জীবন যুদ্ধ -মধু মঙ্গল সিনহা
জীবন যুদ্ধ
-মধু মঙ্গল সিনহা
সূচীপত্র
১) জীবন যুদ্ধ
২) মোরে জিংতা অনা দে
৩) বিষর ডেকুর
৪) চকথা আঁখির নাভাগা ঘুম
৫) নাজিরানির হারৌপা
১) জীবন যুদ্ধ
-মধু মঙ্গল সিনহা
হে সমাজর সেবারী মাতঙ এমারি,
হাজিক হাবিয়ে ইতিহাসর ওয়ারি।
উন্নতির ডেঙে ডেঙে ফুল সাতুইছে,
হাইহান হাদি হাদিৎ কাটাউ পালুইছে।
কু-বুদ্ধি চেলমা মানুঔ না ঘুমাছি আজি,
আমার তাতে কৈগো যুদ্ধ করতে রাজি।
সমাজর কামে আহো হাবি সালুইয়া,
না থাইকা আরতা আমি মিমোত ইয়া।
ফন্দি ফিকির আমি দেখতাঙ আমি,
কুপরে খাল-করিয়া চেইনে তুমি।
জীবনর যুদ্ধৎ জিঙিয়া পালুইক রাজা,
আমিঔ পারবাঙ না কিতা পালানি প্রজা।
হবা বালা ইলেতে হাবিরতাঔ সুনাঙ,
নাইলে ইমে সমাজ সেবারির বদানাম।
২) মোরে জিংতা অনা দে
- মধু মঙ্গল সিনহা
হাবিতা যেমন উলট পালট ইয়া পরিলগা,
বৌ বরনে বাড়াছে বনহানর দেখি।
যুদ্ধৎ পরাজিত দেশহার অছারে-
বিভৎস ভয়ঙ্কর সাতে বাংকুটি দিয়া আছু।
মাতানি আহের, লিখানি আহের
তবু যেমন আবারার হপনর অছারে;
ভিতরেই হুকের হাবিতা।
জোড় করিয়া অতারলেঔ,
থৌহান নেই আজি।
কুরাঙৌ বৌ নেই, হৃদির খুরাক নেই;
মি মাঙো যাঔরিগা, বুরে যাঔরিগা।
মোরে মোর দেখি জিংতা অনা দে,
থেইকর এরে তোর হুনার পিঙ্গুরা।
মোর আত জাং এরা দে-
এরাদে তি মোরে ইদুংদুয়া হাগহানর তলে।
মি ফুরদিতৌ মরণর কুগর গজেদে-
মি এলা দিতৌ চান্দুাহার গজে।
মিঙাল থাইলে বৌ নেই-
নিংশা কারানির সময়ঔ নেই।
মোরে মোরে অসারে এরাদে;
মোরে ল্যাম্পগো অনাদে।
হারদিনকার খাংলাগা জনমে-
মি পাখিয়ার লগে এলা দিতৌ,
মি ঘাসর লগে ইতাঔ বাদিতৌ-
মোরে মোরে অসারে জিংতা অনা দে!
৩) বিষর ডেকুর
-মধু মঙ্গল সিনহা
ইদানীং মনে অরতা ধুলিয়ে গুরিয়া থুয়াছে আনিকা নগর আগোত থাঔরি মি,
এহান ভমভরা বারো চিনাপকে বুজিছি দকদকা মাঙযারগা সমাজ আহান,
তাপ্প তাপ্প যারগা এহান চিয়ৌপা সমাজর কপ-জপ বুজা পথেদে;
কাকেয়ে কাকেয়ে মুঙর রাজপথহান ইলুয়া।
সভ্যতাহান আগুইয়া যারগা অসভ্যতার ঝমকি লাগিয়া,
মনে অর এ'নগর এগো আরতা আমারগো নাবে, চারিবারাদে হুদ্দা পিঞ্জুরা।
কোরাঙ হাইল আজি ইন্দ্রপ্রস্থ, বারানসি, বৈশালি?
নিঙে ওর এ'নগর এগো টুম্পা দেহার আহৌ তুহুঙেদে-
কেলুইয়া পরের অবিরত এ সামাজ এহার দলানর ইট সুন বালি।
কানহান পাতলেই হুনরাঙ চাইরোবারাদে কাঁদানির রুহন, বিষর ডেকুর
জিংতা অনার সালে গজে তুলিছি আহৌ আত- জবর অসহায় লাগের নিজরে।
মনে অর এ'নগর এগো আরতা আমারগো নাবে, চারিবারাদে হুদ্দা পিঞ্জুরা।
৪) চকথা আঁখির নাভাগা ঘুম
- মধু মঙ্গল সিনহা
ককারা জুনাকহান ভাহের অরে বকুল ছপার ফাঁকে
আকতাই পাহাড়া দিয়া থাইতারা তোরে।
গাঙ ঘরে হাব্বি চুপ চকথা আঁখির নাভাগা ঘুমে।
মি আক্ষুলাগ কেতিরা ফামে।
বাহানার মনগোর হুতা তিঙিছিল কালিকাঔ বারো
গেলগা রাতিহানে হারপাছে।
ডায়েরির যতো পাতা তোরেনেই বুজিছে কথা
চিনিচাম্পাইঔ চিনিরি তোরে।
স্নেহলতা তোর হৃদিত নুঙিপা লালসার শিকার
মোরেই বিছারিছ তি!
আবকচা মানুর হাদিত অচিনা পাখিয়ার ঝমে
গারিগো ছকেদিছ রাতি।
স্বার্থর এ শহঙে আছু মি ঘরে
তবুও কিয়াদা চারাইতা মোরে?
মণিমালা নুঙিয়া আছোৎ কাবেরী নুঙিয়া থাইছ!
ইঙালপা দিনর পথে।
দোষা দোষী নাবে হুদালা ইমে মোর অসারে অগরেঔ
ধ্বংস না করে দিও।
মাছর অছারে পানিহাৎ পাক পাক করলেই
জীবনহান চলেরহান নাবে।
ঃঃঃঃঃঃঃঃঃঃঃঃঃঃঃঃঃঃঃঃঃঃঃঃঃঃঃঃঃঃঃঃঃঃঃ
চেইকঃ শহঙে> শহরে (মাদই)
৫) নাজিরানির হারৌপা
-মধু মঙ্গল সিনহা
যন্ত্রণার আতুরার বারিৎ খুটোঔ-নাটৌ জীবনে
সীমাহীন আশানেইপা আক্ষুলাগোর লমিলগা হতাশা,
বৌবরনে মুঝুরিয়া বেলাছে
মালতী সপার দেখি নঙিয়া পড়িছে দুঃখর খৌগোৎ।
গোধূলির নীলুয়া মিঙালহান যেপাগা আঁধার পালরগা
হাগহানোর কালা পর্দাহাৎ ইঙাল-ঙালর লেখাৎ নেয় তারা হাবি।
রাতিকার হাগে চলের আবকচা জোগাড়;
অসময়ে মি পথ মাঙপা
এগরতা আরকৌ বারের আটানির শিংনা।
তবু মি-খাঙ লাগিছিলু দেখিয়া ভুবনমোহিনী জোনাকর মিঙাল
যেহানে তিঙাছিল মোর হুকানা সাক্তাহান।
অদিন জোনাকহানে আঙকরলো পারা মোরে,
কুরাঙ যারগাতা তি, সাক্তাহান মিমত করিয়া?
মি মাতলু হিনপিয়া- মি যাঔরিগা দুঃখর কালা আঁধারে,
মরণরে কলকরানির সালে।
নুংশিপা ফুলগোর দেখি- জুনাক অহান
ধরিছিলি মোহিনী মহিমা।
হরিণীগোর দেখি কালা কালা দুগো আঁখি
কিহান্নো হারনেই-ইকে দিলো মোর কপালে
তপ্তা ঠটর হাজারো ছবি।
অকূল সমুদ্রুর দিক মাঙপা কোন নাবিক আগই
যেসারে দেখের ণিজন্ত রেখাৎ-
কোন আসাঙপা ঘাটির আসাঙপা ফিরাল;
হৃদিগোর ভিতরে অসারে ভাগিয়া পড়িল-
নাজিরানির হারৌপার ঢেউ আগোর গজে আগো ।
চেইকঃ ণিজন্ত> দিগন্ত ( মাদই)
