তিয়ে-মিয়ে
- মধু মঙ্গল সিনহা
সূচীপত্র
১) নুয়া বসন্ত
২)খৈতঙগ কেলুইল
৩) তোর গজে আজি কিত্তাঔ নাবে
৪) তোরে ডাখের মোর কবিতা
৫) রকতে লেখকা আমার ইতিহাস
৬) না লাগের সাম্রাজ্যবাদ
৭) সীমাহীন হপন
৮) মাতিছিলে মোরে
৯) দৌপদীর বস্ত্রহরণ
১০) কৌয়ার লিচেৎ
১১) অধিকার
১২) কোকিলা
১৩) বরনহান না কমতই থাঙ
১৪) দুষ্টামি না করি
১৫) না চার আলুইয়া
১৬) সিঁন্দুর লাগা বিয়ান
১৭)আঠুম্পা মিঙালে
১৮) উলুছন
১৯) ফুল শাতুইছে
২০) তরে বাছিয়া
২১) শৌনা শৌনি
২২) দেশ আহান
২৩)লেটার বক্স
২৪) চেইখেই রাতির ছেয়াৎ
২৫) নুয়া বছর
২৬) বেলিগর কাদাৎ
২৭) ক্ষমা করো
২৮) বৈশাখ আহিতই
২৯) প্রভু
৩০) রাতি শিঙনা
৩১) মুক্তি নেই
৩২) নুয়া বেলিগো
৩৩) চন্দন
৩৪) নুঙশিপা
৩৫) নুয়া বছরহান
৩৬) বৈশাখ
৩৭) মিছা
৩৮) মন চরকরানির মুকশী
৩৯) কবিতা জরম
৪০) চঙা গোলাপ
৪১) লামুই রাজা
৪২) আমার কৃষ্টি
৪৩) কবিতার মেয়েকে
৪৪) লমনি নাকরের
৪৫) নামরিল হজক বিছারিয়া
৪৬) দাঁতর হু
৪৭) নেতাজী
১) নুয়া বসন্ত
-মধু মঙ্গল সিনহা
নুয়া বসন্তর লগে আহের- ফুলর গতে জাবুরিয়া গুলা
দূরেইত হেইনু বনে কোকিলর রুহনে
মন বিবুলা করের বারে বারে।
গাঙহা্র বুকগৎ আমার মান্ডবগ
কাদাদে যারগা শনিছড়ার লিকলিকা পানি।
বসন্তর রাঙা ফুলে বুজিল তেরার বনহান,
ফুল ফুটের বনে বনে ভ্রমরার রুহনে।
বেনি বুরানির কালে মিঙালহান লুকারগা
আঁধারর গুলার মাঝে।
২)খৈতঙগ কেলুইল
-মধু মঙ্গল সিনহা
আজি কবিতা আহিরী সমুদ্রহানর পারগো বুরিয়া,
তাপ্প তাপ্প মোরে সকতই বুলিয়া।
বাহানা পানা বারো দেখে নুয়ারানির কাজে
মোরে শূন্যের কাদাৎ ডাখিরী বারে বারে।
কবি বারো কবিতার ব্যাকরণ,
বিছারতে বিছারতে খৈতঙগ কেলুইল আজিকা।
৩) তোর গজে আজি কিত্তাঔ নাবে
- মধু মঙ্গল সিনহা
মি হাগহানরে চেয়া মাতুরিতা –
‘বাহ্, কতিঔ ডাঙর ইছৎতা তি!’
হাগহানে মুকশী দিয়া মাতের মোরে-
‘মিঔ সমুদ্রহান চেয়া মাতুরি বারে বারে-
তোর বুকগৎ এতাহাবি উচপা উচপা ঢেউ !’
সমুদ্র-হানরে বারো মাতের মোরে-,
‘এতাতে কিত্তাঔ নাবে গিরক-
চা তি আকমাঔ ওরে ফুল অতারে,
কতি বিচিত্র রঙর হারৌপার খেলা’।
ফুল অতাই বারো মাততারা মোরে-
‘নানা আমারতাতে কিতা,হাগর তারারে
চা তি , কতি ঝিরিক মিরিক করের তা’।
মি বিবুলা ইয়া মাতুরি হাবিরে,
‘হাগহান, সমুদ্র, ফুলর তেঙ্কল না তারাদল;
হাবিত্ত ডাঙরতা কিতা মাতো তুমি মোরে?
হাবিয়ে মুকশী মুকশী দিয়া মাত্তারা মোরে-
‘আকতাঔ নাবে তোর মনহান বৌবরনহান,
নাইলে তোর গজে আজি কিত্তাঔ নাবে’!
৪) তোরে ডাখের মোর কবিতা
- মধু মঙ্গল সিনহা
তি আকমাও আইনে উঠিয়া -
তোরে ডাখের মোর জনম জনমর কবিতা।
৫) রকতে লেখকা আমার ইতিহাস
- মধু মঙ্গল সিনহা
জ্বিগ লাগিছিল সমুদ্রর গজে,
জ্বিগ লাগিছিল বরনর পানিৎ ।
জ্বিগ লাগিছিল সুদেষ্ণার রকতে-
ইমাঠার রক্ষা করানির সালে।
জ্বিগ আছিল গোকুলানন্দর
এলা কবিতার খল্লিকে খল্লিকে।
জ্বিগ নেই জীবন অতাতে কিতা;
খেয়া জিঙতা অনা পাখিয়ার দেখি?
যুদ্ধ করো তুমি ন্যায়র সালে,
অন্যায় বেলিয়া আহো হাবি।
রকতে লেখকা আমার ইতিহাস
রাতি শিঙনা ভাত ঘুম বেলিয়া।
৬) না লাগের সাম্রাজ্যবাদ
-মধু মঙ্গল সিনহা
ইমাই মোরে হাতে হাতে কানে কানে মাতিরী,
‘মি হাগহান হাপদিয়া হারৌয়ে ফুরদিতৌ আজি;
চের চিরুনির দেখি বাধিয়া না থয়ো তুমি মোরে।
কোকিলর কন্ঠস্বরে নুংশিপা ওয়ারী হুদ্দা নাবে-
জাতর বিপর্যয় ইছিল যেদিন লোকতাকর পাড়ে;
অদিন দিয়া ছিলু এলা মাদই-সরারেল অলইয়া।
চিয়ৌপা খরানে ডুক গিলানি নুয়ারলাঙ অদিন,
বিবস্ত্র ইছিলু মি জিপুতর সালে জুনাকর মিঙালে।
কোন খেইপা খেইপি নেয়ক, নেয়ক অভিমান
হাব্বিঔ আমারতা আহক সেইত্য-হবা জ্ঞান।
রাজা- মাদই হাব্বি মোর গারিগোর ইড়া-পিংলা
ভাষার মাঝে রাজা কর্কশ ইলেও, মাদই কঙানা
নিজরে পালকরতে দ্বিয়োতাও সমান বারো মান্না।
টুকাটুকি ঠেলাঠেলি ভাষাৎ আকতার সাম্রাজ্যবাদ,
বানানর দেইমি সেইমি চেই কুঙগো কুঙহাত
বেলাদেই হাব্বিতা, তুমি বেলাদেই দুষ্ট পক্ষপাত।
বারো তিলুইলে হাব্বি আমার বিষ্ণুপ্রিয়া মণিপুরী,
একতা ইলে হারপিতাও আকিগই চারি কুড়ি।।
৭) সীমাহীন হপন
-মধু মঙ্গল সিনহা
কোন নাদেখিন লুরি আহাসনো
বাদিয়া থুয়াছে মোরে-
হৃদিগোঔ নাচের তালে বেতালে।
বাহানা নুংশির ফুল সাতর,
গোলাপী গতে কন্নাকন্নি করিয়া।
আগই ডাকলো মোরে-
‘আই সীমাহীন হপনে জাবুরিকগা,
হতাশার টেঙরা লালয়া’।
৮) মাতিছিলে মোরে
-মধু মঙ্গল সিনহা
তি মাতিছিলে মোরে , তোর মনহান হারপানির কাজে!
কিন্তু, তি নামাতলে - কিছারে হারপিতু মি তোরে?
তোর হৃদির ভিতরে লিশিং লিশিং টুকারার হাদিত-
কোঙ টুকারাহান মোরহান, না হাব্বি?
চেইখেই মেংসেলর হতরঙ হৃদিগর বারেদে জানার পথনৌ নাপাঔরি-
ইমে মি মরে টুকারা টুকারা করে দেখুরি!
কাকেই কারে কারে ফৌইলুগা বন্ধ দুয়ার আহানর মুঙে,
ঙাকুইয়া চাঔরি এহান হমানিরহান না নুকুলানিরহান।
৯) দৌপদীর বস্ত্রহরণ
- মধু মঙ্গল সিনহা
মি দ্রৌপদী!
হস্তিনাপুরর রাজ সভাৎ, মিমৎ করিছিলা যেদিন এ পৄথিবীর অবলার সন্মান -
নিংশিং ইয়া চেই - অদিন-দুর্যোধন আসি জবর হারু ইছিলা,
মোর ফুতি নেই হুদালা মাহু দেখানির খৌরাঙে ।
লিচেৎ থিপা দুর্যোধনর, আদেশ পেয়া-
দুঃশাসনে জনম জনমর বক মিটানির সালে করানি অকরলো, দ্রৌপদীর বস্ত্রহরণ।
মি যজ্ঞাসেনী!
আতজোড় করিয়া হাবিরাং মান ভিক্ষা চাছিলু কাঁদে কাঁদে-
কিন্তু কানা নাইল কিত্তাইয়ৌ
ভীষ্ম, বিদুর, দ্রোণাচার্য- হাব্বি চুপ।
মোর পঞ্চস্বামী মহাবীর গুনী নাহিলা আকগৌ তাঙি নিজর সন্মান জিংতা করাৎ;
জাঙে আতে ধরিয়া কিত্তাতৌ কানা নাইল শকুনির ছলনাৎ ।
অসহায় , অবলা আগোর দুঃখ যন্ত্রনার কথা হারপানির হত্না না করলো কুরুরাজাই অদিন,
সভাহান বুজ্জে মাল্পা মুনি, হাবিয়ে তিলুইয়া দ্রৌপদীরে চি য়ৌপা অপমান করানি।
খেন্তামে দুর্যোধন আছি মুকছি মুকছি দিয়া - আতর তালি দিলা।
হাব্বির থতাৎ নামাতিন কথা,বজ্রর সমান অপমান,
হারপিলু ! লালসা হাব্বিরতাও আছে- দেহরক না হৌরক।
ধর্মান্ধ যুধিষ্ঠির আঁখিথম জিপিয়া থাইল-
তার মুঙে তার সহধর্মীণি দ্রৌপদীর, লাক নেই বিপদে ।
পথ নাপেইয়া মি ডাখানি অকরলু,
“হে গোবিন্দ! তি কুরাং আছৎতা; মোরে রক্ষা কর আজি,
এরে নরপশু এতার হাদিত্ত ।
পারলে তি মাতেদে প্রভু- আসলে মোর দোষহান কিহান?
কোন অপরাধে মোর পিদনর ফুতিহান কারুনলাতা অদিন রাজসভার মুঙে।
১০) কৌয়ার লিচেৎ
- মধু মঙ্গল সিংহ
কৌয়া না মালুয় তুমি;
হাবিয়েঔ হারপিতারা –
সেইত্যহান কিহান, মিছাহান কিহান!
নিজর মুর বেচিয়া দই-চিড়া না খেয়গা আজি।
ইতিহাসর ধলা পাতাৎ
কালা মেয়েকে সাক্ষী নাদেক তোমার কলঙ্কর।
খা্লকরো আকমাঔ তুমি
কিদিয়া বঞ্চিত কররাইতা তুমি তুমার বেইবুনিরে?
এরা দিয়াছিলাং আমি আকতা ইয়া ইমা লাম মণিপাল্পা মণিপুর,
নিজর সন্মানর সালে।
তবে কিদিয়া আজি অরে গাতারাইতা অর্ধেক মানুরে।
মাতলেতে, “না না ঔতা না টটরি”
-কিন্তু বঞ্চনা বারন বুজিয়া-
“ থাইতই,থইতাঙাই, তোমারে মুর তুলানি সুপঔ নাদতাঙাই।“
এরে তোমার “সেইত্য, সেইত্য তিন সেইত্য”-
এতা বাগতই আকদিন
রাণীর ধারা-নালা হজাক ইতাই যেদিন।
______________
১১) অধিকার
-মধু মঙ্গল সিংহ
কাপুরুষর ভিড়ে -
নংসার রুহন হুনিয়া; ঙাকুইছি
আজি চাইরো বারা।
'মি' বারো 'মোরতা' বাকি হাব্বি নাবেতা?
প্রতিষ্ঠা বারো ধনর লিপ্সাত পড়িয়া,
নাহুনতারা আকতাই গীতিস্বামীর কথা।
চেইখেই করতারা ইমার জিবুতরে
-ঠেলাঠেলি দিয়া।
লাজনেই পাগলামীৎ পড়িয়া-
হুক্কাহুয়া রুহন দিতারা;
রঙ সাঙদিয়া লামুই মালুইয়া ।
রকতর হিনাহিনিৎ আদায় করিছি-
ইমার ঠারর অধিকার।
চেই আকতাই নাদতারাতা
দলাদলিৎ পড়িয়া।
চিনো আজি তুমি তাঙরে,
বঞ্চিত করতারাতা কুঙগই কারে?
মোর ইমার ঠারে চলিছেতা চেই -
রাজা রাণীর দশু খেলা।
রাজার রাজত্বে- রাজার সিংহাসন
পালুইছে আজি;
আমিঔ জবর হারৌ ইছি।
কিন্তু; কইতে কুরাঙ আছেতা-
আমার ন্যায়্য অধিকার?
১২) কোকিলা
-মধু মঙ্গল সিনহা
মি কৌয়াগ ইলেঔ-
বিশ্বাস বারো বাহানার সালে;
অদিন আশ্রয় দিয়াছিলু -কোকিলারে
মোর হুকানা ডেঙর জমহাৎ বৌবরনর দিনে।
আধপেট খেয়া মি -
মাচাক তুলে দিলু
তেইর শৌরে আমারতা বুলিয়া ।
শৌ ডাঙর ইলা
রুহানি অকরলা- কুহু! কুহু!
আজি মি লারাবাঙতা ইলু
মোহমায়া অজ্ঞানে পরিয়া কোকিলার প্রেমে-
হৎনা করিয়াঔ রুহে নারলু
কুহু কুহু বুলিয়া কোকিলার সাদে ।
১৩) বরনহান না কমতই থাঙ
-মধু মঙ্গল সিনহা
নিংশিঙ ঔরি অরে দিনর অহার কথা,
শননো ছাইছিলা আমার পুরানা ছিন্ন ভিন্ন ইঙচৌ ঘরগো।
আকদিন চুঙগোনো ডালিয়া বরনহান বেলাছিল,
অদিন হাগর পানির সীমা নেই হারৌপা কুঙগই দেখতো ?
চালহানর কানে কানে লামানি অকরলো
বরনর ইঙপা পানি আমার ঘরর ভিতরে।
যেতা আছিল খুপাঙ খেরি,
পাতলাঙ আমি হাবি পানির ধারার তলে তলে।
মিকুহাৎ অতা বুজিয়া বাহিয়া
যারগা পানি নিজর নিজর পথে।
হের নেই ঘরর গজে তলে পানি
পচা শনর চাকা ডপ্, ডপ্ পরের মুরর গজে,
ঘরে গুলা বারে গুলার পানিৎ যাঙর পাতা বুরিল ঘরে।
কোন উপায় নাপেইয়া ইমাই
পেহান মেলিয়া ধরিছিলি ঘরে ভিতরে,
মি ইমার উরুহাৎ-
আমি দ্বিয়গি বাবার ফামহার গজে।
পেহান বাহিয়া পরের ঝুর ঝুর পানি
ফামহান তিঙিয়া ইল তানিক তানিক।
অপাগা পেইয়াঔ আমার গজে আছিল-
আহৌ কানে বুজা শনর চাল আহান।
হুরকাঙ মি- ইমার ইয়াহাৎ চাপারিয়া
আঙকরৌরি, ‘ইমা!
বরনহান না থামই থাঙ আজি?’
১৪) দুষ্টামি না করি
-মধু মঙ্গল সিনহা
দুষ্টামি না করি তি,
তোর খেলাহান বেলা।
হব্বা ফুতি আনিকা করলে,
লাগিয়া রঙ কালা।
১৫) না চার আলুইয়া
-মধু মঙ্গল সিনহা
হবা হবা হাব্বি দিলে কিতা থাইতই ঘরে,
মিঔ বারো চিন্তাত পড়লু মাঙপরতৌগা ডরে।
ঘরে বনে পথে ঘাটে তমাল ছপার ফাঁকে,
কালা কোকিল পাগল করের রুহের কাঁদে কাঁদে।
মন মোহিনী কপাল থিপী আপাংপী রাধিকা,
কুঙ্গঔ হারনাপেইলা আজি জিগ কুরাংলাগিছেতা।
মনে মনে বনে বনে ফুরদের মন পাখিয়া,
কালার কোকিল জ্বালা দিয়া না চার আলুইয়া।
১৬) সিঁন্দুর লাগা বিয়ান
-মধু মঙ্গল সিনহা
তি নিংশিঙে থাইলে
হাগর বৌহাত চড়িয়া
কঙানা রোদে তিঙিয়া
সিঁন্দুর লাগা বিয়ানে
কঙানা লতগোর দেখি নৌ নৌ করিয়া।
মোর আঁখির খঙে বরন লামের
তোর নিংশিঙর মণি মুক্তা বাহিয়া।
১৭)আঠুম্পা মিঙালে
-মধু মঙ্গল সিনহা
এপাগাউ তেইর লগে দেখা নাইছে
নিংশিঙর মাপাত হৃদিগ থুক থুক করলো।
আঁধারে ফুলর নুংশিপা গত-
হুদ্দা হারপানি লাগের
কাচ্চা খুয়ার ফোঁটা।
বিয়ানকার কঙানা বেলির মিঙাল
মাঙজারগা আঁখির পলকে।
১৮) উলুছন
-মধু মঙ্গল সিনহা
আনিকা পানি অতাউ আজি ঙক্ষি ইসে
লিকলির দেখি চকচক করের।
ফাগুয়ার রঙ হাবি ধুইয়া পুছিয়া
সাফ
দলর রঙ সাক্তাত গছিয়া
রকতর হোলী খেলানিত পাগল ইছি
উলছন পারা ঝপা ঝপা।
১৯) ফুল শাতুইছে
-মধু মঙ্গল সিনহা
ইঞ্চিক চিকুইয়া থাইতে হাইতে
কোন কথা মাতানি নাহের।
ফাঁড়া ছিড়া ম্যাপ আগো
বারো ঘরর চাবি মচাহানো
নিজর ভিতরে নিজে লুকাপরলুগা।
তোর শ্মশানহাত আজি ফুল শাতুইছে,
মিঔ ফুলগো ইয়া পরলুগা।
২০) তরে বাছিয়া
-মধু মঙ্গল সিনহা
কিছারে আছত্তা তি?
মরে ছুপ পাহুরে বেল্লে?
নিঙশিঙ ঔরিগো ওরে রাঙিলা দিনর কথা?
কয়হান বসন্ত কাটাছিলাঙ আমি দ্ধিয়গিয়ে।
আঁখি চারিগ বুজিয়া কতো হপন দেখিছিলাঙ,
আজি হাবি পরিয়া আছে শুন শাতু ইয়া।
২১) শৌনা শৌনি
-মধু মঙ্গল সিনহা
তোর শৌনা শৌনি বারো কেথকে
বাহানা বিছারাঔরি মি।
অহান্ন হাব্বিতা মাঙকরিয়া জবর অসহায় ইছুতা।
মোহমায়ায় ঝাপদিয়া পেন্ডুলামর
কাঁটাগত লর-চর করের জীবন এহান
খুয়া বারো মেঘালার হাদিৎ।
২২) দেশ আহান
-মধু মঙ্গল সিনহা
মি হারদিন জিঙতাঔরি বারো মরৌরি
সময়র হোতে হোতে ভাহুরি।
ঘুমর আঁখি গুরে গুর মাতৌরি,
মি মরিছু
আরর গজর মারিৎ মারিৎ
দেশ আহান হঙর নিথর গারিগর গজে।
২৩)লেটার বক্স
-মধু মঙ্গল সিনহা
ঘরে পিওনগো আহিয়া নাঙহান ধরিয়া ডাকলো
মানুআগই দুয়ারহান আঙকরিয়া মাতলোতা,"কিগো থাঙ?"
"না না এ নাঙর মানু নেই"।
"নট ফাউন্ড" লিখে দিল রাঙা কালিনো
সীমাহীন খুয়ার হাদিৎ মাঙুইলগা এ চিঠিএহান
লেটার বক্সগোর ভিতরে কোন চিঠি নেই।
২৪) চেইখেই রাতির ছেয়াৎ
-মধু মঙ্গল সিনহা
এপাগৌ হারনাপেইলু ভুল বারো শুদ্ধর তফাৎ,
যে পথহান হাইহান অহানৌ মাতে নুয়ারলু।
লগ ধরিয়া আহের হাজারো প্রশ্নোর মায়াজাল,
মোর মনহান বিকলাঙ্গ অর লেঙ্গারা অর।
দূরেইত মন্দিরে ঢং ঢং ঘন্টা বাজের,
মি বারো মোর চেইখেই রাতির ছেয়াৎ।
২৫) নুয়া বছর
-মধু মঙ্গল সিনহা
নুয়া বছরহান আহপলগা
এ পৃথিবীর মাঝে।
হাবিয়ে তিলুইয়া ব্রণ করিক
আহো হাবিহান
আনন্দ মুকশীর হাদিত ,
নুয়া মারি নুয়া করে।
২৬) বেলিগর কাদাৎ
-মধু মঙ্গল সিনহা
সাকা মাকা সেন্ধ্যার আঁধারে
কবিতা জরম অর কবির অন্তরে।
মুঙে পিছে যেগৌ থাকা,
তি লেখিয়া যাগা মানুয়ে পারলে তরে চিনকা
আঁধার ভিতরেত্ব ইঙাল বেলিগর কাদাৎ।
২৭) ক্ষমা করো
-মধু মঙ্গল সিনহা
ইতাউ ইয়া নাইলে শত্রু ইয়া
যেহাতৌ যেগৌ হাই
ক্ষমা করো তুমি মোরে আজিকার দিনে
পুরান বছরর লগে
পুরান অপরাধ যত।
২৮) বৈশাখ আহিতই
-মধু মঙ্গল সিনহা
ঋতুরাজ বসন্তর মনহান খানি ভদি ইসে,
বিদায়র সময় আহিলেতে জানা থকিসে।
বেলি রাজাই বিয়ান্ত আঁখি পাকিয়া চার,
চৈত্র জিতইগা আজি নাঙ নাচিনা দেশে-
বৈশাখ আহিতই নাচিয়া নুয়া রূপে গতে।
২৯) প্রভু
-মধু মঙ্গল সিনহা
মি তোর ফিদাহান পারেদিলু
মোর হৃদিগ হাপদিয়া।
চরণহানি থুয়ারে মোর মুরগর গজে
মি দিশাহারা অবুঝ ভক্ত আগো
আশ্রয় দিয়াদে প্রভু তি আকমাউ মোরে।
৩০) রাতি শিঙনা
-মধু মঙ্গল সিনহা
রাতি শিঙনা মরনর ইঞ্চিক চিক
বকপাছি অতাই চাবে চাবে খেইতারা মানুর মাহু।
কপাল থিয়া, জেলার মাহুর ঘটা আগ
অতাই খা নুয়ারতারা।
৩১) মুক্তি নেই
-মধু মঙ্গল সিনহা
বাবাসেনা ডাঙর ইল আয় ইনকা্মৌ বপিল
আগে জবর হীনদুকে তাঙর সংসার চলিল।
ব্রজেশ্বরী নিজর গারিগ চেয়া খাল করিরি,
এজনমে মুক্তি নেই থায়া জিতইগা ওয়ারী।
৩২) নুয়া বেলিগো
-মধু মঙ্গল সিনহা
বারো নুয়া বেলিগো নুকুলতই
অবেলি অগোত ছুপ কলঙ্ক নাথাইতই
যে বেলিগোত ছুপ রকতর দাগৌ নাথাইতই।
৩৩) চন্দন
-মধু মঙ্গল সিনহা
আগের দেখি বারো আহিল এনুয়া বছরর পূণ্য লগন
পয়লা বৈশাখে হারৌপার ইথাকে আমি ইলাঙ মগন
গাঙে গাঙে আমি হাবিযে আজি পিদিছি চুয়া চন্দন।
৩৪) নুঙশিপা
-মধু মঙ্গল সিনহা
কবিতা লিখৌরি মি হারৌপাত জাবুরিয়া,
বিষ্ণুপ্রিয়া মণিপুরী ভাষা এহান নুঙশিপা;
মনর কথা লিখলে অর বপকরে চুনাপা।
৩৫) নুয়া বছরহান
-মধু মঙ্গল সিনহা
রাতি ফনার আগে মোরে খুনু আগই ডাখিয়া গেলিগা,
দুয়ারহান আঙ্করিয়া চা নুয়া বছরহান আহিছে মাঙ্কলে।
৩৬) বৈশাখ
-মধু মঙ্গল সিনহা
আই হে বৈশাখ আজি হারৌপানো আমার ঘরে,
পুরানা জঞ্জাল হাবি বেলিয়া দিয়া দুরেই করে।
৩৭) মিছা
-মধু মঙ্গল সিনহা
তি মিছা না মাতলে মি হারৌ ইতৌ।
৩৮) মন চরকরানির মুকশী
-মধু মঙ্গল সিনহা
আজি আমি খেইখেই
অদিন মি হপন আহান দেখিছিলু আরাক হপন আহার ভিতরে।
হাইহান দিনহান ইছিল লামুইসিঙ
মোর কলেজ বন্ধ, মি টিউশনৌ নাবাগাদিয়াছিলু অদিন
তর মুহির ঘরে আহিছিলে তি যেদিন।
কঙানা কেথকপি মুকশী দিয়া।
বট্টি বুট্টি স্কার্টহান না লাগলেউ টেনুয়া ইনাফি আহান
উচ করে টাঙিয়া থুয়াছিলে তোর গারির হেঙ্গারে লামকরিয়া ।
ডিগল ডিগল আঁখি তোর মন চরকরানির মুকশী
থাইলে তি রাতি অহান।
সেন্ধাহান ইল তি ধুপ দিলে,
মি লেরিক চানাত বহিলু মুঙে পরীক্ষাহান।
তরতা মুর কামাড়িয়া আহিলে মোর কাদাৎ
ডিগল ইলে পাটি পাড়া ফামহাত।
টুক-টাক কথা নেইছিল আগামাথা
আছিল নিঙশা থেপকরা বাহানর নুয়া যৌবনর বনে-
কৃষ্ণ চূড়ার ফুল জপা জপা সাতুইয়া।
৩৯) কবিতা জরম
-মধু মঙ্গল সিনহা
যেপাগা মোর মুরগত কবিতা আহান চাবক অর,
চাবকপি মালকগর দেখি মিঔ ছটফট করুরি।
আ্যমিবার দেখি ওয়াহি আকিগ করে জরম অর,
অলঙ্কার আহের, উপমা আহের, আহের মনর ভাব।
হবা চুনা কথা হোতগত বাহের মনর সমুদ্রর বুকে,
অর্থর লগে অনর্থর জোরাৎ আহের নুয়া কবিতা।
চাবক যন্ত্রণা পাহুরৌরি মি কবিতার সাকতা চেয়া,
শান্তির মুকশী দেউরী তেন্নাম কবিতা জরম দিয়া।
বারে বারে গারিত ইলেউ লাজ নেই মরতা আজি,
কবিতা চাবক দিতে দিন রাতি নাইলে আধারাতি।
৪০) চঙা গোলাপ
- মধু মঙ্গল সিনহা
পার্কগর ভিতরে ফুটিছিল কতোগ রাঙা চঙা গোলাপ।
অতার হাদিত দেখিছিলু গোলাপি রঙর মানু আগ।
৪১) লামুই রাজা
-মধু মঙ্গল সিনহা
কিতাপারা ক্ষণে লামুই রুহিতারা দিনে,
হুয়রে লেটুইতারা জাল্লির বনে।
বাঘ নেই বনে লামুই রাজা-
আমি কাকিগ লামুই মালুইছিতা।
দলপতিগই হুক্কা হুয়া বুল্লে
আমি লগ ধরিয়া মাতরাঙ-
কিয়া হুয়া? কিয়া হুয়া?
নিজর মত নেই, নেই স্বাধীনতা-
কোন মতে মেট্রিক পাশ করিয়া
কররাঙ অর্মত্য সেনর সমালোচনা।
বিবেক বিবেচনা কোন দিন আহিতই,
না ইমে বাছিতে বাছিতে সেন্ধা ইতই!
৪২) আমার কৃষ্টি
-মধু মঙ্গল সিনহা
না দেখরাঙ আজি কালি গাঙর কৈনার দল,
কাকালিত কলো আতে বালতি- ইল দিন বদল।
কিতাপারা থেংনা খেইলে ফাটিল মাটির কলো,
মুকশি দিয়া খুরায় মাতলো, ‘বলো হরি বলো’।
ছড়ার ঘাটে ফুতি ধয়া, কেন্থা রুদে দেনা-
হিলর চেপাত উম করলেতে ইচা গুনি পানা।
বাড়ির কোনর খন্তুম সপাৎ লটকা লটকা ফল,
নিঙশিং ইলেই থতাত আহের হুরকাঙ কাল্র জল।
চৈত্র বিষুৎ নিমর পাতা কুমারার হাদিৎ সজনা ডেটা,
ঘরে ঘরে সিন্না সিন্নি কতি খেইতাঙ বেঙল বেঠা।
এপাগেতে ঘরে ঘরে লুয়ার গান্টা লাগিল-
শৌ-সুমারাই নাচিনলেতে আমার কৃষ্টি বাতিল!
৪৩) কবিতার মেয়েকে
-মধু মঙ্গল সিনহা
কুঙ্গই মাতলোতা-
‘হাব্বি কবি কবি নাবে,
হাব্বি কবিতা কবিতা নাবে’!
রুক, বাহা, ঘর-বাড়ি হাবির ভিতরে-
জরম অর কঙানা কেথকর কবিতা।
কবিতার পারেঙে ইঙাল-ঙাল করের
মোর সেন্ধাহানর বর্তিগো পারা ইয়া।
ত্রিকালর ভালবাসার অমৃত বিছারলু
কবিতা সাগরে বারে বারে জাবুরিয়া।
লমিয়া না লমর মোরে হাপদিয়া থর-
ঋতু বসন্ত লমিলেঔ মনর বসন্ত অমর।
বারৌ ফুল সাতর বুড়া চামড়ার গজে
চিনিচাম্পা, চিকঙলেই নুঙশিপা গতে।
নিতি দিন পাখিয়ার হারৌপার হাদিত
নুয়া করে বারো জিংতা অনার তাগিদ।
৪৪) লমনি নাকরের
-মধু মঙ্গল সিনহা
পৃথিবীর রং, রুপ, রস বারো বাহানার গাঠিগো-
লমনি নাকরের।
‘সেইত্য সেইত্য তিন সেইত্য’-আজিত্ত হাবিতা লমিল
বুলিয়া ওয়াশাক করলেউ-
কালি নুয়া করে ঠুম্পা পুখি আগো দের।
সেইত্য বাগের, মেংসেল বাগের, বাগের রসর তাল।
অতার হাদিত জিঙতা মহাকালে খমকরের
যতন করিয়া আক্হান আক্হান বাগা লিকলির টুকারা।
পৃথিবী এহান গুন্ডুরা বুলিয়া না কিতা
তেন্নাম আহানি লাগের মাঙ্কলেইমার ঘাটে
শান্তির বারনগো বিছারিয়া লালফাম বেলিয়া!
৪৫) নামরিল হজক বিছারিয়া
-মধু মঙ্গল সিনহা
গাড় গাড় রাতি-
নামরিল হজক বিসারিয়া নুকুলিছু!
চাইরবারা আধার কিত্তাউ নাদেখৌরি,
আঁখি থমৌ ঘুমাছে পারা।
নিঃশব্দই জাবুরাছে থঙচিলেত্ত টেঙারা হাপদিয়া।
দূরেইত ইমে শারিকর রুহানি জিঙতা ইয়া আছে-
আরাক চারি কুড়ি লালপা বুজন আগর
নিঙশা থেৎপা কাহুড়া।
চিকঙলেই সপার কাটা চপ চপ উবা ইছে
মাকরিয়া হারপিলু রাতি শিঙনা।
মি তরাতরি মেইশার দাপদিয়া
টেঙারাগর গজে কাহিলুগা-
কৈতে নামরিল হজক সপা?
চাইরোবারা মাকরিয়া বিছারিয়া চেইলু-
নামরিল হজক নেই!
বন জঙ্গল ভাগিয়া বিছারা বিছারা আলুইলু
ক্ষেতির বি ছড়ার পাড়ে পাড়ে
অচিনা গান্টা লালুইয়া
নুয়া জিনার চক্থা ঘুম লেম নিবা আধারে।
ছড়াহান লালনির নৌ নেই-
মোরতা যানা লাগতৈ-হজকর খোঁজে।
নাইল অহাত ফান্দিয়া পড়লু ডঙরগত।
তাকুরি পাকদিয়া মোরে বরিলগা ভিতরে!
এমতাগা বিশ্বাস ইল নামরিল হজক পেইতউ-
আঠালি মাটির ভিতরে ইমার পেটগৎ।
৪৬) দাঁতর হু
-মধু মঙ্গল সিনহা
সপে সপে দাঁতর হু
নংসাগনা হরপগো।
তাকুরি দিয়া পাকদের
সপহান খাসে অগো
৪৭) নেতাজী
-মধু মঙ্গল সিনহা
আইনে বার ফিরিয়া তি আমার নেতাজী,
দেশর মানু হাবি আজি তোরেই বাছাছি।
ব্যর্থ আমি বারে বারে বিছারানিত তরে,
ধন্য ইমা ভারত জননী জনম দিয়া ঘরে।
We appreciate you contacting us. Our support will get back in touch with you soon!
Have a great day!
Please note that your query will be processed only if we find it relevant. Rest all requests will be ignored. If you need help with the website, please login to your dashboard and connect to support