয়গো। তর বাপকে দিতয় থাঙ!

সুরধ্বনির মানক অগৌ জবরদস ইসিলিগ, হৌরিয়কে পেয়া ককাড়া করে নুয়ারিছেগ।হেয়কর কথাও মুকশী দিয়া দিয়া ফুরদুয়াছিলিগ।হেয়কে জবর অতারলে তেই মাতিছিলিতা, “মর জিলকর কাজে কাঠি লিকশই মি মোর বাপকর ঘরেত্ব আনিছুগ, তি তোর পিতকর চিন্তা কর’’।

সুরধ্বনি কিন্তু কোন দিনৌ মালকর অসারে করে নুয়ারিছে, অসারে সু্যোগৌ না পাছে।আগেকার দিনে এইট পাশ করানি অহানৌ ডাঙর কথাহান ইসিল।হয়তো তেই আরতাউ লেরিক তামকরে পারলৈস অকালে মানক দৌ ইলি হান্তে আরতা আগুয়া নারিয়া মুহির লেরিক তামকরানির হপন হান আধাকাঁচা ইল।যতদিন মানক আছিলি অতদিন বাপকে পিড়াপিড়ী কেরলেউ মানকর ইনাফিহার চুট্টিগত ধরিয়া দুঃখ অতা মনে নানিয়াছেগা, এপাগাতে কিত্তাউ আহান হুনলে আঁখির পানি আটকানুয়ারিরী।মানক দৌঅনার দ্বিবছরর ভিতরে বাপকে তার লেম্পালহাত্ত সুরধ্বনির বোঝা এহান লামাছিল।বরগো খানি বয়স ইলেও সরকারী চাকুরী করের মাস্টরগ, পৈলাকার কৈনাঅগ নেয়নিয়ে দ্বিতিয় লহঙহান ।জামাইগর সংসারে কোন জামেলা যন্ত্রনা নেই, মানক বাপক বুড়াবুড়ি নেই।লহঙর কথা হুনিয়া সুরধ্বনিয়ে বপ কাদারুহা করলে তেইর পিহনকে থতাহান বন্ধ করে দিয়া মাতিছিলিতা, ‘ইমা, না কাঁদি জেলাশৌএ বপ লেরিক না তামকরতারা।কিত্তাউ নেই, দৌয়ে দিয়া হবা বরগো পেইলাঙ। এপাগা তর বাপকর লেম্পালহাত্ত লামিয়া নিজর সংসার ধরগা।জেলা শৌর কাজে জামাইগর ঘর অগই আসল ঘরগ। যতৌ লেরিক তাম্পর তবু ভাতর ডেকগ খুপাঙ, খেরি দারানি এতাই লগহান না এরাদিতই’’।ইমে মালকর পুরানা ফটোহান কলকরিয়া কাঁদানি ছাড়া সুরধ্বনিয়ে করানিরতা কিত্তাউ নেইছিল ।বাপকে ঠিক করিছিল পাত্র অগরাঙ বারো তা ঠিক করিছিল দিন অহাত-সুরধ্বনিরে আক্কবালা বিদায় দেনাইল।সুরধ্বনি তাপ্প তাপ্প কমালা মাস্টর ঘরে বেতন ছাড়া পার্মানেন্ট কামুলিগ ইয়া সংসার দায়িত্ব হারপানি অকরলো।

প্রায় ছয় মাহা পরে গাঙর পিওন অগই চিঠি আহান দিয়া গেলগা।অচিঠি আহান পেয়া তেই জবর হারৌ ইলি কিন্তু ভিতরে ডর আহানৌ হমিল।ডরপিয়া অদিন কিত্তাউ না মাতল, পরর দিনে হেইকরে তেমদিয়া মাতিরিতা, ‘মি তরে ইস্কুলে যানার আগে হবা খবর আহান দেঙ করে বাছাঔরিগ, হিনপিয়া দুঃখপিয়া মি কোন মতে ক্লাস এইট পাশ করিছিলু।বারো চারি পাঁচহান ইন্টারভিউ দিয়াছিলু, অতার ভিতরে এরে এহান আহিসেহান’-বু্লিয়া তেইর জয়েনিং লেটার অহান গিরকরাঙ সমজিল।কমালা মাস্টরে খামগত্ব চিঠিহান নিকালিয়া এবারা অবারা উল্টিয়া চেয়া খানি গম্ভীর ইয়া মাতল, ‘কিইতে তর বাবাইতে কোন দিনৌ মরে না মাতিছে, জিলকে মেমসাহেবগ মালুইয়া ডং ডং করিয়া ঘরর বারে গিয়া চাকুরি করানি মনিরি।বারো তিঔ এতাহাবি করানির আগেতে মরেতে নাঔ মাতিছৎ, এপাগাতে কিতার নাটক করুরিতা?তরতা কিতার অভাব আছেতা চাকরী করতেই-গাতা অনাচার জেলাগ।তরে বুঝিয়া মাতং গাঙ এহাত মোর ইজ্জৎ আহান আছে অহান মনে থইস।হবা বালা ইয়া ঘরে থানা হাদাপেইলে থাক, সংসারহান সামালা।দাঙরিয়া ঘরর কৈনাই অসারে নাচে নাচে অফিস আদালত না করতারা। কান্থিহানে কমালা গিরকে কলগত্ত পানি গেলেস আহান পিয়া, ভাত নাখেয়া ইস্কুলে সালুইল।অদিনর কান্ড কারখানা অতাত সুরধ্বনির হপনহান বাগিয়া চুরমার ইল।

হাব্বিতাউ কপালর দোষ বুলিয়া মনে মনে ওসাক করল, মর সৌশুমারা ইলে অতারে এসারে মাঙনি নাতঔ।নিজে যে যে হপন পুরা নুয়ারল অহপন অতা শৌরাঙ পালকরতৌ বুলিয়া খাংচেত বাধিয়া সংসারহান ধরানি অকরলো হাবি জ্বালা যন্ত্রনা পাহুরিয়া।দিন গেলগা,মাহা গেলগা, বছর গেলগা সৌশুমারা ইলা,ডাঙর ইলা, লেরিক তাম্পরলা, চাকুরী পেইলা, লহঙ করলা- কিন্তু সুরধ্বনি আগেকার মন অহান সুপ না পাল্টিছে, ইমে আগেকার দেখি ইয়া আছে, শৌর আঁখিত নিজর হপন দেখিরি। আকদিন পিতকে কথায় কথায় ফাগি করিয়া মাতেরতা, ‘ ইমা! তিঔ লেরিক তামকরিয়া চাকুরী করিয়া ডাঙর অনা হাদাপাছিলে বুল্লে। কিন্তু আমার দেখি কম্পিটশন করিয়া হবা রেজাল্ট করিয়া চাকুরী আহান পেইলে হারপিলে ঐস।তোর সারা জীবন এহান্তে ইমে বাবার গজে খেয়া কাটিলে, তিতে কিতা হারপিতে’’।

অদিনৌ সুরধ্বনিএ আরাক মুকশিহান দিয়াছিলি নিজর অন্তরগ ডহিয়া, তেই নিজে সিদ্বান্ত নিয়া নুয়ারানির ভুলে। তেই অদিন হব্বাকরে হারপিল সখহানৌ অক, হপনহানৌ অক অহান হুদ্দা নিজরহান কোন দিনঔ, আরাক আগর হপনহান নিজরহান ইয়া নুয়ারের, এমন কি নিজর সৌজিবুতরাঙৌ অহান ইয়া নুয়ারের।

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

বেলিটিক বারোটার ট্রেইনে আগরতলাৎ জাউরিগাতা।ট্রেইহাৎ মানুয়ে আকুইয়া পেরিবাৎহান ইছি।গরমহানে মানুয়ে নিংশা কারানি হিনপিতারা; আগোর গজে আগোই ঠেলা ঠেলি অতার গজে ট্রেইনহার ফ্যা ন অহানির বৌ সুপৌ না লাগের। এতা হাবি মানুর ভিড়হাৎ দেখলুতা ভদ্রলোক আগইা সম্ভবত তার কৈনাগো বারো দুই তিন বছরকার শৌ আগোনো কুমারঘাট ষ্টেশনেত্ব আমার কামড়া গৎ কাহিল। মানুওগই থতা বারো গারিগর জোড় দ্বিয়হানি কামে লাগিয়া কোন মতে আমার ডিগল সীট অহাৎ হমিয়া বহিল। ষ্টেশন আগো লালনির পরে তা নিজর সীটহান এরাদিয়া নিঙশপী অগোরে বহা দিয়া নিজে উবাইল; তার লেম্পালহাৎ জেলাসৌ অগো ঘুমাছে। এ B.S.F এগো ইমে উবা ইছে দ্বিয়জাঙে আগরতলাৎ ফৌইলগা।

পিছেদে হারপিলুতা গিরক এগ‌ই নিজর সীটহান এরাদিয়া উবাইয়া গেলগাতা হুদ্দা তার কৈনাগোরে বহুয়ানির কাজে নাবে লেম্পালর সৌ এগরাঙ পুল্লাপ ফ্যানহানির বৌহান লাগক বুলিয়া; নিজে হিনপিয়াঔ প্রায় ১০৭ কিমি সৌগো লেম্পালহাৎ দিয়া উবা ইয়া গেলগা।পথাৎ শৌ এগো কতো মাউ উঠলি বারো তা থেমকরিয়া তা ঘুমুইল।

খালকরিয়া চেইলুতা হাইহান, ইমে এ পৃথিবী এহাৎ বাবা এগই হাবির গজে ইছে; হাব্বি দুঃখ বইয়া শৌরাঙ সুপ রোদ বরন না লাগক বুলিয়া নিজর নুঙেইপা, হারৌ হাব্বিতা ত্যাগ করে পাড়তারা। এহান খালকরতেই মোরতাউ মোর বাবার কথাহান মনে পড়িল- অহাৎ খাঙদা মোর আঁখির কোন দ্বিয়গিত্ব তপ্তা পানি কতফুটা মোর গালগো বাহিয়া লামিল। হারপিলু এ দুনিয়াৎ যেগরতা যেগরতা বাপক নকি জিংতা ইয়া আছি অতা হাবি মোর দেখি ভাগ্যবান; বারো যেতার তা কালর কারনে নেই তাঙর তাউ নিঙ নিংঙে পরে থাইবো।অহান্ন পারিন আন্মান বাবারে হারৌ করিয়া থনা।যে বাপকগৈ ডাঙর বট ছপা পারা ইয়া সৌর মুরর গজে ছেয়াগো দিয়া হাব্বি বিপদ আপদেত্ত জিংতা করিয়া নেরগা; সংসারে ‘বাবা’ এগো নাথাইলে লাখ টেকার ছাদহান দিয়াও কানা নেই হাব্বি হিন দুঃখ নিজর গজে পড়তই; নিজরতা নিজেই সামালানি লাগতৈ।‘বাবা’ নেই মানে আকগৌ নেই!

_______________________________________________________________________________________________________________________________________________

কৌয়ার বাঘগো

হুরকাঙ কালে আমার চাইরো বেইবুনি আমার ‘আপো’ মানে দলা পন্ডিত গিরকেরে বেরিহান দিয়া হারদিন বহিলাঙতা ওয়ারি হুনানির সালে। ‘আপো’ই ওয়ারি আহান দিয়াছিলতা-

কোন গাঙ আহানোর গোরু রাখাল আগই ফাগি করিয়া মানুরে হিনকরানির কাজে আপ্পানে সেন্ধার মাতাম অহাৎ -

“বাঘগো! বাঘগো! বাঘগোই মোরে মাড়লো! মোরে চালাক করে জিঙতা করো’’-বুলিয়া লৌদের।

রাখাল সৌ এগর লৌহান হুনিয়া গাঙর মুনি হাব্বিয়েঔ – দা, লাঠি, হুজা যেগই যেতা পাইতেরা অতানো বাঘো মারিয়া রাখাল অগোরে জিঙতা করানির সালে তাল করিয়া জিতারাগা। কিন্তু গিয়া চেইতারাগাতা কুরাঙ কার বাঘগো; রাখাল সৌ এগ বনহাৎ লুকিয়া ফাঁক-ফাঁকি আহের।মানু শৌইয়া সৌ এগরে গালা গালা ঘরেদে আলুইতারা। এসারে কত্ত দিন রাখাল সৌ এগই মানুরে আপ্পানে হিন দিলো।

এমতাগাতে আক দিন হুত্তুমেউ বাঘগো আহিল।রাখাল সৌ এগর ঠই-মামি চুইল।হুতুমে এহাৎ এমতাগা তা জানর মায়ায় যতোহান শক্তিহান আছে অতোহান শক্তিহান দিয়া লৌদানি অকরলো। অদিন গাঙর মানু হাবিয়েঔ হুনলা রাখাল সৌ এগর লৌদাহানি-

“বাঘগো! বাঘগো!

কিন্তু অদিন রাখাল সৌ এগই হারদিনকার দেখি মিছা মাতেরগো বুলিয়া আকগৌ লাঠি জাঠিনো নাউ নুকুল্লা।

বাঘগোই অদিন নুঙেই করিয়া গোরুসৌ আগোনো বনহার ভিতরে হমিলগা।রাখাল এগো কোন মতে দাপদিয়া নিজর জানহান জিঙতা করে পারিছিল।

এর পরে ডরহানে রাখাল অগো আর কোন দিন গোরু রাখাত গিয়া নুয়ারলোগা। জিঙতা ইয়া থানার সালে রাখাল এগো পরে লপুকর ফাইফসল রাখানির কামে হমাসিলগা।

ক্ষেতির বির হাদিগোৎ রুদগোর মাঝে এগত অগই মুরগোৎ ছুনু কালি গছা মাটির টুপি আগো বরিয়া ফারা আহিঙ আহান উরিয়া আতহানি মেলিয়া লাঠি আগো ধরিয়া উবাইয়া থার।কোঙদেঔ ক্ষেতিৎ-গোরু, মোষ, পাখিয়া-পলি পড়লেগা দাপহান্ন গিয়া অতা তালকরেরগা।

রাখাল এগই তার আগেকার দিনর নুঙেইপা অতার লগে পিছেকার দিন অতার হিনপানির ফাড়াক এহান খালকরে খালকরে আক্ষুলাগই কাঁদে কাঁদে মাতের-

“ আগে রাখাল ইছিলু আহাৎ কৃষ্ণগো পারাইয়া রুকর ছপার তলে বহিয়া বাঁশিগো রুহা রুহা কতি নুঙি ইছিলুতা; এপাগা কৌয়ার বাঘগো ইয়া কতি হীনপাঔরিতা”।

তা নিজের দ্বিগালে দ্বিচাপড় দিয়া মতলো-

“মাত আরতা কুন দিন মিছা মাত্তেইতা?

________________________________________________________________________________________________________________________________________________

-উফ্‌! চেইবেনাই আজিকার দিন এহান ভগবানে কতি হবা করে দিয়াছেতা আমি দ্বিয়গির সালে!চা এরে বিল এগর পানি এহান লক লক করের। এবারাত্ত অবারার রুক বাহার সপা হুরু হুরু ইয়া ছবিগো মালুইছে। কতি হবা ইসেতা!

- অহ্‌হ…

- জয়ন্ত! ও গিরক তি মোর কথাহান নাঔ হুনর! কিতা ইয়াতে মরেনো আহিলে?

- হুঁ! হুঁ! হুনুরি এ গিথানক মাত।

- জয়ন্ত! হুত্তুমেউ হুনরগো?

- কিতা মাৎ অনামিকা? কিতা ইয়া তি উরাদারা ইছৎতা? মি হুনুরি নাই মাৎ।

- তি মোর কথা হুনর থাঙ্‌।কুরাঙ হুনরতা। ইমে মোবাইলহান্নো ব্যস্ত ইয়া আসত। রবিবারে অফিস বন্ধ ইলে জিতাঙাইগা বুল্লে ইতেতে ইমে আজিঔ অহান মোবাইলহান ছাড়া ছুপ চলে নুয়ারর।

নাহে স্যারি! গোলায় পথহান বাগিছে অতার ফটো খানি ইঞ্জিনিয়ার-গোরাঙ সেন্ড করলুতা। না শৌইছ।

- বাহা তোরতাতে কিতা রবিবারেঔ বন্ধ নেই সাৎ।দিন আহান তি তোর নিজর কাজে বা মোর কাজে নিকালা নুয়ারর?

অহ্‌হ, অনামিকা! নুয়া চাকুরিহান নাই, হাবিয়েউ মোর গজে বপ ভরসা করতারা নাই; অতার গজে গুলা ইয়া পথ ঘাট বাগিছে নাই অহান্ন কাম খানি বপিছেতা। তি বারো সুপ হান্নাপাউরি-মি এতা কার কাজে করৌরিতা? ইমে তোর কাজে নাই। তি কৈনাগো ইয়া আহিলে আমি দ্বিয়গিয়ে হারু হারু ইয়া থাপারবাঙতা বুলিয়া। খালকরনে মোরে ট্রান্সফার করিয়া দূরেইত বেলাদিলেগা আমি দ্বিয়গিয়ে সময় সময়ৎ এসারে তিল পারতাঙাইতা?

- অহান্তে হাইহান মি আরতা কিত্তাউ না চাউরি, ইমে তোর কাদাৎ তোরে ধরিয়া থাইলে নুঙেই পাউরি (পিছেদেত্ত অনামিকাই জয়ন্তরে কল করিয়া ধরলো)। তবু তি মোরে খানি সময় বপ সময় দিলে জবর হারোঔ ঔরি। আজিকা হুদ্দা তি বারো মি! কতি হবা সময়হান, হবা মাদানহান। মি জনম জনমে তোর লগে এসারে হারৌ ইয়া থানা মনাঔরি জয়ন্ত। মোরে তি কোনদিন না পাহুরিছ।মি এহানর গজে কিত্তাউ না চাউরিতা তরাঙ।

- মি অতা হাব্বি হারপাছু (বুলিয়া আনামিকার লেম্পালহাত আতহান থঙ বুলতেই বারো ফোন আহান আহিল)।ওহ! আনামিকা স্যোরি! (বুলিয়াঃ স্যার মি ফোটোগি সেন্ড করিছিলুগো চেইস বারো ডিটেইলসহান রাতি দিতৌ। থ্যাঙ্ক ইউ (কলহান কাপিয়া মোবাইলহান জেবগোত বরিলো)।

এমতাগা অনামিকা জবর শৌয়িয়া জয়ন্তর অগদে পিছহান দিয়া উবাইলি।জয়ন্তই কিহান করতো বিছারিয়া না পেইয়া পেছেদেত্ত্ব তেইরে উরোক করিয়া কাদাহার শিবঙহাৎ বহাদিল, তাউ বহিল

দ্বিয়গিয়ে কন্নাকন্নি দিয়া বহিলা।জয়ন্তর লিচেৎ এহান দেখিয়া অনামিকার তিক্‌, অভিমান হাব্বি শিয়াঔকো কুঙদে গেলগা!

- মাত এপাগা কিহান ইছেতা?

- কিত্তাউ নাউইছে। ঘরে জিকগা। সেন্ধাহান ইল।

- কিতা ইয়া ইমে এপ্পাগাই আহিলাঙগো নাবে; কিদিয়া বারো তরা তরি ইলেতা।

- মোরতা নুঙেইহান না লাগের। ঘরে গেলেগা গালিতাই।

- অনামিকা! অনামিকা স্যারি; ফোন আহিয়া বেরা করের অহান্ন শৌইলেতা সাৎ।মি হারপিলু।কিন্তু কিহান করানি চাকুরীহান টিকিতে গিয়া অতারানি লাগের।এরে মাতলু আরতা ফোন ধরানি নেই ফ্লাইট করিয়া থইলু। ফোন আহিলে মাতিছ। এপাগা হুদ্দা তি বারো মি- আরতা কিত্তাউ নেই। দুনিয়াহান উল্টিয়া গেলেগাও আমি দ্বিয়গি আছি-হুদ্দা তি বারো মি ।

- হুত্তুমেউ মাতরগো? মাত সেইত্য, সেইত্য তিন সেইত্য?

-হাই হুত্তুমে, তিন সেইত্য, চারি সেইত্য নাবে হাজার সেইত্য।আজিত্ব-হুদ্দা তিয়ে বারো মিয়ে ।

  ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

অদিন অহান বাহুলা ইয়া দিনহান কাটিল; সুপ ঘরেদে আলনি নাহের। ইমে আলনি লাগতৈ বুলিয়া ইমে আলনি -

তবু আলুইতে আলুইতে সেন্ধাহান হেলুইল।

সারাদিনহান সমুদ্রর পাড়ে পাড়ে বুলিয়া সমুদ্রহার নুনটুকা পানিৎ জাবুরিয়া হাব্বিয়েঔ হিনপাছি।হাব্বিয়ে যেপাগা হিন জিরিতারা অহাৎ অলকে খাল করেরতা ইমে এরে কাদা এহাৎ ঋতু ফ্লেট আহাৎ থাইরিগো আক্ষুলাগোই গিয়া দেখা আহান করিয়া আহিমগাতা না কিতা?

খালকরতে ডিলুইলেউ কামহান করতে সুপ সময় না লাগিল বুল্লে একরের।ফুতি ফানি পিদিয়া গারিগৎ সেন্ট ফুটি স্প্রে করিয়া ওলা আহান ধরিয়া ১০৩ নম্বর তলর তালার ফ্ল্যাট হানর মুঙে গিয়া উবা ইলগা।

ডিগল নিংশা আগো উসুলি কলিং বেলগোৎ জাতাহান দিল, এগোদেতে ভিতরগো ডুক ডুক করেরগো।ভিতরেত্ব বহু দিনর চিরচিনা সুর আগোই কেথক করিয়া মাতলো-

- কাম ইন।

- সোরি নাউ মাতিয়া আহো পড়লুগা।কুঙ্গ কুঙ্গ আসোগো?

- আই আই আকগোউ নেই।তি নামাতলেউ মি হারপাছু, তুমি টৌরে আহিসোতা।

- হু্! তি কিসারে হারপিলেতা?

- নাহে বজিয়ে এফ বিৎ পৌষ্ট দিয়াছিলি নাই।

- এপাগা মাৎ কিসারে ইয়াতে আসোতা?

- ইমে এক রকম।তার তাতে হারপার নাই প্রাইভেট কোম্পানির চাকুরি। বিয়ানে নয়টাৎ নুকুলিয়া যারগা অগো রাতি দশটার আগে কোন দিন নাহের।মি আক্ষুলিগোই ইমে ঘরে পচুরি।হাইদে অতা বাদ দে- সমুদ্রহান চেয়াতে কিসারে লাগিল?

- হাই জবর নুঙি ইছিল।

- বজিরেতে কিদিয়া নানলে?

- তাঙি হিন জিরিতারা ঋতু। চা নাবে কফি; কফি খানি কড়া করে দিছ। মুরগো খানি কামাড়ারতা হে।

- অলক! এগোদে কিচেনগোৎ আই। মি কফি লম করতে লম করতে তোর লগে ওয়ারি দিমতা। বাহা হে! তোমার ম্যারেজ লাইফহান্তে কিসারে কাটের?

- নাহে তোমার দেখি নাবে। ইমে জোড়া তালি দিয়া চলের নাই।

- হই; কিতা বুলরতা? অসারে নামাতিছ।

- তিতে হারপাসৎ নাই কলেজ লাইফেঔ দেখলে – মি খানি ফিলোসফার টাইপর মানুগো। কনাকেত্তৌ এলা, নাচা, লেখালেখি, বুলানি কিতা হবা পাঔরিগো। তেইতা ইলতা অতা নাবে, ‘কাম কর পয়সা ধর’।

- হাইদে আমার কথা বাদ দে। তুমিতে ইমে হবা ইয়া আসো নাই?

- আমার তাতে ভালোবাসার লহঙহান নাই। ইমে মানিয়া চলানি লাগের।গেলগা মাঘৎ মোর হৌরক দৌ ইল।গাঙে মোর হৌরিক বারো ননদক হুদ্দা দ্বিয়গি আছি। হেইক কাশ্মীর এ্যাটাকে দৌইল অগোতে । তেইর পেনশন হান্নো চলতারা; আমারতা তাঔ খানি মানি রুপা দিয়া বেঠুয়ার।

- হাই তোমার তাতে তা রাজ্যহানৌ বারো রাজকন্যাগৌ পেইলহান্তে নুঙি ইয়া চলরাই নাই।

- হাই গিরকে মাতলে অহান্তে হাইহান।

- মি যেপাগা তোরে নাপেইলু অহাত্ত জীবন এহান উলট পালট ইয়া পলগা – অহান আরতা কোন দিনঔ ঠিক করে নুয়ারলু!

- মি যেপাগা ত্রিপুরা ইউনিভার্সিটিত্ব এম. এ. করলু অহাৎ তাউ আহিয়া আমার ডিপার্টমেন্টে ভর্তি ইলগাতা। তি বারো চাকুরী পেইয়া গেলেগা এগোদে এগো হুদ্দা আক্ষুলাগো আমার মানুগো আছিলগো। অরতে, ‘সঙ্গ গুনে লোহা জলে ভাসে’ অহান্নাই। আমার বন্ধুত্ব অহান তাপ্প তাপ্প প্রেমহাৎ পরিণত ইল।মিতে ছুপ নাকরিছুগো।হান্নেই কুরাঙতো কিতা ইলতা।

- হাই অহাৎ মোরে জানে পাহুরে বেলাছিলে নাই।মি কিন্তু বহুত চেষ্টা করিয়াঔ আজি পর্যন্ত তোরে পাহুরে নুয়ারিয়া থাইলু।

- নাহে অহাৎ তা মোরে যে ডাঙর ডাঙর হপন দেখাদিল অতাৎ মি বাহ পড়ছিলুগাতা।আসলেতে কিত্তাউ নেই। এপাগা তি দেখর নাই বন্ধ কহাগোৎ পড়িয়া অয়াছু।তুমি কুরাঙতো আহিয়া বুলরাইগা

মি বারো ঘরে থাইয়া পচৌরি। দেখর নাই তিতে।

- তি যেতাউ মাৎ মি আজি পর্যন্ত তোরে মিনিট আহানোর কাজেঔ পাহুরে নুয়ারৌরি, তি আক্ষুলিগো মোর মনর মতো মানুগো।অরে আছিলেগা সময় অহাৎ তোরে কতি অনুরোধ করলুতা।তি মোরে বেলিয়া নাজিগা বুলিয়া। মি হুরকাঙ চাকুরি আহান পেইলু মাহিতে ডাইল ভাত খইয়া থাপারতাঙাই চিন্তা না করি বুলিয়া। তি বারো কলেজর প্রফেসারগো ইতেই বুলিয়া হুদ্দা মোরে অপমান করলে।আজি মোরে কম বেশী মানুয়ে চিনতারা; তি মাতলে এপাগাউ মি তোর কাজে হাব্বিতা এরাদে পারতৌ।

- কিন্তু অলক!পাগালামি নাকরি। এপাগা আমার সংস্কারর সালে আমি কিত্তাউ করে নুয়ারবাঙ।শান্ত অ অলক! অতা কথা না মাতি নুঙেই না লাগের।

- তি আসৎ এপাগাঔ মোর জীবনর হাগহাৎ সেন্ধাহার ধ্রুবতারাগো ইয়া, মোর মনর বাগানহাৎ হাজার হাজার ফুলর নুঙশীপা গতগো মিইয়া। ঋতু ! তোরে মি আজিকা আকমাঔ সকানি মনাঔরি।

- তি মোরে চাঙ অহান বাহানা পারতা।হাইদে,তি জাগা মি আহৌরি কফিনো,হুত্তুমেঔ মি তোর মুঙে আজি লাজহানে মুরগো তুলে নুয়ারৌরি।

- ঋতু! তি মোর মুঙে আঁখির পানি না বেলি; মি সুপ জারে নুয়ারৌরি।তি কিহান প্রমাণ চাউরিতা মাত। হাত বারৌ আমি আমার পুরানা হপনর দিনে ফিরিয়া জিকগা।

- অলক! এপাগা এহান সুপকরেঔ সম্ভবহান নাবে।অলক! তি মোরে সুপ হার নাপেইলে মি তোর লগে অদিনতো আজি পেয়াঔ গারিগোনো নাথাইলেঔ মনহাননো আসুগো, ভবিষ্যতেঔ থাইতৌ। তিতে মোরে বিশ্বাস নাঔ করতেই;বিশ্বাস নাকরানি অহান তোর অধিকারহান। পরর জনম বুলিয়া যদি কিত্তাউ থার অহানর কাজে মি বাছিয়া আছু।

- হাই ঋতু! মি হারপিলু পৃথিবীর কোন গল্প, কবিতা, উপন্যাস বা প্রেম ভালোবাসা এতা সম্পূর্ণতা নাবে, এতা হাব্বি টুকারা টুকারা বিশ্বাস ; বারো হুরকাঙ প্রেমর ডাঙর ওয়ারি।

~~~~~~~~~~~~~~~~~~~~~~~~~~~~~~~~~~~~~~~~~~~~

আমি হুরকাঙ ইছিলাঙ অহাৎ কেরেসর লেন্টন আগো লাগিয়া উঠানহাৎ লেরিক চানাৎ বহিলাঙতা উঠানে; আপই জবর যতন করিয়া আমারে লেরিক বাঙাদিল।

বুঝানির ফাঁকে ফাঁকে হারদিন নানান উপদেশর ওয়ারী হুনা দিলো আমারে। মানুর প্রতি মানুর কর্তব্য কিসারে অনা থক অতা রামায়ণ মহাভারত বারো গীতার ওয়ারির দিয়া দিয়া আমারে বুজাদিলো।

তা মরনো ডাঙর ডাঙর হপন দেখলোগো।

অরে সময় অহাৎ অসারে হারনাপেইলুতা-

অহান্ন সময় সুযোগ পেইলেই দুষ্টামি করলু।

আকদিন আপই মোর দুষ্টামি জারে নুয়ারিয়া আমুনিগো গজেদে তুলিয়া দেখাদিয়া মাতলোতা-

‘ উরচা হাগহাৎ কতি লিশীং লিশীং তারা আছঅতা;

মরতারা মানু অতা অসারে তারা ইয়া হাগহাৎ থাইতারাতা দেখরতা?

মি ডাঙর ইয়া হারপিলুতা- হুদ্দা মানু নাবে; এ পৃথিবী এহাৎ কিত্বাউ স্থায়ীতা নাবে হাবিতাউ নষ্ট অর বিনাশ অর। বারো মোর আপর তারাগো অনার ওয়ারী এহান হুদালা অভিমান আহান নাবে অহার ভিতরে চিরসেইত্য আহানৌ লুকিয়া আছইলা অহান বুজানির চেষ্টা করিছিলতা।

আমার আপ আকদিন আমারে হাবিরে বেলিয়া গিয়া তাঔ তারাগো ইলগা।

তা যানার পরে আজি মোরতা বয়স বাড়িল- তবু কিতা ইয়া কিগুইজানে সেন্ধাহান ইলেই মোরতা আঁখিগি হাগহান্দে যারগা, মি ঝল মল করের তারা অতারে চেইয়া নিংশিঙ অউরি আপুয়ে আপ্পানে নামাতিছে কথা এহান। হয়তো অরে তারা অগোর কাদাৎ আরতাউ কতগো তারা আমারে বাছিয়া ঘুমিয়া আছে জিঙতা অনার খৌরাঙে!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

গৌরব বারো সুমিতা আজি বছর আহনর কাজে ঘর আগোৎ থানার চুক্তিহান লমিল। আজিত্ব বছর আহান আগে তাঙি হেইমাখান কোর্টে খেইনা অনার কেইস আহান ফাইল করিছিলা।গৌরব বারো সুমিতার মানক বাপকর অনুরোধে তাঙর দ্বিয়গিরে আরাক বছর আহান কোঠা আগৎ থানার কাজে কোর্টে আদেশ করিছিলতা।মত পথ না তিলুইলেঔ তাঙি দ্বিয়গি বারো কোঠা আগত আছিলা কোর্টে বারো মানক বাপকর আদেশ মানানির কাজে।

তাঙর টিনর ঘর অগর গজে দলানি খুনু জোড়া আহানে জমহান হঙকরিছিলা। গৌরব এগই ঘরে পাতা পুতা গুড়া বেলতারা বুলিয়া প্রায়দিন খুনু এগির জমহান ভাগেদের।খুনু এগিঔ জবর মেইৎথি ইসি গৌরবে যত ভাগের তাঙিঔ পাল্লা ধরিয়া বারৌ হঙকরতারা।ইতে ইতে তা খুনু এগির জমহান ভাগানি কমিলো।

কতদিন পরে বারো কিহান খাল করিয়া ডিগল বাহা আগোনো গৌরবে জমহান ভাগানির হত্না ক্রলে প্রায় বছর আহান না অতারিয়া আছে সুমিতাই মাতরিঃ

- বাহা না ভাগিনে । পাখিয়া দ্বিয়গিয়ে আস্তা দিনহান হীনপিয়া হঙরতারা জম অহান কিদিয়া ভাগেদেরতা। পাপ বইতেই নাই।

- অহ্‌ জবর পুণ্য চেলপিগো।

বুলিয়া গৌতমে মুকশী আহান দিলো।

- হাইদে মাৎতা মানুর সংসার মানুয়ে ভাগে দিলেতে পাপ নারথানঙ?

এমতাগা সুমিতাই খানি খুয়াকনা ইলেউ মাতিরি-

- কার সংসার কোঙগোই ভাগলাতা?

- হাইদে আজি আমার লিভ টুগেদারের লাষ্ট দিনহান। মি মোর মনেত্ব কার লগেউ মনো মালিন্য নাউচাউরি। অহান্ন কিত্তাউ না মাত্তউ।

- মাতনে গিরক! কিহান মাতানি মনারহান।হাইদে তি মাতিয়াঔ থাক না মাতিয়াঔ থাক মিতে তরে কথা আহান মাত্বৌ।

     - হাই মাত - তবে মুর গরম করানির অসারে কথা নামাতিছ।

     - আমার ছাতহার খুনু জোড়া এহানে তরে কিত্তাউ না হিকিলা? মোরেতে জ্ঞান আহান দিলা।

    - ও হবা ইসে কি জ্ঞান হান দিলাতা মাতবেনাই?

- চা গৌরব আজি বছর আহান ধরিয়া- তি ইমে মেইৎথি ইয়া তাঙর জমহান ভাগেদের; তাঙি বারৌ হঙকরতারা। ইতে ইতে তি নুয়ারিয়া বাদ দিলে পাখিয়া দ্বিয়গি তাঙি জিঙলা।

- হাই মিঔ মানুর হেখি খুনু, কুরাকি খেইলু ইসতে হবা করে হারপিলা ইস?

- তি না খেইতেই অহান হারপিয়া তোর ঘরে আছিতা।আকগৌ কিত্তাউ না অতারিয়া চুপ ইলা।

আজি বারো মানু জোড়া এহান খুনু জোড়া এহার কারনে এতাপাড়া দায়-দরবার হাব্বি পাহুরিয়া বারৌ অতারানি অকরলা।

গৌরবের আঁখিৎ তাঙি দ্বিয়গির নুয়া প্রেমর দিনর বাহানা নুঙসির ছবি আপ্পানে ভাহিয়া আহের পারা। তবু তা জিঙানির সালে সুমিতারে চেয়া দাঁত কামাড়ার।

- কৈতে সালুইবেনাই ফুতিফানি প্যাকিংকর। আজিতে আমার দ্বিয়গিরতা লমিল গো নাবেথাং?

হাবিতা পরেউ আজিকার দিন এহাৎ হয়তো সুমিতা বারো গৌরবর মত নাতিলুইলেউ এসারে কথা সুমিতাই গৌরবরাঙত্ব আশা নাকরিছিলি। সুমিতাই কিত্বাউ না মাৎলেউ তেইর আঁখির কোনাগি লালুইয়া কক্‌গোৎ তপ্তাপানি পড়িল।গৌরবরতাউ আগেত্ব বাদগো বাগিছেগো তা চেয়ারহান এরাদিয়া সুমিতারে কলকরিয়া ধরলোগা। তাঙি দ্বিয়গির আঁখির পানি তিলুইয়া পবিত্র গঙ্গাহানর দেখি যুগ যুগর পাপ অনাচার ধুইয়া হৃদি দুগো তেন্নাম তিল করিয়া আলাদা তীর্থ আহান হঙকরে দিলো।

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

বাবাগোই জ্বিগো ঠেলাদের।

-নাহে! জ্বিগো অসারে নেই।নিভতে নিভতে প্রায় ছালিগো ইয়া পরিছেগা।

দাঙগোর কাজে জবর চিন্তাহান ইলতা, এমতাগার জার এহান লিত পারতইহাননা কিতা এহান মুশকিল হান। কিতাইয়া বুল্লেতে এমতাগা যে জারহান পড়িছে এহাৎ টিকে পাড়বো বুলিয়া নিঙ নার?

- ও বাবা হই! মরে যাঔরিগা- জ্বিগো থৌকর।

-দাঙগো, জ্বিগো নিভোপড়িলগা। খানিপ্পারা বাছা মি অকরে দেঔরি।

- তোর বাবা কুরাঙ গিয়াছেগাগো?

- বাবা তে টাউনে গিয়াছেগা।

-বাবা হই! তোর বাবাতে কি কামে টাউনে গেলগাতা?

- আজি বিয়ানে সঙ্গীতা ইচের লহঙ কাজে কমালকান্ত কাকা আহিছিল নাই। তার লগে টাউনে গেলগাতা।

- হইমা এতাপারা কথা এহান মোরে আকগৌ না বাগাদেরাই।

মোরেতে মাতিয়াঔ কিতা করতাই! মিতে কিতা আগের দেখি বলি আছু থাঙ মোরে মাত্তাউগাতা? যেতাউ অক দৌয়ে দিয়া লহঙহান ইলে হবা। বাবাগো! পাউনেতে কিতা করের?

-দাঙগো, মি অতাহাবি খবর হারনাপাছু। যে হান হারপাছু অহান্তে মাতলু নাই।

- হাই বাবা হাই , হাইহান মাতলে। মোরতা জারহান জবর ইল কোনো কম্বল-টম্বল আহান উড়াদিবে নাই। এরে ফাঁড়া কেন্থা এতা উড়িয়া জারহান না কাপের।

- আমারে অতা কুঙগই দিতাইতা দাঙগো?

- কিদিয়া সরকারগো কিতা চাঙ অহান পাষানগো ইলথাঙ, এতা পারা জার এহাৎ কম্বল না বিলিতাইতাতে।

- দাঙগো, সরকারে দিলেতে কিতা ইবো- যেতাই বাটা-বাটি করতারা অতাই আমারে নাউ দেখতারা; আছে অতারে ইমে বপকরে দিয়া দিতারা।

- তি আকমাউ নীলকান্ত মেম্বাররে আহানির কাজে মাতিছ; মি তারাঙ কম্বল আহানর কথাহান মাতিমতা।

- ঠিক আছে মাততৌ দাঙগো, মি এপাগা যাউরিগা কামগরমাহি আছে মোরতা।

- বাবা হই! তোরতা বারো কিতার কাম থাইতইগাতা?

- কাম আছে দাঙগো, থাক পরে আহিয়া হাব্বিতা মাত্বৌগা।

বাবাগোই ঘরেত্ব নুকুলিয়া দেখেরতা তার মানকে উঠানহার কোনগোৎ বহিয়া বিহাত্ব ধরিছি মাছ অগি হঙকরিরি। মানকে বাবাগোরে দেখলো।

- বড়াচাউবা তি আস্তা দিন এহান ঘরে বহিয়া কিতা করতা?

- কিতা? দাঙগোই জারহানে লৌদিরি আরো জ্বিগো অকরে দিলুতা।

- সেন্ধাহান ইয়া জারগা, তোর বাপক বিয়ান্ত নুকুলিছে অগো অপাগাউ আলোনির নাঙ নেই। কেরেসর বোতলগনো বাজারে গিয়া কেরেস পৌয়া আহান বারো নুন কেজি আহান আনগা। বারো তোর ঘঠনা কাকারে মাতিছ মোর জাঙহার দুখানিহান হবাইয়া না কমিছে; হবা হজক দেক।

বাবাগো এপাগা দাঙর ইয়া আহের; তারতা মান সন্মান বোধ আহানৌ হ মাছে। তা এপাগা বাজারে যানা নাকরের। বাজারে গিয়া পৌয়া আধা-পৌয়া জিনিস লনা লাজপার। অহান্ন সাক্তাহান কালা করিয়া কেরেসর বোতল গোনো নুকুলিল।

- চালাক ইয়া আহিস লেমগোৎ আনা আহার কেরেসৌ নেইগো।

তাঙর ঘরেত্ব বাজারহান বপ দূরিহান নাবে; হুদ্দা আধা কিলোমিটারেত্ব কমিতই ।বাজারহাৎ কারেন্ট নেইলে জেনারেটারনো লাইট, ফ্যান বারো মিষ্টির দোকানর কালার টিভি চলের। বাবাগোই মিষ্টির দোকানাগর মাঙ্কলহাৎ উবা ইয়া টিভিগোৎ ইন্ডিয়া পাকিস্তানর ক্রিকেট খেলাহান ছার। অমূল্যর দোকারর গরম জিলাবি অতার গৎগই বাবাগোর পেটগো মুজুরের। তা জেবগোর ভিতরে আৎহান বরিয়া চেইলো, নাহ্‌ কোন পয়সা নেই।কিত্তাউ লইয়া খানার ক্ষমতা নেই। বাবাগো দোকানগত্ব নুকুলিয়া আহিল।

  -বাবাগো! কিসারে আসতগো?

কুঙ্গ আগই খাঙদা লেম্পালহাৎ আতহান দিয়া মাতেরতা । এগো সঞ্জু। সঞ্জুরতা বাজারে কসমেটিক্সের দোকান আগো আছে। কিন্তু কিদিয়া কিগুইজানে বড়াচাউবাই এরে সঞ্জুরে সুপ এগোরে দেখে নুয়ারের, হবানেই শৌর লগে এগো খানি চলা বৈসা করের অহান্ন সাৎ। তা বাক্কা কতো দিন এগোরে তার সঙ্গীতা ইচের লগে মুকশি দিয়া ফাগি- ফারাঙ করতে দেখিছিলগো।বাবাগোই এসারে ব্যবহার এতা সুপ হবা নাপারগো।

- হাই হবা ইয়া অয়াসু। তি তে কিসারে?

- হাই হবা ইয়া অয়াসু ভাইয়া; আই তপ্তা জিলাবি খেইক।

- না না মি না খেইতৌ।

- কিদিয়া না খেইতেইতা? আই খেইয়া যাগা।

অতা বুলিয়া সঞ্জুএ বাবাগোরে আতহাৎ ধরিয়া উসুলিয়া দোকানগৎ বরিলোগা।বাবাগোই লাজপা লাজপা বাক্কা কতোহান জিলাবি খেইলো।জিলাবি খেইয়া লমিলে সঞ্জু-এ প্যাকেট আগো বাবাগোর জেবগোৎ বরাদিলো।

- বাবাগো এগো সোজা গিয়া তোর ইচেরাঙ দিয়া দিছগা, আকগইঔ না দেখকা। হারপিলে নাই।

বাবাগোই এপ্পাগা হারপিলো কিতা ইয়া সঞ্জু-এ জিলাবি খাউইলোতা। কিন্তু – না বুলিয়া মাতানির উপায় নেই।

- বাবাহই কইতে ঘরে লেম আগো লাগাদিয়া যাগা।

বুলিয়া বাবাগোর দাঙ্গনকে আঁধার ঘর অগর ফামহাত্ব লৌদিরি।

- কিতাইয়া মামী চাঙ অহান লৌদুরিতা? তি সুপ হান্নাপাঔরি ঘরে কেরেস নেই, তোর নাতিয়কে আনাত গিয়াছেগা নাই। আনলে আপ্পানেউ লেমগো লাগাদিতৌ।

- কিহান করতু বহকগো ঘর এগো একদম যমপুরীগো পারাইয়া আঁধার ইছে অহান্নো মাতুরিতা; নাইলেতে কিত্তাউ নেই।

- দ্বিদিন পড়েতে এমনেউ যমপুরীৎ জিতেইগাগো নাই, খানি আক্ষুলাগই থানার অভ্যাস করনে।মি কতি জ্বালাৎ পড়িছুতা; মোর জ্বালা কুঙগোই হারপিতাইতা?

- এরে বদমাশ শৌ এগোরে কুম্পাগা দিয়াবেঠুইলুতা দাপ আহান্ন গিয়া কেরেস ফুটিনো আহোগা বুলিয়া; তারে বাছিতে বাছিতে আঁধার ইয়া পড়িলগা এপাগাঔ তারতা ঘরেদে আলনির নাঙ নেই।

- মি ঘরে আসুনাই ইমা, অতাহাবি কথা না অতারি।

- তি ঘরে কিতা কররতা এতা হাবি কাম পড়িয়া আসেতা না দেখর । জমিদারর পিতকগো নাই।চাঙ অহান ডিল করলেতা কিতা ইয়া?

- কাকাতে দোকানে নেই ছিল নাই; ওহান্ন মি বাছিলুতা?

বাবাগোর বাপকঔ কোঙ হেরগোদে আহিয়া ফুঙ্কাহার পাড়গৎ বহিলগা। তা নিভা ফুঙ্কা অহাত চোঙগোন ফু- ফু ফুদানি অকরলো।

- কিতা ইসে থাঙ আস্তা ঘরগো আধার করিয়া থুয়াছতাতে?

বাবাগোর বাপকে নিড়ি-নিড়ি জ্বি লাগা দারু টুকারা আহান তুলিয়া বড়াচাউবারে চেইয়া মাতেরতা

- বাহা কোরাঙকার কাকাগোর কথাহান মাতরতা?

- না না , গঠনা কাকার কথাহান।

- কারতা বারো কিতা ইলতা?হজকর কাজে না কিতা?

- না এরে মোর কাকালিহার দুখানি এহান না কমর। অহান্ন হজক খানি আনেদিস বুলিছিলুতা।ঘরে হজক থাইলে হবা নাই; দুখানিহানে কাম করে নুয়ারৌরি।

- হুন,চানাৎ গিয়াছিলুগা শৌ অগো মোরতা জবর পছন ইল। তাঙর ঘর বাড়ি অবস্থাহানৌ হবা ইছে; অহান্ন আহের মাহাৎ কথা লেপ্পরিয়া থইতাঙাই বুলিয়া মি মাতিয়া আহিলু ।

- হবা ইছে! হবা ইছে, পুরিজেলা শৌ বপদিন ঘরে থনা না করের।কি হাত্ত কিহান ইতই! মাতে নুয়ার তেই।

- হাই হান মাতলে ইমা।

বাবাগো ঘরে হমিয়া তার সঙ্গীতা ইচের কাদাহাৎ গিয়া বহিলগা।

- ইচে তোর লগে সঞ্জু দা-র তা কিতা ইছে থাঙ?

সঙ্গীতাই আধা ইঙাল-আধারে বাবাগোর অগোদে কুপ্পরে চেইলো।

- কিদিয়া? কিতা ইছে থাঙতোরতা?

- না কিত্তাউ নাইছে।না কিত্তাউ নাইছে।জবর হবা ইছে!

   বাবাগোই জেবগত্ত প্যাকেটগো নিকালিয়া সঙ্গীতার আতহাৎ দিয়া দিয়া নুকুলিয়া গেলগা।সঙ্গীতা এপাগা হব্বে ক্লাস টেনে তামকরি সৌগো টেস্ট পরিক্ষাহান কালি্ত্ব আরাম্ভ ইতই।কোনমতে ঠেলিয়া দেক্কিয়া ইমে পাশ করিরিগো, গতিহান নেই বুল্লেউ একরের।তেই লেম আগো লাগিয়া খামঅগো খুলিয়া চেইরিতা অগোর ভিতরে হুরকাঙ চিঠি আহান, লিপস্টিক আগো, টিপফুটা পাতা আহান বারো নায়িকা আগর পাতলা ফুতি পিদা ফটো আগো।তেই হারপিলো এরে ফটো এগো দেখলে ঘরর মানুয়ে বাড়িয়া পিছহান ফাটাদিতাই। তেই তরা তরি ফটো অগো প্যাকেটগোৎ গোপনে লুকিয়া খামগত্ব চিঠিহান নিকালিয়া তামকরাৎ বহিলি।

সঙ্গীতা,মোর বাহানার ঠৈগো!

তোর আঁখি দ্বিয়গি কতি হবাতা ইছেতা, যেমন লোকতাকর বিলগো মালুইছে।এরে তরে দিয়াউঠুইলু নায়িকা এগত্ব তি কতো জিঙে হবা ইছৎ। তোর লগে মোরতা গুরুত্বর আরোপী কথা আছে; তোর পরীক্ষা লমিয়া আক্ষুলিগই মোর দোকানগোৎ আহিছ। তোর কাজে মি আবকচা খুত্তল বারো বাহানা থুয়াছু।

ইতি তোর

  সঞ্জু

এরে চিঠি এহান তাম করিয়া সঙ্গীতার মুরগো চক্কর দেনা অকরলো, তেইর গারিগর হাব্বি নম চপ চপ উবা ইল।তেই কিহান করানি থকিতই না করানি কিত্তাউ হারনাপেইরি। যেগোরে মাত্তই অগই ইমে তেইরে গালিতাই; তেইরে হবানেই বুলতাই এমনকি তেইরে বাকুরি নাদিয়া নাঔ এরা দিতাই। সঙ্গীতাই তেইর মানক বাপকরে করে হব্বা করে চিনিরিগো। আজিকার সেন্ধা এহান তেইরতা লেরিকে ছুপ মনহান না বহিল। ইমে মুঙে লেমগো লাগিয়া সাক্ষীগো করিয়া থুয়াছে।সঙ্গীতার গারিগোৎ ডর হান থাইলেউ হৃদিগো ভিতরে যেমন না দেখিছি নাহুনিছি অসারে জিনিস আহন হুনানি হারপানির আকাক্ষানৌ একদম নেই বুলে নুয়ারতাঙাই।রাতি শিঙনা ঘুম ভাগিয়া উঠিয়া খাল করিরি আহিবো কালিকার দিন অহান কিসারেহান ইতইতা।সঙ্গীতাই হারপাছে তেই অসারে হবা জেলা শৌগো নাবে।তবু সঞ্জু দাদা এগোই কিসারে তেইর লগ ধরিছে এহানর কারনহান কিহান তেই হারনাপেইরি।দিনঅহান সেন্ধাৎ মেম্বারগো আহিয়া সঙ্গীতা ব্যাপারে ওয়ারি-পরি দিলোগা ।বাবাগোর দাঙ্গনকে বারো তেইর কাজে কম্বল আহান দাবি করলো।

-হাই পিহি আহিবো বছর তোরে হাব্বির আগে দিতাঙই। বুলিয়া মেম্বারঅগো বাবাগোর দাঙ্গনকরাঙতো মুক্তি পেয়া গেলগা।

পরর দিনে সাড়ে দশটাৎ সঙ্গীতা স্কুলে পরীক্ষা দেনাৎ গেলিগা। আজি তেইর মনর ডর বারো আনন্দ দুহান কন্নাকন্নি করিয়া আছে।

স্কুল ছুটি অনার পরে বাজারে খাঙদা মানুয়ে লৌদা-লৌদি করানি অকরলা।খবর অহান তাপ্প তাপ্প গাঙর হাব্বিয়ে হারপিলা।স্কুলগর ফিল্ডগোৎ আবকচা মানু পুলিছি।কোন কোন মানুয়ে বিষয় অহানরে রস লাগিয়া ডিজ্ঞল করে দিতারা; কোন কোনগই বারো শক্ত বিচার চেইতারা। ঘটনাহান পইল্লা দেখিছেতা স্কুলর দপ্তরীগো সুরেনে। তা হেড মাস্টারগোই মাতিয়া বাজারেত্ব পেপার চানার কাজে বাজারে রাঙা কালির কলম আনাৎ গিয়া দেখেরগাতা ইস্কুলর ড্রেস পিদিছে ইস্কুর জেলাশৌ আগোরে মানুয়ে সঞ্জুর দোকানৎ থেপ্পরিয়া থইয়া হাইতাই নাবেতাই মাত্তারা।সুরেনে তড়াতড়ি ইস্কুলে গিয়া পুরা ঘটনাহান হেড মাস্টারগোঙ বাগাদিলগা।হেড মাস্টারগোই এহান হুনিয়া মিকুপ আহান না ডিল করিয়া সঙ্গীতারে ডাখিয়া হেড মাস্টারগোই অফিস রুমগোৎ বহুইলগা। ইস্কুলে তেই ছাড়া অন্য কোন ছাত্র ছাত্রী নেই; হাবি পরীক্ষা লমিয়া নিজর নিজর ঘরে গিয়াছিগা।

এতা হাবি মানুর হবানেই আকাম্পা কথা হুনতে হুনতে সঙ্গীতা লাজহানে কাঁদতে কাঁদতে অজ্ঞান ইলি। যেতাঔ অক তেইরে পানি পুনি দিয়া কোন মতে আলকরলা। এ ঘটনা এহান সমাধান করানির সালে মেম্বার, প্রধান, মানক, বাপক হাব্বিরে ডাখিয়া আলোচনাৎ বহিলা।সঙ্গীতার বাপকে হাব্বিরাঙ অনুরোধ করলোঃ-

- গিরিগিথানী মোর জিলক এগোরতা লহঙহানঔ ঠিক ইছেগো; এরে মেম্বার গিরোকরাঙ আঙকরেই তা হাব্বিতা হারপাছেগো? সঞ্জু-এ যে ব্যবহারহান করলো এহাৎ মি মোর জিলকরে কিসারে লহঙ দিতৌতা মি লেইরাপা মানু এগই।মি আরতা হবা সাক্তি নাঔ বিসারাঔরি মোর জিলকরে তা গছক- ইমে ইহান মোর অনুরুধহান।

এগোদে সঞ্জু বারো তার মানক, বাপকে লেইরা ঘরর সৌগ সঙ্গীতারে কোন অবস্থাৎ তাঙি না গছতাই বুল্লতারা। এহান হুনি আহিছি মানু অতাই হৈ-চৈ আরাম্ভ করলা।সঙ্গীতার বাপকরাঙতো সঞ্জুর বাপক মানক বারো আত্বিয়-স্বজনরতা রুপা পয়সা পারিন আন্মান বপইসে অহান্ন ন্যায় অন্যায় বারো মান-সন্মানর কথ অতারিয়া কানা নেই। তাঙি মাত্তাই অহানেই আইনহান। এতা হাবি হুনিয়া প্রধানগই তার মতহান দিলো।

-মামলা মোকদ্দোমা করিয়া কিত্তাউ লাভ নাইতই? হুদালা সঞ্জু আক্ষুলাগোতে দোষীগো নাবে নাই। এহাৎ তোর জিলকরতাউ দোষ আছে; অহান্ন আপ্পানে ঝামেলা করিয়া লাভ নেই।অতাত্ত মি ফেসলা আহান করেদেঙ- যাতে তি তোর জিলকরে আরাক আহাৎ নুঙি করে লহঙ দিয়া পারবেতা।

সঙ্গীতার বাপক এগো লাজ হানে আঙারাগোর ডহাগো পারাইল মিকুপ এহাৎ প্রধানগই চাপ দিয়া মাতলোঃ

- মাতবে নাই আমারতা আরতাঔ কামদুম আছে নাই।

- আপনাআছি গাঙর মুরুব্বী। যেহান মাত্তাউ অহান মি নাকরিয়া পারতৌতা।

- আহিবো লামুইসিং অর দিনে হাব্বি অফিস আদালত বন্ধ থাইতই। পঞ্চায়েতগৎ আমি বহিতাঙাই। মানু মাতানির দরকার নেই; হবা নেই ওয়ারীহান নাই- যতো ছানতাঙাই অতো গৎ আহিতই। দ্বিয় পক্ষর বাপক দুগো, শৌ দ্বিয়গী বারো আমি দুগো তিনগো। সময়হান বিয়ানে দশটাৎ।

কথা মতো বিয়ানে দশটাৎ পঞ্চায়েতগৎ জমিয়া আলোচনাহান আরাম্ভ ইল। প্রধান গিরকে দুহান প্রস্তাব দিলো শৌ এগোর জনমহান খাল করিয়া। সঞ্জুর পক্ষেত্ব রুপা পঞ্চাশ হাজার দেনা লাগতই নাইলে তাঙি সঙ্গীতারে কৈনাগোর মর্যাদা দিয়া ঘরে কাকরানি লাগতই। সঞ্জুর পক্ষেত্ব রুপা দেনার কাজে রাজি ইলা। সঞ্জুর বাপকে ঘরে ফোন করিয়া রুপা পঞ্চাশ হাজার চালাক করে আনুইলো। রুপাহানি প্রধানগোর আতে সমজিয়া আপোস নামাৎ দ্বিয় পক্ষই সই করিয়া কাগজ হানৌ প্রধানগোর আতে সমজিলা।এ পঞ্চাশ হাজার রুপানো হবা পাত্র চেয়া সঙ্গীতারে দান দেনার কাজে লুয়াদিলাতা ।প্রধান গিরকে লমিতেগা হুরুকাঙ কথা দ্বিচুটি মাতলো।

-হাইহোক যেহান অনার অহানতে ইলনাই; আরতা যাতে কোন পক্ষই এ ব্যাপারে কোন ওয়ারি- পরি বারাদে না নুকুলক। আমার সমাজহান আনিকা নাক। এপাগা হাবি নিজর নিজর ঘরে যেইগা।হাব্বি গিয়া পরলেগা প্রধান গিরকে মেম্বার গোরাঙ ত্রিশ হাজার রুপা দিয়া দিলো।

- দিয়াদে পান্থইরাঙ। জিলকর নাঙে ব্যাঙ্কে থুয়াদিবোতা।

মেম্বারগই গনিয়া রূপা ত্রিশ হাজার সঙ্গীতার বাপক পান্তেইরাঙ দিয়াদিলো। এগোই জিনিসহান হারনাপেইয়া ‘আ’ করিয়া মেম্বার এগোরে আম্মকগো পারাইয়া উবাইয়া চেইয়া থাইল।সঙ্গীতার বাপক উবাইয়া থাইল অহান দেখিয়া মেম্বার এগো খানি আহান শৌইয়া দমক দিয়া মাতেরতাঃ

- কিতা ইলথাঙ উবাইয়া থাইলেতাতে?

- না, মেম্বার বাবু সঙ্গীতার লহঙর কাজে পঞ্চাশ হাজার রুপা ঠিক ইলগো নাই?

- হাই, ঠিক আছে নাই।

- কিন্তু মোরে হুদ্দা...।

- হেই বেয়াক্কল্গো, যেতাই এহান লমকরে দিলা অতারে খানি মানি নাদতেই থাঙ! আমি না থাইলেতে যেহান পেইলে অহানৌ না পেইলে ঐছ নাই। অহান হারপারগো?

- অহান ইলেতে মোর জিলকর ইজ্জতহানর দামহান হুদ্দা ত্রিশ হাজার।

- দোষ হানতে তোর জিলকরহান নাই; তেইরে কুঙগোই মাতলাতা লামচা অগর দোকানে হমিয়া দোয়ার বেন্দা দেনার কাজে। হাই দে যেতা পেইলে অতানো ঘরেদে যাগা।

পান্থইর মুরগোদে তপ্তা ধুমা নুকুলানি অকরলো। তা এরে খানি প্পারা রূপানো কিহান করতৈতা।পান্থই গিরক এগো মানুর ঘরে কাম করিয়া কোন মতে সংসারহান চালারগো। হিম্পিয়া রুজি রোজগার করিয়া আধা পেট খইয়া থাইলেউ শান্তিত আছিল পারা কিন্তু অদিনতো তার জীবনর শান্তির মিঙালহান চিরদিনর কাজে বুরিল। তা আকমাউ প্রধানগোরাঙ লমিলগা বিচারহান কাৎকরঙ বুলিয়া চেইতে প্রধানগোতে মোটর-সাইকেলহাৎ চড়িয়া মিকুপহাৎ আঁখির মিঙালর বারাদে মাঙুইলগা।পান্থই আতৎ আহাৎ জিলকর আতহান আরাক আত আহাৎ রূপা ত্রিশ হাজার দ্বিয় আতেত্ব কোঙ আতহান সাঙকরতো এহান খাল করিয়া উয়ান্থা ইয়া তিন জোড়া পথহাৎ পড়িল।নিজে না খেয়া না পিয়া যে সৌগরে আঁখিগোর মণিরগোর দেখি পালিয়া ডাঙর করলো অরে সৌ অগর সালে আজি তার মুরগো তুপিল। দোষহান কারহান?

~~~~~~~~~~~~~~~~~~~~~~~~~~~~~~~~~~~~~~~~~~~~~~

রঞ্জিতার কান্থিহান এহান অতিরিক্ত জবর। তেই শৌওপড়লেগা রাক্ষসীগো ইয়া পরিরিগা। অহাৎ তেই কারে কিহান মাত্তই অহানর কোন ঠিকঠিকানা নেই। হুদ্দা তেইর এরে কান্থি এহার সালে তেইরে আবকচা মানুয়ে দেখে নুয়ারতারা।স্কুলজীবনত্ব অকরিয়া কলেজজীবন লমিয়া- ইউনিভার্সিটিঔ লমিল তবু তেইর কান্থি এহান কাবু করে নুয়ারলো।কান্থি এহার সালে চাঙ অহান ডাঙর খেসারত দেনা লাগতৈ অহান তেই কোন দিনৌ না খালকরিছে।তেই নিজর কানন্থিহার সালে সুপৌ অনুতাপ নাকরিরি। তেই তেইর কান্থিহান অহানরে হবাপেইয়া মনর ভিতরে যতন করিয়া পালিয়া আহিরিগো। তবে হাদি এহান তেইরতা কান্থিহানর কারনে জবর ক্ষতি আহান ইয়া যারগা।

 ইউনিভার্সিটির ফাইনাল পরীক্ষার মাহা দ্বিমাহা আগে সহোদেবে আকদিন তেইরে মাতলোতা, “রঞ্জিতা,আমি দ্বিয়গিয়ে লহঙ করে বেলিক।

আমার ঘরত্বৌ মোরে লহঙর কাজে জবর চাপ দিতারা!”

তার কথাহান হুনিয়া রঞ্জিতাই আহিয়া মাতিরিতা, ‘ তি বারো কনাকসৌ এগোই এপাগাত্ব লহঙর কাজে পাগল ইলেতা কিদিয়া? এসারে কথাতে জেলাসৌএ মাতলে খাটেরতা’’।

তেইর কথা এহান হুনিয়া হারু ইয়া নুয়ারিয়া সহোদেবে বারো কথা অহান সিরিয়াস ইয়া মাতলো।

ব্যাপার এহান হারপিয়া রঞ্জিতাই বারো মাতানি অকরলো, “আচ্ছা, ঠিক আছে। আমি লহঙ করতাঙাই। কিন্তু আরাক মাহা সবুর কর।এরে চেইতে চেইতে আমার পরীক্ষা লমিতই। অহাৎ আকদিন বহিয়া হাব্বি ঠিকঠাক করে বেলতাঙাই”।

সহোদেবে তবুও কথাহান না এড়াদিয়া মাতের, ‘না-না, সুপ নাইবো। ঘরে মোর আপই মোর লহঙর কাজে এক্কেবারে পাগল ইয়া লাগিছে। এপাগা তাঁর বয়স নব্বই বছর; অহান্ন তা তার আক্ষুলা নাতিয়কর কইনাগো দেখিয়া দৌ অনা মনার। তি মাত- এপাগা মি কিহান করতু’’। রঞ্জিতাই বারো বিষয়অহানরে গারিৎ না লাগিয়া মাতিরি, ‘ এহান কোন ব্যাপারহান নাবে! ফালতু কথা আহান। এসারে পুরানতলি কথা মোরতা হুনানি নাহের’।

সহোদেবে মাতের, ‘ হাই হাই নাইলে কথা এতাৎ দাম নাৎলু। কিন্তু আমার ঘরে মোর লহঙর কাজে হাবিয়ে দাপদা ফান্দি অকরে বেল্লা। অহান কিহান ইতইতা? তি সিদ্ধান্ত আহান নেগা- আমার লহঙহান কুম্পাগা ইতইতা। ঘরর মানুরে সামালতে সামালতে মি হিনপানি অকরলু।

রঞ্জিতাই এতা কথা হুনতে হুনতে তিকশৌইয়া জ্বিগো ইলি।

- লহঙতে যেসারেউ করতাঙাই নাই। কিন্তু এপাগা নাবে। তোর বপাক যদি আমার লহঙর সালে মরপড়লেগাঊ নাইবো।

- অসারে কথা কিদিয়া মাতুরিতা, রঞ্জিতা?

রঞ্জিতার এরে কথা এহান হুনিয়া সহোদেবে জবর দুঃখ পেইলো। তবু তা নিজরে সামাললো।

   - মোর বপাক মোর একদম কাদার মানুগো; তার সম্পর্কে এসারে কথা হুনলে মোরাঙ মি অপমানিত ঔরি। প্লিজ তি এসারে কথা আরতা কোন দিন নামাতিছ।

রঞ্জিতা বারো সহোদেবর প্রেম এহান বাক্কা সাত – আট বছর পুরানাহান এরে সাত আট বছর এহান সাধারন কথাহান নাবে আহান্ন বপ মুর গরম করানি নাকরের। অহান্নো সহোদেবে রঞ্জিতার হাব্বি কথা মুরগোৎ না বরার।

- অতা ইলে তি মাৎ আমার লহঙহান কুম্পাগা ইতইতা? এমতাগা তি মোরে ফাইনাল কথা আহান মাৎ।

রঞ্জিতা এমতাগা গম্ভীর ইলি।

- তি হারপাসৎ নাই মোর ইচে বারো বিনি দ্বিয়গি লন্ডনে থাইতারা তাঙি ক্রিসমাসর পরে ইন্ডিয়াৎ আহিতাই।তাঙি আহিলে তরে চেইতাই তোর লগে ওয়ারি পরি দিতাই। তাঙি হাই বুল্লেহে লহঙর ওয়ারী নাই।নাইলেতে কুরাঙকার লহঙ?

সহোদেবে এগো হারদিনকার সরল মানুগো।

- মোরতা কিতা তোর বিনিরাঙ ইন্টারভিউ দেনা লাগতইথাং?

মিকুপহান নাযারগা রঞ্জিতারতা উত্তর দিতে। খংচেলগৌ সেঙ সেঙর খুপাংহানর দেখি কেঙ কেঙ করের।

 মাত চেইক, কিদিয়া না লাগতইতা? তাঙি মোর গার্জিয়ান। হাই তাঙর মুঙে তি উবা অনাঔ লাগতই। তাঙি তোরে চেইতাই তোর লগে অতারতাই অহান কোন দোষহান নাবে।

- না, দোষহান কিদিয়া ইতইতা। এহানতে জবর হবাহান নাই।তাঙি বিদেশে থাইতারাতা; তাঙি যেসারে মাত্তাই অসারে নাচানি লাগতই।কিন্তু তি মোর প্রশ্নহান ইলতা লগে চলানির আগে তাঙরে কিতা ইয়া না আঙ করলেতা ? অহান ইলেতে আজি এসারে ঝামেলা নাইল ইছ নাই।

রঞ্জিতারই আঁখিগি পাকিয়া চেইলো।

- হাই অহান মোরতা ভুল ইয়া পরিলগা নাই।

রঞ্জিতার কথাহান হুনিয়া সহোদেব খানি ঠান্ডা ইল।

- লন্ডনে থাইতারা অতার কথা হুনিয়া তি লহঙর সিদ্ধান্ত নিতেইগাগো? তোর এরে সিদ্ধান্ত এহান বোকামিহান! তাঙি কিতা থাঙ তাঙর কথা হুনানিই লাগতইতা? লন্ডনে থাইতারা বুলিয়া যেহাতৌ মাতবরি করতাইগাতা।

রঞ্জিতা বারো কান্থিহানে জ্বিগো ইলি।

- হাই আহান্নাই।পাড়লে আক মাউ তিঔ লন্ডনে গিয়া দেখাদিবে নাই।

সহোদেবে মুকশি আহান দিলো।

-নুয়ারতৌহান নাবে তোর লেম্পালহাৎ মুরগো ঠইয়া সারাজীবন এহান কাটাঙ বুলিয়া তোর কাদাৎ আছুতা।কিন্তু তি বারো এহান হবা নাপেইয়া লাগিছৎ সাৎ হব্বা করে মাতঙ।অতারে চাঙ অহান পাত্তা নাদি।

রঞ্জিতারই কান্থিহান আটকানুয়ারিয়া নিকদানি অকোরলো।

- তি হবা পেইয়াঔ থাক না পেইয়াঔ থাক মি তাঙরে পাত্তা দেনা লাগতই।তাঙি মোর নিজর মানু।

- অহান ইলেতে মোর বপাকে মাতের অহান ফাগিহান ইসে তোরাঙ।

- অতা পুরানা যুগর চিন্তা।বারো অতা কানা নেই কথা। বারো কিতার লগে কিতা মিলারতা।

সহোদেবে বারো মুকশি আহান দিলো।

- নানা, কোন মতেউ মিলানি নাউ চাউরি।হুদ্দা আজি তোরে চাউরিতা।তি আজি আলাদা মানু আগো ইছৎ দেখুরিতা।

- হুন তোরে বারো মাতুরিতা তাঙি তোরে পছন না করলে লহঙর ব্যাপার এহান কিহান ইতই এহান মিঔ মাতে নুয়ারৌরি। অহান্ন তাঙর সম্পর্কে তি পইলাত্ব হবানেই ধারনা না করি।তাছাড়া, তাঙি আহিলে বাহানা পেইবা অসারে হব্বা ইয়া চলিছ। অহান ইলে তাঙরাঙ তোর সম্পর্কে পজিটিভ ধারনা আহান আহিতই।

- মি অতা কিত্তাউ করে নুয়ারতৌ।মানুরে তেল মাড়িয়া চলানি অহান মি না হিকিছু।

এহান হুনিয়াই রঞ্জিতাই জ্বিগোৎ পড়িছে জিঙতা উফলগো পারা ইয়া ফল ফল ফানদানি অকরলো।

- তোমার চৌদ্দোপুরুষে কোনোগ কোন দিন লন্ডনে গিয়াছিলাগাতা? নাগিয়াছিগানাই অহান্ন তি তাঙর মর্ম হারনাপেইতেই।

এপাগার কথাহা্নি হুনিয়া সহোদেবে এগো জবর হিমপিলো। তা আরতা কোন কথা মাতে নুয়ারলো। কি হান মাত্ত অহানঔ বিছারিয়া না পেইলো। ইমে ইঙ্গ ইয়া থানা অহানেই হবা বুলিয়া নিঙ করলো।কিন্তু অহাতৌ রঞ্জিতার কান্থিহান না কমের।

- মোর বিনি লন্ডনে কলেজে বাগাদের প্রফেসারগো। তা তোর দেখি সাধারণ মানুগো নাবে।

সহোদেবে মুকশি দেনা বেলিয়া গম্ভীর ইল এমতাগা।

- তবু তা মোরাঙতো ডাঙরগো নাবে। কিতা ইয়া বুল্লেতে মিতোরে বাহানা পাউরি। আমার দ্বিয়গির সম্পর্ক আহান আছে।তি মোরে ডাঙর করিয়া দেখানি লাগের।

একথা এহান হুনানিয়ে রঞ্জিতারই লগে লগে টুক টুক আহান ডাখিয়া অহাৎ চড়িয়া ঘরেদে সালুইলি। জিতেগা ফিরিয়া পিছেদে চেইয়া মাতিরিতাঃ

- এসারে আজে বাজে কথা অতারানির সময় মোরাঙ নেই। তি তোর বপাকরেনো থাক। মি যাঔরিগা। আরতা কোন দিন তরতাই মোরতাই দেখা নাইবো।

লগে লগে মোবাইল নাম্বারগোঔ ব্লক করলো। একথা এহানি মাতিয়া তেই বৌহার দেখি মাঙুইলিগা।এর পরেত্ব রঞ্জিতার লগে সহোদেবরতা আর কোন দিন দেখা নাইছে। তাঙি দ্বিয়গি আলাদা দু্গো কলেজে তামকরানিয়ে তাঙরতা দেখা অনার সুযোগ একদম কমিল।আগোর লগে আগোই দেখা করানির ইচ্ছা থাইলে হুদ্দা দেখানি সম্ভব ইল ইসতা । তবুও সহোদেবে হাবিতা পাহুরিয়া কতো দিন উইমেন্স কলেজগোর মুঙেদে আটাউটি করিয়া ব্যর্থ ইল।শেষমেশ তা নিজরেই গোপন করানি অকরলো।

রঞ্জিতার পরীক্ষা লমিল। কতো দিনর ভিতরে ফল নুকুলতৈ।তবুও সহোদেবর আর কোন খোঁজ নেই। এগোদে রঞ্জিতার বোনক বারো বিনক দ্বিয়গি আহিছিতা কত দিন ইয়া পলগা।তাঙি দেশে আহিয়া রঞ্জিতার কাজে পাত্র বিছারতারা।কিন্তু রঞ্জিতাই সহোদেব ছাড়া কারেঔ হবা না পেইরি।সহোদেব তার কলেজগোর কাদাৎ ভাড়া থাইলগো।রঞ্জিতাই তার ভাড়া ঘরঅগো ঠিক মতো না চিনিরি; তবুও তার ডিপার্টমেন্টর বন্ধু আগোরাঙতো হিনপিয়া ঠিকানাগো জোগাড় করিয়া ঘরঅগোৎ গিয়াছিলিগা।কিন্তু ঘরঅগোর মালিক অগোই মাতলো তাতে বহুৎ দিন আগে ঘরগো এড়াদিয়া গিয়াছিলগা বুলিয়া।তার নুয়া মোবাইল-নাম্বারঅগ আকগৌ হারনাপাছি ! রঞ্জিতাই কোন দিন তার আসল ঘরগোর ঠিকানাগো নালুয়াছে। তেইরতা এপাগা পছতানি ছাড়া কিত্তাউ করানিরতা নেই। রঞ্জিতা হারদিন ঘরেত্ব নুকুলিরি সহোদেবর খোঁজ নেনাৎ। এ হাদি এগোৎ তেইর চাকুরীর ইন্টারভিউ আহান আছিল অহানৌ মনহান খারাপ ইয়া নাদলো।হুদ্দা সহোদেবরে বিছারতেই তেইরতা দিনহান যারগা।সহোদেবরে তেই এপাগা জবর নিঙশিং ইরি।সহোদেবর এসারে সহজ সরল সোজা যুবক আগোর লগে তেই নিজরে বেরিয়া জবর হারৌইছিলিগো। আজি কিহাত্ব কিহান ইলতা।

সহোদেবঔ তেইরে জবর বাহানা পেইলোগো।এহান তেই গেলগা দ্বিবছরেও হব্বা করে হারপাছেগো। তবু তেই তারে হাইতা নাবেতা মাতিয়া কতি অপমান করলোতা।তেই অদিন সহোদেবরে অপমান করিয়া কতি ডাঙর ভুল করিছিলিতা – আজি হারপিরি।এতাপারা ডাঙর টাউন এগোৎ সহোদেবরতা কোন আত্মীয় নেই স্বজন নেই এহান তা বারে বারে কথা হেরে হেরে রঞ্জিতারে মাতিছিলগো। কারাঙতো গিয়া তার ঠিকানাগো পানা – এহান উলুছনর হাদিৎ মুক্তা বিছারানিহান পাড়াইল।

এগোদে রঞ্জিতার ঘরে তেইর লহঙ দেনার কাজে উরুম দুরুম আহান আরাম্ভ ইছে।

তিন চারি দিনর ভিতরে পাত্র আগো আহিতৈ তেইরে চানাৎ। কোন দিন তেইর লহঙ খাঙদা ঠিক ইতই অহান আকগৌ হারনাপাছি! রঞ্জিতাই এপাগাউ সহোদেবর কোন খোঁজ না পেইলো। শক্তমনর মানুগো রঞ্জিতার হৃদিগো হাদিএহান মোমগোর দেখি গলিয়া টুম যারগা; মানুর মুঙে জুর জুর আঁখির কোনাগি বাহিয়া পানি লামের সহোদেবর নিঙে নিঙশিংএ। আকগৌ হারনাপেইলেঔ রঞ্জিতাই এপাগা হব্বা করে হারপিরি তেইঔ জানহান দিয়া সহোদেবরে আগেত্ব বপ বাহানা পেইরি; সহোদেবর সালে আঁখির পানি বেলিরি।

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

রাতি না ঘুমিয়া ল্যাপটপগনো কাম করানি অহান বিজয়র পুরানা অভ্যাসহান।ফেসবুকর কোঙ পেইজহাৎ কতিগো ফলোয়ার্স বাড়লা, তার ইউটিউব চ্যানেগোৎ কতিগো সাবস্ক্রাইবার বাড়লা, ভিউস কতিহান বাড়িল এহান তা মিকুপে মিকুপে চারগো। কার কোন কমেন্ট হানর উত্তরহান কিসারে দেনা লাগতৈ এতাঔ খালকরানি লাগের।মাততে গেলেগা বিজয় এপাগা ডাঙর সোস্যাল মিডিয়া ওয়ার্কারগো। এতা এতা করিয়া তা মাহাৎ ত্রিশ পয়ত্রিশ লিশিঙ রুজি করের। অহান্ন তা সোস্যাল মিডিয়াৎ জবর মাহিয়া কথা অতারারতা।কোন ফলোয়ার্সগো কিহান কমেন্ট করলো, এতা হাবি তারতা খেয়াল থনালাগের। আজিকাঔ এতা কামর কোনো ব্যতিক্রম নাইছে।এপাগা রাতিহা প্রায় দুইটা বাজের। বিজয়ে বিভিন্ন ফলোয়ার্সর কমেন্ট তামকরিয়া, প্রয়োজনমতো রিপ্লাই করের। নিজর রিপ্লাই অতা তামপড়িয়া কোন সময় অন্যমনস্ক ইয়া নিজে নিজে আহের। কতো রকম কমেন্টর কতো রকম উত্তর। কোন কোন সময় বিজয়র ব্যক্তিগত জীবনর গজেঔ কমেন্ট করতারা। তা এসারে কমেন্টর কোন উত্তর নাদের। তবুও আজি এতাহাবির ভিতরে কমেন্ট আহান দেখিয়া তারতা বিশ্বাস নাইল।

-“হাই বিজয়, মি এপাগা তোর লগে দেখা করানি মনাঔরি’’।

কমেন্ট অহার কোনাগদে বিজয়ে সময়হান খেয়াল করিয়া দেখলতা- এপ্পাগা দিয়াছে কমেন্টহানে। এহান দেখিয়া বিজয়ে নিঙকরলো তার লগে কুঙগো আগই ফাগি করিরিতা। অহান্ন তা মুকশীর ইমোজি আগো দিয়াবেঠুইলো। ঠিক মাতাম অহাৎ তার ল্যাপটপ'গর ব্যাটারি লো ইয়া সুইচ অফ ইয়া পলগা। চার্জে বহিয়া বিজয়ে বারে বারে খোলানির চেষ্টা করিয়াও খোলে নুয়ারলো। ঠিক সময় অহাৎ বারেদের দুয়ারহাৎ টক টক করিয়া শব্দ আহান ইল। খাঙদা বিজয় অর ইয়াহার ভীতরে শেক্‌, শেক্‌ করলো; তার গারিগোর নম উবাইল। তা নিঙকরলো- তারে হয়তো বৌহানে ঠেলিলো দুয়ারহাৎ থেঙকরে দিলগা ! ইমে ঙাহাক অহার ভিতরে বারোঔ টক টক শব্দহান।এসারে তিন চারি মাউ আওয়াজহান হুনানির পরে বিজয়ে তাপ্প তাপ্প দুয়ারহার কাদাহাৎ গেলগা। তাপ্প দুয়ারহান আঙ করিয়া চেইলো আকগৌ বারে নেই। তা হাতে হাতে আটিয়া গিয়া ব্যালকুনিহাৎ উবাইলগা। এগোদে অগোদে বুলিয়া চেইলো কাদা বারাৎ আকগৌ নেই। তা মুঙহাৎ গিয়া টর্চগো কাপ্পরিয়া চেইলো, না আকগৌ নেই। ঠিক সময় অহাৎ বিজয়ে হারপারতা, তার পিছহানদে কুঙগো আগো আহিয়া ঘরে হমিলিগা। তাঔ তরা ইয়া পিছহান বুলিয়া ঘরে হমিলগা।

না্‌--ঘর ঘরর ভিতরে আকগৌ নেই।বিজয়ে দুয়ারহান গাটিয়া – বারৌ তার ল্যাপটঅগ অন করানির চেষ্টা করলো চার্জ নেইয়া অন নাইল। অসময় অহাৎ খাঙদা লোড শেডিং ইল। তড়াতড়ি করিয়া বিজয়ে মোবাইলহানর ফ্ল্যাশ লাইটগো লাগিতে দেখলোতা মোবাইলহান অন নার;মোবাইলহাৎ শুপৌ চার্জ নেইছে।এমতাগা আধারহাৎ মাকড়ে মাকড়ে চার্জার লাইটগো বিছারিয়া গাদ্দিয়া চারথাঙ এগোউ অহান ইছে, ইমে পিলিক পিলিক লাগের আত আহান দুরেইত কিত্তাউ নাদেখের।তবু এরে চার্জার লাইটগো লাগিয়া ওয়ালগৎ ধরে ধরে মুঙেদে দ্বিকাকেই দিতেই এগো অফ ইল। বিজয়ে হারপিল আজি তারতা ভাগ্যহান খারাপ ইছে। অসারে নাইলে কিদিয়া সময় আকহাৎ ল্যাপটপ, মোবাইল বারো চার্জার লাইটগোৎ চার্জ নেইলতা, বারো অ মাতাম অহাৎ লোড শেডিংঔ ইলতা। ক্ষেন্তাম অহাৎ এতা হাবির কাজে তা নিজরে নিজে দোষীলো নিজর বেখায়ালর কাজে এতা হাব্বি অরতা।যদি তা এ জিনিস এতা হাবি সময় মতো চার্জ দিয়া থৈত বা মোমবাতি আগ-দুগো লইয়া থইতো অহান ইলে রাতি শিঙনা এসারে সমস্যাৎ পরানি নালাগিল ইস।

বিজয়ে হারপার কুঙগো আগোই তার কানহানির কাদাহাৎ জবর করিয়া দীঘল নিঙশাগো বেলিরি।তা ডরপা ডরপা আধারহাৎ ঘাড়গো বুলিয়া চেইলো, আকগৌ নেই।

- কুঙগো? মোর পিছহাৎ কুঙগো?

কোন সমা নেই। উত্তর নেই।

বিজয়ে আরাক খানি থৌনাহান দেখাদিয়া বারো চিকারীদের।

- কুঙগো? মোর ঘরগোর ভিতরে কুঙগো?

বিজয়ে অস্পষ্ট কথা খানি হুনের।দীঘল... আহানির শব্দহান।

-মি----। মোরে তি নাচিনোর? হুো।। হু......

বিজয়ে কথা এতা হুনিয়া অনুমান করেরতা মানুওগো তারাঙতো বাক্কা দুরেইয়া আছে।কিন্তু তার কানহার কাদাহাৎ কুঙগোই নিঙশাগো ফো-ফো করিয়া বেলিরি! এতা হাবি খালকরিয়া বিজয়ে আরতাউ জবর ডরপিলো। তা বারো প্র্রশ্ন করানি করলো।

- তি কুঙগো? কিহান তোর পরিচয়হান?

অগোই বারো অস্পষ্ট সুরে উত্তর দিরি।

- হাব্বি মাত্তৌ। এগোদে আই।এগোদে আই।

বিজয়ে নিজর বেখেয়ালে ওয়ালগোৎ সেউতি দিয়া দিয়া তাপ্প তাপ্প থেয়নি অকরলো।কিন্তু আধারহাৎ তা যে ঘরগর বারেদে নুকুলে যারগা অহান হারৌনাপার।

তার কানহার কাদাহাৎ কুঙগ আগোই বারে বারে আয় আয় বুলিয়া ডাখিরি।দীঘল... আহানির শব্দ অহান।

- এগোদে আয়। তোরে মি হাব্বি বাগাদিতৌ।হাব্বি বাগাদিতৌ।হু হু...... আয়! আয়! কাদাৎ আয়!

   এগোদে বিজয়ে নিজর ঘরগো বেলিয়া বারান্দাহান বেলিয়া হুরকাঙ পথহাৎ গিয়া উবা ইলগা। তা যেমন কোন মায়া আহাৎ পড়িয়া পাগল ইয়া দাপদের।যেমন কোন আগই বুলাছেগো পারা ইয়া পিছে পিছে জারগা। বিজয়ে চেইতে চেইতে হুরকাঙ পথহান বেলিয়া ডাঙর পথহাৎ ফৌইলগা।অস্পষ্ট সুরগোনো জেলাশৌ আগই জুবারা জুবারা কথা অতারিরি ।

- নিঙশিংঅ মোরে তি আদিন জিঙতা করে পারলে ঐস? কিন্তু তি অহান না করলে? বরং মোরেন তি ভিডিও হঙকরিয়া তোর ফলোয়ার্স বাড়িলে! মোর ভিডিওগো না হঙকরিয়া মোরেন হাসপাতালে গেলেগাঐসতে মি আদিন জিঙতা ইয়া পাড়লুইস।

একথা এতা হুনিয়া বিজয়ে হারপিলো এগোতে অরে জেলাশৌ আগো নাই। যেগোর ভিডিওগোত্ব তা চৌদ্দশ সাবস্ক্রাইবার পাছিলগো। এপাগাউ জেলাশৌ তেইর মরণর যন্ত্রণাৎ ছট্‌-ফট্‌, করিরি। তেই জিঙতা অনা চেইরি।

মিকুপহাৎ বিজয়ে ডাঙর পথহান বেলিয়া রেল লাইনগোৎ কাহপরিছেগা। নিজর ঘরগো বেলিয়া আবকচা দূরেইৎ। বিয়ানহান ইতে আরতা বপ বাকি নেই।বিজয় পাগালাগো পারা ইয়া রেল লাইনগোর গজে আটানি অকরলো। খানিপ্পারা পরে, ত্রিপুরা সুন্দরী সুপার ফাস্ট ট্রেনহার লাইটগর মিঙাগ তার আঁখিগিৎ পড়িলগা। বিজয়র আনিঙ-ছানিঙ পাগালামী ভাবহান কাটিল; তার জ্ঞানহান ফিরিল।তা যে লাইনগোৎ উবা ইছে অলাইন অগোদে ট্রেনহান বৌহানর দেখি আহের। বিজয়ে দাপদিয়া জিঙতা অনার হত্না করলো কিন্তু রেল লাইন গোৎ খুঁটি থেঙুইয়া উবুড়ীগো ইযা পাকদিয়া পড়িল।

বিয়ানহান ইতে ইতে চাইরো বারাদে খবর হান ছিতারলো। বহু মানুয়ে আহিয়া , ফোটো তুল্লা, ভিডিও করিয়া পোষ্ট করলা নিজর নিজর সুবিধা মতো। কোন কোন ইউটিউবারে লাইভ ভিডিও করলা আরাক ইউটিউবারআগোর ডরপিন চেইখেই গারিগো দেখাদিয়া। কতো সাংবাদিক আহিলা; লেখা লেখি করলা। পরর দিনে পত্রিকার হেড লাইনে কাহিল, ‘রহস্যজনক কারনে স্যোশাল মিডিয়া ওয়ার্কার বিজয়র আত্ম-হত্যা’।খবরহানর ভিতরে লেখা আছিলতা, ‘ নাঙকরা স্যোশাল মিডিয়া ওয়ার্কার, ইউটিউবার বিজয় সিংহ ত্রিপুরা সুন্দরী সুপার ফাস্ট ট্রেনহাৎ বাড়ি খেইয়া দৌইল।এহান আত্ম হত্যা না খুনহান পুলিশে তদন্ত করতারা। বিজয় সিংহ বহু দিন ধরিয়া ফেসবুক, ইনস্টাগ্র্রাম বারো ইউটিউবে বপ এক্টিভ থাইলগো। তা বহু দিন ধরিয়াই ভিডিও হঙ করেরগো। তবে তা বপ নাঙ করিছিলতা যবনিকা সিংহ বুলিয়া স্কুল ছাত্রী আগোর কার এক্সিডেন্ট হানর লাইভ ভিডিও করিয়া’।

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~